ខេត្តកំពង់ឆ្នាំង ៖ ក្នុងរឿងរ៉ាវមួយរវាងពីរនាក់បងប្អូនបង្កើតដែលរស់នៅជាប់របងជាមួយគ្នា បានឈានដល់ការប្តឹងផ្តល់គ្នាទៅតុលាការ ។ យ៉ាងនេះក្តី ស្ត្រីជាបងបានលើកដៃសំពះសុំអង្វរដល់អាជ្ញាធរខេត្ត និងស្ថាប័នតុលាការ សូមមេត្តាផ្ដល់យុត្តិធម៌ជូនគ្រួសារគាត់ផង ខណៈគ្រួសារខាងប្អូនបង្កើតប្តឹងគាត់ទៅតុលាការដោយចោទពីបទ បំផ្លិចបំផ្លាញ ទ្រព្យសម្បត្តិអ្នក ដទៃដោយចេតនា ដោយគាត់កាប់ដើមខ្នុរងាប់មួយដើមក្នុងដីភូមិរបស់គាត់តែមានដើមផ្ការបស់ប្អូនវាតោងមកលើបណ្តាលអោយដាច់មែកខ្លះតែប៉ុណ្ណោះ ។
ដោយសារតែជីវភាពក្រីក្រគ្មានលទ្ធភាពតក្តីនៅតុលាការនៅព្រឹកថ្ងៃទី១៨ ខែកញ្ញា ឆ្នាំ២០១៨ស្ត្រីជាបងបានហៅអ្នកសារព័ត៌មានក្នុងគោលបំណងផ្សព្វផ្សាយដើម្បីស្វែងរកភាគីពាក់ព័ន្ធ និងអាជ្ញាធរខេត្តជួយអន្តរាគមន៍រកយុត្តិធម៌ជូនគ្រួសារគាត់ផង គាត់មិនចង់បានអ្វីផ្សេងនោះឡើយ ។
ស្ត្រីឈ្មោះ កែវ ស៊ីថា អាយុ៦៣ឆ្នាំ មានទីលំនៅភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ដែលត្រូវជាបង និងជាចុងចម្លើយបានប្រាប់ថា ប្ដីគាត់មានឈ្មោះ សុខ ខា អាយុ៦៩ឆ្នាំ ពីរនាក់ប្ដីប្រពន្ធគាត់គ្មានកូននោះទេ ។ គាត់មានប្អូនប្រុសម្នាក់ឈ្មោះ ម៉ប់ សារឿន ហៅ កែវ ប៊ុននី ប្អូនប្រុសគាត់មានប្រពន្ធឈ្មោះ អ៊ីម សុធារ៉ា ។ គ្រួសាររបស់ប្អូនប្រុសគាត់ប្រកបអាជីវកម្មបើកផ្ទះសំណាក់ឈ្មោះ សុបិនល្អ ដែលនៅជាប់របងជាមួយគ្នា ។
ស្ត្រីខាងលើបានរៀបរាប់នូវប្រវត្តិទំនាស់ថា ក្នុងដីភូមិរបស់គាត់មានដើមខ្នុរមួយដើមវាទទួលបានផលពីរឆ្នាំហើយ ។ ប៉ុន្តែនៅដីភូមិរបស់ប្អូនគាត់មានដាំផ្កាមួយទ្រើង (ផ្កាឡើងទ្រើង) ហើយផ្កានោះបានបោះមែកមកតោងលើដើមខ្នុររបស់គាត់បណ្តាលអោយរកកល និងងាប់ដើម ។
ពេលឃើញបែបនេះគាត់បានប្រាប់ទៅប្អូនប្រុសរបស់គាត់ថា ៖«ប្អូនអើយផ្ការបស់ប្អូន វាបានតោងពេញមកលើដើមខ្នុរបងរកកល និងងាប់ហើយ» ពេលនោះប្អូនប្រុសបានប្រាប់ថា ៖ «បើចឹងបងលះមែកផ្កានោះចេញទៅដើម្បីអោយដើមខ្នុរបានរស់» ។ ប៉ុន្តែក្រោយមកគាត់មិនទាន់បានលះមែកផ្កានោះផង ស្រាប់តែដើមខ្នុររបស់គាត់បានងាប់ទៅហើយ ។ បន្ទាប់មកគាត់បានកាប់ដើមខ្នុររបស់គាត់ចេញតែម្តង ។
នៅពេលកាប់នោះធម្មតាដើមផ្កាតោងលើដើមខ្នុរបានចាក់ស្រេះជាប់ទៅជាមួយគាត់ក៏ប្រើកណ្តៀវតូចផ្តាច់ចេញពីគ្នាត្រឹមព្រំរបងរបស់គាត់តែប៉ុណ្ណោះ ។ ស្រាប់តែនៅថ្ងៃទី១២ ខែសីហា ឆ្នាំ២០១៨ រូបគាត់ត្រូវបានព្រះរាជអាជ្ញាអមសាលាដំបូងខេត្តកោះហៅរូបគាត់អោយចូលបំភ្លឺ តាមបណ្តឹងរបស់ប្អូនថ្លៃស្រីឈ្មោះ អ៊ីម សុធារ៉ា ដោយចោទប្រកាន់ពីបទ «បំផ្លិចបំផ្លាញទ្រព្យសម្បត្តិ អ្នកដទៃដោយចេតនា» ។
រូបគាត់មិនចង់បានអ្វីនោះទេហើយក៏គ្មានលទ្ធភាពតតាំងក្តីនេះដែរមានតែលើកម្រាមដៃដប់សំពះដល់ឯកឧត្តម អភិបាលខេត្ត តុលាការអមសាលា ដំបូងខេត្ត ពិសេសសម្តេចតេជោ ហ៊ុន សែន សូមមេត្តាជួយរកយុត្តិធម៌ជូនគ្រួសារគាត់ផង ។
ជុំវិញបញ្ហានេះអ្នកសារព័ត៌មាន កោះសន្តិភាព បានទំនាក់ទំនងម្ចាស់ផ្ទះសំណាក់សុបិនល្អគឺស្ត្រីឈ្មោះ អ៊ីម សុធារ៉ា ដែលជាប្អូនថ្លៃស្រី និងជាដើមបណ្តឹងបានបំភ្លឺតាមទូរស័ព្ទថា ៖«រឿងគាត់ប្ដឹងទៅតុលាការដោយសារស្ត្រីជាបងថ្លៃបានប្រើកណ្ដៀវលូកកាត់ដើមផ្កាចូលមកក្នុងរបងផ្ទះរបស់គាត់ដែលគាត់ខំដាំ៣-៤ឆ្នាំទំហំប៉ុនមេជើងទៅហើយ» ។ ស្ត្រីខាងលើបានបញ្ជាក់ថាបើត្រឹមតែលះមែកក៏មិនបញ្ហាដែរ តែនេះគាត់បានប្រើកណ្តៀវដងវែងលូកចូលមកកាត់ដល់ក្នុងផ្ទះរបស់គាត់ទៀត ។
ទោះយ៉ាងនេះក្តីស្ត្រីជាបងថ្លៃ និងជាចុងចម្លើយគាត់បានបដិសេធថា គាត់មិនបានប្រើកណ្តៀវ លូកកាត់ចូលដល់ដីភូមិរបស់គេឡើយគឺគ្រាន់តែកាប់ផ្តាច់ដើមផ្កាអោយដាច់ពីគ្នាត្រឹមដីភូមិរបស់គាត់ប៉ុណ្ណោះ ម្យ៉ាងវិញទៀតកណ្តៀវគាត់ប្រើគ្រាន់តែជាកណ្តៀវតូចមួយរៀងដូចកាំបិតគ្មានក្រង៉ុកដូចកណ្តៀវ ផ្លែធំដែលអាចថ្ពក់ទាញបានពីចម្ងាយឡើយ ៕
ចែករំលែកព័តមាននេះ