ខេត្តបាត់ដំបង ៖ សេចក្តីរាយការណ៍បឋមឱ្យដឹងថា ជនសង្ស័យ២នាក់ត្រូវកម្លាំងកងរាជអាវុធហត្ថស្រាវជ្រាវឃាត់ខ្លួនបាន កាលពីវេលាម៉ោង០៦ និង៣០នាទីព្រឹកថ្ងៃទី១៩ កញ្ញា ពាក់ព័ន្ធក្នុងករណីគាស់បង្អូចចូលលួចទ្រព្យសម្បត្តិនៅក្នុងផ្ទះមន្ត្រីអគ្គិសនីម្នាក់ នៅភូមិកម្មករ សង្កាត់ស្វាយប៉ោ ក្រុងបាត់ដំបង ។
ជនសង្ស័យទាំង២នាក់ ម្នាក់ឈ្មោះតាំ ប៊ុនយិន អាយុ៤៣ឆ្នាំ ជាគ្រួបង្រៀន និងម្នាក់ទៀតឈ្មោះហែម ផានិត អាយុ២៧ឆ្នាំ ជាកម្មករ ពួកគេស្នាក់នៅផ្ទះជួលក្នុងភូមិ-សង្កាត់កើតហេតុ ។ ជនទាំង២នាក់ត្រូវបានកម្លាំងកងរាជអាវុធហត្ថក្រុងបាត់ដំបង ធ្វើការស្រាវជ្រាវឃាត់ខ្លួនបាន ក្រោយពីសង្ស័យថា បានធ្វើសកម្មភាពគាស់បង្អូចចូលលួយទ្រព្យសម្បត្តិរបស់ជនរងគ្រោះឈ្មោះដុះ គឹមអាង ភេទប្រុស អាយុ៣៤ឆ្នាំ ជាបុគ្គលិកអគ្គិសនី រស់នៅភូមិ-សង្កាត់កើតហេតុខាងលើ ។
បើតាមការបំភ្លឺជាបឋមរបស់ម្ចាស់ផ្ទះថា ចោរបានគាស់បង្អូចចូលលួចយកលុយអស់ជិត១លានរៀល និងសម្ភារផ្សេងៗមួយចំនួនទៀត ។ ដោយឡែក ជនសង្ស័យឈ្មោះតាំ ប៊ុនយិន ជាគ្រួបង្រៀន និងឈ្មោះហែម ផានិត ជាកម្មករ បានសារភាពថា បន្ទាប់ពីត្រូវសមត្ថកិច្ចឃាត់ខ្លួនថា ពួកខ្លួនពិតជាធ្វើសកម្មភាពគាស់បង្អូចចូលលួចទ្រព្យសម្បត្តិនៅក្នុងផ្ទះមន្ត្រីអគ្គីសនីនោះមែន ។ ជនទាំង២នាក់ បាននិយាយពីសកម្មភាពដែលពួកខ្លួន បានប្រព្រឹត្តដូច្នេះថា ពួកខ្លួនបានយកមែកក្រខុមចងខ្សែធ្វើជាទំពក់ សម្រាប់ថ្ពក់កន្លឹះបង្អួច រួចលូនចូលទៅខាងក្នុងផ្ទះ ដើម្បីលួចយកលុយនិងទ្រព្យសម្បត្តិមួយចំនួនទៀត នៅពេលមិនឃើញម្ចាស់មិននៅផ្ទះ។
ជាមួយនឹងការឃាត់ខ្លួនជនសង្ស័យទាំង២នាក់នេះ កម្លាំងជំនាញដកហូតបាននូវវត្ថុតាងរួមមាន មែកឈើរាម្រាប់ថ្ពក់គន្លឹះបង្អួចចំនួន ០១, អត្តសញ្ញាណប័ណ្ណចំនួន០២, ប័ណ្ណសម្គាល់ខ្លួន បម្រើការងារចំនួន០១, ប័ណ្ណសម្គាល់យានយាន្តចំនួន០២, ប័ណ្ណបើកបរ០១ និងសម្ភារ:មួយចំនួនទៀត ដែលជារបស់ជនរងគ្រោះ តែរកមិនឃើញលុយដែលជនរងគ្រោះអះអាងថា បានបាត់នោះទេ។
ចែករំលែកព័តមាននេះ