ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) បាននិយាយកាលពីថ្ងៃចន្ទសប្ដាហ៍នេះថា លោកនឹងដាក់ពន្ធ១០%ទៅលើផលិតផលនាំចូលពីចិនដល់ទៅ២០០ប៊ីលានដុល្លារ ប៉ុន្តែលោកអនុគ្រោះដល់នាឡិកា Smartwatch របស់Apple និង Fitbit រួមទាំងផលិតផលដទៃទៀតដូចជា មួកការពារ និងកៅអីក្មេងសម្រាប់ដាក់ក្នុងរថយន្តជាដើម ។
ក្នុងសេចក្តីថ្លែងការណ៍ខាងលើ លោកត្រាំបានព្រមានថា ប្រសិនបើប្រទេសចិនចេញវិធានការឆ្លើយតបប្រឆាំងនឹងកសិករ ឬឧស្សាហកម្មអាមេរិក « ពួកយើងនឹងអនុម័តដំណាក់កាលពីបីភ្លាមៗ ដែលជាពន្ធលើផលិតផលនាំចូលពីចិនប្រមាណ២៦៧ប៊ីលានដុល្លារបន្ថែមទៀត »។
ពន្ធទាំងនេះនឹងចាប់ផ្តើមមានប្រសិទ្ធភាពនៅថ្ងៃទី២៤ខែកញ្ញាខាងមុខនេះ ប៉ុន្តែអត្រាពន្ធនឹងកើនដល់២៥%នៅចុងឆ្នាំ២០១៨ ដែលអនុញ្ញាតឲ្យក្រុមហ៊ុនអាមេរិកមានពេលវេលាប្តូរអ្នកផ្គត់ផ្គង់ទៅកាន់ប្រទេសដទៃវិញ ។
មកដល់បច្ចុប្បន្ន សហរដ្ឋអាមេរិកបានដាក់ពន្ធលើផលិតផលចិនប្រមាណ៥០ប៊ីលានដុល្លារទៅហើយដើម្បីដាក់សម្ពាធដល់ប្រទេសនេះឲ្យកែទម្រង់គោលនយោបាយពាណិជ្ជកម្ម ការផ្ទេកបច្ចេកវិទ្យា និងការផ្តល់ឧបត្ថម្ភធនដល់ឧស្សាហកម្មបច្ចេកវិទ្យាខ្ពស់ ។
ការតានតឹងឡើងនៃជម្លោះនេះកើតមានឡើង បន្ទាប់ពីការចរចារវាងសេដ្ឋកិច្ចធំជាងគេទាំងពីរលើពិភពលោកបានបរាជ័យក្នុងការសម្រេចបានលទ្ធផល ។
កាលពីសប្តាហ៍មុន លោក Steven Mnuchin រដ្ឋមន្ត្រីក្រសួងរតនាគារអាមេរិក បានអញ្ជើញមន្ត្រីថ្នាក់ខ្ពស់របស់ប្រទេសចិនមកចូលរួមការចរចាជាថ្មី ប៉ុន្តែមកដល់ពេលនេះមិនទាន់មានកាលបរិច្ឆេទច្បាស់លាស់ឡើយ ។
ប្រទេសចិនបានសន្យាថា នឹងឆ្លើយតបទៅនឹងរាល់ពន្ធអាមេរិកដែលបានដាក់លើប្រទេសខ្លួន ខណៈដែលសារព័ត៌មានក្នុងស្រុកបានឲ្យដឹងថា នឹងមានការវាយបកដ៏ធ្ងន់ធ្ងរ ។
អ្នកព្យាករណ៍បានព្រមានថា ការធ្ងន់ធ្ងរឡើងនៃជម្លោះរវាងសេដ្ឋកិច្ចធំជាងគេទាំងពីរលើពិភពលោកនេះ អាចនឹងកាត់បន្ថយការលូតលាស់សេដ្ឋកិច្ចពិភពលោកប្រមាណ០,៥% រហូតដល់ឆ្នាំ២០២០ ប្រសិនបើពន្ធដែលបានគំរាមនេះពិតជាត្រូវបានអនុម័តមែន៕
ចែករំលែកព័តមាននេះ