រាជធានីភ្នំពេញ ៖ បុរសម្នាក់កំពុងតែជិះម៉ូតូធ្វើដំណើរតាមផ្លូវសុខៗក៏ស្រាប់តែមានបុរសម្នាក់ទៀតបានបើករថយន្តស្ទូចជ្រុលទៅបុកពីក្រោយ ហើយកិនពីលើបណ្តាលឲ្យជនរងគ្រោះរងរបួសធ្ងន់ ស្លាប់ពេលបញ្ជូនទៅដល់មន្ទីពេទ្យ ហេតុការណ៍នេះដែរបានកើតឡើងនៅវេលាម៉ោង៧និង៣០នាទីយប់ថ្ងៃទី១៨ ខែកញ្ញា ឆ្នាំ២០១៨ ផ្លូវ២១៧ ភូមិឬស្សី ស្ទឹងមានជ័យ២ ខណ្ឌមានជ័យ ។
សពជនរងគ្រោះមានឈ្មោះ ណេត វណ្ណេត ភេទប្រុស អាយុ១៨ឆ្នាំ ជិះម៉ូតូម៉ាកស្កុបពីពណ៌សលាយទឹកក្រូច ពាក់ស្លាកលេខ ភ្នំពេញ 1BG -1597 ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់បានជិះម៉ូតូម៉ាកស្កុបពី ពណ៌សលាយទឹកក្រូច ធ្វើដំណើរតាមផ្លូវ២១៧ ក្នុងទិសដៅពីត្បូងទៅជើងខណៈមកដល់ចំណុចកើតហេតុ ផ្លូវរៀងស្ទះព្រមទាំងមានភ្លើងស្តុបផងនោះក៏ស្រាប់តែមានបុរសម្នាក់ទៀតបើករថយន្តស្ទូចម៉ាកហ៊ីយ៉ាន់ដាយ ពណ៌ស ធ្វើដំណើរក្នុងទិសដៅស្របគ្នាបានជ្រុលទៅបុកម៉ូតូពីក្រោយពេញទំហឹង បណ្តាលឲ្យមានអ្នកដួលចូលក្រោមរថយន្ត ហើយរថយន្តកិនអូសពីលើបណ្តាលឲ្យរងរបួសបាក់ភ្លៅខាងស្តាំ រយះចេញខ្លាញ់មកក្រៅ ភ្លាមៗនោះដែរជនរងគ្រោះត្រូវរថយន្តសង្គ្រោះបានមកដឹកយកទៅសង្គ្រោះនៅគ្លិនិកសួគា៍ដោយសារតែស្ថានភាពធ្ងន់ធ្ងរពេក ខណៈពេលសង្គ្រោះបានរយៈពេល២ម៉ោងកន្លះ ជនរងគ្រោះបានដាច់ខ្យល់ស្លាប់តែម្តង ។
ដោយឡែករថយន្តបង្កវិញ នៅពេលបង្កគ្រោះថ្នាក់ហើយ គឺមិនបានឈប់ដោះស្រាយនៅនិងកន្លែងកើតហេតុនោះទេ គឺបានព្យាយាមបើករថយន្តរត់គេចជិត១គីឡូម៉ែត្រមកដល់ជិត និងវត្ត ផ្លូវចូលទៅកន្លែងចាក់សំរាមចាស់ទើបអ្នកបើកបរបានទុករថយន្តចោល ហើយរត់គេចខ្លួនបាត់ ។
ក្រោយពេលកើតហេតុសមត្ថកិច្ចកិច្ចជំនាញក្រុងបានចុះទៅធ្វើការវាស់វែងរថយន្ត និងម៉ូតូយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ។ ចំណែកសពជនរងគ្រោះត្រូវសមត្ថកិច្ចធ្វើលិខិតប្រគល់ឲ្យរថយន្តដឹកយកទៅតម្កល់ទុកនៅវត្តទឹកថ្លា ដើម្បីស្វែងរកសាច់ញាតិបងប្អូនមកយកទៅធ្វើបុណ្យតាមប្រពៃណី ៕
ចែករំលែកព័តមាននេះ