ខេត្តរតនគិរី ៖ ជនសង្ស័យម្នាក់ត្រូវបានកម្លាំងអធិការស្រុកអណ្ដូងមាស និងកម្លាំងប៉ុស្ដិ៍រដ្ឋបាលឃុំញ៉ាងធ្វើការចាប់ខ្លួនតាមដីកាបង្គាប់របស់ចៅក្រមសាលាដំបូងខេត្តពីបទហិង្សាដោយចេតនាមានស្ថានទម្ងន់ទោស បន្ទាប់ពីបានគេចខ្លួនអស់មួយរយៈ។
ការចាប់ខ្លួនជនសង្ស័យតាមដីកាបង្កាប់នេះបានអនុវត្តឡើងកាលពីវេលាម៉ោង១២និង៣០ថ្ងៃត្រង់ត្រូវនឹងថ្ងៃទី១៧ ខែកញ្ញា ឆ្នាំ២០១៨ នៅចំណុចភូមិតាំងជិះ ឃុំញ៉ាង ស្រុកអណ្ដូងមាស ខេត្តរតនគិរី។ ការអនុវត្តនេះតាមដីកាបង្គាប់អោយចាប់ខ្លួនលេខ៤៣៤/១៦ចុះថ្ងៃទី៣ ឧសភា ២០១៦ ចេញ លោក សេង ស៊ឹមសុរិយា ចៅក្រមស៊ើបសួរនៃសាលាដំបូងខេត្តរតនគិរី។
ជនសង្ស័យដែលកម្លាំងចាប់ខ្លួនបាននោះឈ្មោះ ថុល ខ្នុយ ភេទប្រុស អាយុ២៨ឆ្នាំ ដែលជាប់ពាក់ព័ន្ឋករណីហិង្សាដោយចេតនាមានស្ថានទម្ងន់ទោសដែលបានប្រព្រឹត្តកាលពីថ្ងៃទី១៥ មករា ២០១៦ នៅភូមិកេត ឃុំញ៉ាង ស្រុកអណ្តូងមាស។
ហើយបច្ចុប្បន្នកម្លាំងជំនាញអធិការស្រុកកំពុងបំពេញបែបបទបញ្ជូនទៅសាលាដំបូងខេត្តដើម្បីចាត់ការតាមនិតិវិធីច្បាប់ ។
សូមបញ្ជាក់ថា ពាក់ព័ន្ធនឹងករណីខាងលើនេះ ជនសង្ស័យនិងជនរងគ្រោះមានទំនាស់ពាក្យសម្តីគ្នាក្នុងវង់ផឹកស៊ីបង្កជាអំពើហិង្សា បណ្តាលឱ្យជនរងគ្រោះត្រូវរបួស ហើយជនសង្ស័យបានរត់គេចខ្លួនបាត់ ។ ហេតុ
ការណ៍នេះបានកើតឡើងកាលពីថ្ងៃទី១៥ មករា ២០១៦ នៅភូមិកេត ឃុំញ៉ាង ស្រុកអណ្តូងមាស៕
ចែករំលែកព័តមាននេះ