ប្រទេសកូរ៉េទាំង២ ៖ មេដឹកនាំកំពូលកូរ៉េខាងជើងលោកគីមជុង អ៊ុន កាលពីរសៀលថ្ងៃទី១៨ កញ្ញា បានចាប់ផ្ដើមពិភាក្សាជាមួយប្រធានាធិបតីកូរ៉េខាងត្បូងលោក MOON JAE IN…
ប្រទេសកូរ៉េទាំង២ ៖ មេដឹកនាំកំពូលកូរ៉េខាងជើងលោកគីមជុង អ៊ុន កាលពីរសៀលថ្ងៃទី១៨ កញ្ញា បានចាប់ផ្ដើមពិភាក្សាជាមួយប្រធានាធិបតីកូរ៉េខាងត្បូងលោក MOON JAE IN នៅឯទីស្នាក់ការគណបក្សពលករកូរ៉េក្រុងព្យុងយ៉ាង ក្នុងក្របខណ្ឌនៃការជួបគ្នាកំពូលលើកទី៣នាឆ្នាំ២០១៨នេះ។
ក្នុងការចរចាដែលចាប់ផ្ដើមនាវេលាម៉ោង១៥និង៣០នាទីម៉ោងក្នុងស្រុក មេដឹកនាំទាំង២ផ្ដោតលើបញ្ហាចម្បង៣ គឺការកែលម្អទំនាក់ទំនងអន្តរកូរ៉េ បណ្ដាមធ្យោបាយដែលអាចជម្រុញការចរចាពីការរំសាយនុយក្លេអ៊ែររវាងកូរ៉េខាងជើងនិងសហរដ្ឋអាមេរិក ការលុបបំបាត់ចោលភាពតានតឹងខាងយោធាព្រមទាំងគ្រោះថ្នាក់នៃសង្គ្រាមនៅឧបទ្វីបកូរ៉េ។
លោក MOON មកដល់ក្រុងព្យុងយ៉ាងនាព្រឹកថ្ងៃទី១៨ កញ្ញា ដើម្បីជួបគ្នាកំពូលលើកទី៣ ជាមួយលោកគីម។ ការជួបគ្នាកំពូល២លើកមុនប្រព្រឹត្តទៅនៅភូមិតាមព្រំដែនប៉ានមុនហ្សូម កាលពីខែមេសា និងកាលពីខែឧសភា។ ហើយទស្សនកិច្ចនេះរបស់លោក MOON ក៏ជាលើកដំបូងដែរ របស់ប្រមុខរដ្ឋកូរ៉េខាងត្បូងមួយរូប នៅក្រុងព្យុងយ៉ាងចាប់តាំងពី១១ឆ្នាំមកហើយ។
លោកគីម បានទៅចាំទទួលលោក MOON ដោយផ្ទាល់ខ្លួនលោក នៅឯព្រលានយន្តហោះ ហើយធ្វើដំណើរតាមរថយន្ត BERLINE ពណ៌ខ្មៅ មួយគ្រឿងជាមួយគ្នា ក្រោយពិធីស្វាគមន៍ធំមួយ ជាមួយការចូលរួមរបស់ពលរដ្ឋច្រើនរយនាក់។ តាមដងវិថីដែលក្បួនរថយន្តឆ្លងកាត់មេដឹកនាំទាំង២បានលើកដៃគ្រវីតបចំពោះពលរដ្ឋដែលឈរអមតាមដងផ្លូវស្វាគមន៍ក្នុងទឹកមុខញញឹមរីករាយ។
ក្រោយការចរចាលើកទី១ មេដឹកនាំទាំង២ ទស្សនាការសម្ដែងសិល្បៈនាវេលាល្ងាច។ មេដឹកនាំទាំង២បន្តការចរចាគ្នាទៀតនាព្រឹកថ្ងៃទី១៩ កញ្ញា ហើយអាចចុះហត្ថលេខាលើសន្ធិសញ្ញាសន្តិភាពមួយបញ្ចប់ភាពតានតឹងខាងយោធានៅឧបទ្វីបកូរ៉េ៕
ចែករំលែកព័តមាននេះ