រាជធានីភ្នំពេញ ៖ អំនួតចំពោះភាពសិចស៊ីបង្ហាញសម្រស់រាងកាយ ពិសេសសុដន់ បានជះត្រឡប់ទៅកញ្ញាសេង សូណា វិញនូវការប៉ះពាល់ដល់អាជីពរបស់នាង ។ ការប៉ះពាល់នេះពីការដាក់ពិន័យរបស់ក្រសួងវប្បធម៌ និងវិចិត្រសិល្បៈទៅលើរូបនាង…
រាជធានីភ្នំពេញ ៖ អំនួតចំពោះភាពសិចស៊ីបង្ហាញសម្រស់រាងកាយ ពិសេសសុដន់ បានជះត្រឡប់ទៅកញ្ញាសេង សូណា វិញនូវការប៉ះពាល់ដល់អាជីពរបស់នាង ។ ការប៉ះពាល់នេះពីការដាក់ពិន័យរបស់ក្រសួងវប្បធម៌ និងវិចិត្រសិល្បៈទៅលើរូបនាង ។
ថ្ងៃទី១៨ កញ្ញា ២០១៨ ក្រសួងវប្បធម៌ និងវិចិត្រសិល្បៈ បានចេញលិខិតប្រកាសអំពាវនាវឲ្យគ្រប់ស្ថានីយទូរទស្សន៍ ព្រមទាំងអាជីវករដែលមានមុខរបរពាក់ព័ន្ធនឹងវិស័យសិល្បៈវប្បធម៌ ឲ្យផ្អាកទទួលយកកញ្ញាសេង សូណា ចូលរួមសម្ដែង ។ ក្រសួងវប្បធម៌ និងវិចិត្រសិល្បៈបានផ្ញើលិខិតនេះជូនទៅប្រធានសមាគមទូរទស្សន៍កម្ពុជា ។
លិខិតរបស់ក្រសួងក្រសួងវប្បធម៌ និងវិចិត្រសិល្បៈ លើកឡើងពីស្មារតីនៃកិច្ចប្រជុំរបស់ក្រុមប្រឹក្សាពិន័យ និងលើកសរសើរនៃក្រមសីលធម៌នៃអ្នកសិល្បៈ កាលពីថ្ងៃទី១៦ ខែសីហា ឆ្នាំ២០១៨ បានសម្រេចដាក់ពិន័យផ្អាកតារាសម្ដែងកញ្ញាសេង សូណា មិនឲ្យធ្វើសកម្មភាពពាក់ព័ន្ធនឹងវិស័យសិល្បៈគ្រប់រូបភាព រួមមាន ៖ ការសម្ដែង ថតខ្សែភាពយន្ដ ខារ៉ាអូខេ ស្ប៉ត ច្រៀងបង្ហាញមុខនៅតាមកញ្ចក់ទូរទស្សន៍…ជាដើម រយៈពេល១ឆ្នាំ គិតចាប់ពីថ្ងៃទី១៧ ខែសីហា ឆ្នាំ២០១៨ ដល់ថ្ងៃទី១៧ ខែសីហា ឆ្នាំ២០១៩ ។
លោកថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានបញ្ជាក់ពីមូលហេតុដែលក្រសួងវប្បធម៌ដាក់បម្រាមនោះដោយសារតែកញ្ញាសេង សូណា នៅតែបន្ដស្លៀកពាក់ និងបញ្ចេញឥរិយាបថប៉ះពាល់ដល់ទំនៀមទម្លាប់ ប្រពៃណីជាតិ ។
កញ្ញាសេង សូណា នាពេលកន្លងបានបញ្ចេញប្រតិកម្មនៅពេលលឺថាក្រសួងវប្បធម៌ និងវិចិត្រសិល្បៈ គ្រោងកោះហៅនាងទៅអប់រំ និងដាក់ពិន័យ ។ នាងបានការពារខ្លួនថា ហេតុអីត្រូវដាក់ពិន័យ បើភាពសិចស៊ីរបស់នាងនោះនៅក្នុងការសម្តែងឲ្យភាពយន្តបរទេស !
អ្នកសិល្បៈ និងមហាជនមួយចំនួនយល់ថាបម្រាមរបស់ក្រសួងវប្បធម៌ និងវិចិត្រសិល្បៈ ហាក់មិនមានទម្ងន់ប៉ុន្មានទេទៅលើសេង សូណា ដោយសារតែជាក់ស្តែងនាងដូចជាមិនមានសកម្មភាពសម្តែងឲ្យផលិតកម្មភាពយន្តនានា ឬក៏សម្តែងនៅតាមកម្មវិធីប្រគំតន្ត្រីរបស់ទូរទស្សន៍នានានោះទេ និយាយរួមគឺនាងស្ទើរមិនឃើញមានសកម្មភាពក្នុងពិភពសិល្បៈ ។ កន្លងមកសូណា ច្រើនចេញទៅសម្តែងនៅបរទេស ។ ដូច្នេះហើយការដាក់ពិន័យរបស់ក្រសួងវប្បធម៌ ទំនងមិនធ្វើឲ្យសេង សូណា ឈឺចាប់ ឬប៉ះពាល់ដល់អាជីពនាងប៉ុន្មានទេ ។
ពេលនេះដូចដែលការលេចលឺព័ត៌មានកន្លងមកមែន គឺក្រសួងវប្បធម៌ និងវិចិត្រសិល្បៈបានសម្រេចដាក់ពិន័យកញ្ញាសេង សូណា ដោយហាមរាល់ការសម្តែងរបស់នាង ។ ទោះជាយ៉ាងណាក្តីមិនទាន់មានប្រតិកម្មជាថ្មីពីកញ្ញាសេង សូណា ទេ ។
តារាដែលមានប្រភពកំណើតនៅស្រុកព្រៃកប្បាស ខេត្តតាកែវកញ្ញាសេង សូណា ល្បីឈ្មោះដោយភាពសិចស៊ីបញ្ចេញសម្រស់សុដន់ ជាជាងដោយអាជីពសិល្បៈដែលមិនសូវមមាញឹករបស់នាង ៕
ចែករំលែកព័តមាននេះ