ខេត្តបន្ទាយមានជ័យ ៖ ស្ត្រីជាម្តាយចុងចិត្តអប្រិយម្នាក់ បានត្រូវនគរបាលការិយាល័យប្រឆាំងការជួញដូរមនុស្សនិងការពារអនីតិជនខេត្ត ឃាត់ខ្លួនពាក់ព័ន្ធនឹងករណីធ្វើទារុណកម្មលើកូនស្រីដើមអាយុ៥ឆ្នាំស្ទើរស្លាប់ នៅក្នុងព្រៃមួយក្បែរផ្សាររុងក្លឿ ស្រុកអារញ្ញ ខេត្តស្រះកែវ ប្រទេសថៃ ខណៈឪពុករវល់ទៅអូសរទេះ។…
ខេត្តបន្ទាយមានជ័យ ៖ ស្ត្រីជាម្តាយចុងចិត្តអប្រិយម្នាក់ បានត្រូវនគរបាលការិយាល័យប្រឆាំងការជួញដូរមនុស្សនិងការពារអនីតិជនខេត្ត ឃាត់ខ្លួនពាក់ព័ន្ធនឹងករណីធ្វើទារុណកម្មលើកូនស្រីដើមអាយុ៥ឆ្នាំស្ទើរស្លាប់ នៅក្នុងព្រៃមួយក្បែរផ្សាររុងក្លឿ ស្រុកអារញ្ញ ខេត្តស្រះកែវ ប្រទេសថៃ ខណៈឪពុករវល់ទៅអូសរទេះ។ ស្ត្រីជាម្តាយចុងនេះឈ្មោះ លី ស្រីនីត អាយុ១៦ឆ្នាំ ជាកម្មករអូសរទេះ ស្នាក់នៅផ្សារក្នុងរុងក្លឿ ទឹកដីថៃ និងមានទីលំនៅភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត ។ ស្ត្រីក្មេងរូបនេះ បានវាយធ្វើបាបកូនស្រីដើមឈ្មោះ ណាតស្រីម៉ី អាយុ៥ឆ្នាំ បណ្តាលឲ្យជាំមុខជាច្រើនកន្លែង មានស្នាមរបួស.ក និងហើមបបូរមាត់ ។
ជួបសម្ភាសន៍ផ្ទាល់ជាមួយស្ត្រីឈ្មោះ យូ សុភី អាយុ២៤ឆ្នាំ ដែលជាម្តាយបង្កើតក្មេងស្រីរងគ្រោះ មានទីលំនៅក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ត្រូវបានប្រាប់ថា នាងនិងកូនបានទៅស្នាក់នៅធ្វើការនៅខេត្តស្រះកែវ ។
កាលពីព្រឹកថ្ងៃទី១៦ ខែកញ្ញា ម្តាយឪពុករបស់នាងដែលធ្វើការនៅខេត្តស្រះកែវដែរ បានធ្វើដំណើមកច្រកទ្វារអន្តរជាតិប៉ោយប៉ែត-ខ្លងលឹក ដើម្បីបន្តប័ណ្ណឆ្លងដែនស្នាក់នៅបន្តលើទឹកដីថៃ ។នាងបន្តថា ឪពុកម្តាយនាងបានយកចៅ(កូនស្រីដែលរងគ្រោះ)មកជាមួយ លុះដល់ផ្សាររុងក្លឿ ជួបអតីតប្តីរបស់នាងដែលលែងលះគ្នា ឈ្មោះ សុខ ឆាយ ក៏បានសុំទុកកូនឲ្យនៅលេងជាមួយខ្លួនមួយរយៈ ។ ដឹងអី ក្រោយពីអតីតប្តី និងជាឪពុករវល់ទៅអូសរទេះ នាងប្រពន្ធចុងអប្រិយក៏បាននាំកូននាងទៅក្នុងព្រៃខាងក្រោយផ្សារឥណ្ទូចិន ក្បែរផ្សាររុងក្លឿ វាយធ្វើបាប រហូតមានស្នាមជាំពេញផ្ទៃមុខនិងជាំក ។
បញ្ហានេះ គេសង្ស័យនាងប្រពន្ធចុងប៉ុនប៉ងសម្លាប់បំបិទមាត់ តែសំណាងក្មេងស្រីនៅមានជីវិតក៏រត់ចេញពីព្រៃ ទើបត្រូវអាជីវករខ្មែរប្រទះឃើញ នាំគ្នាថតបង្ហោះតាមហ្វេសប៊ុកប្រកាសរកសាច់ញាតិ ។ បន្ទាប់មកក៏ដឹងដល់សមត្ថកិច្ចថៃធ្វើអន្តរាគមន៍ ហៅរថយន្តសង្គ្រោះដឹកក្មេងស្រីយកទៅព្យាបាលនៅមន្ទីរពេទ្យក្នុងស្រុកអារញ្ញ។ ចំណែកជីដូនក្មេងស្រីឈ្មោះ ស៊ី សុផា អាយុ៤៨ឆ្នាំ និយាយថា នារសៀលថ្ងៃទី១៦ ខែកញ្ញា គាត់ទទួលទូរស័ព្ទពីអតីតកូនប្រសាឈ្មោះ សុខ ឆាយ ដែលជាឪពុកថាបាត់កូន ។ ពេលនោះរូបគាត់និងប្តី ក៏បានប្តឹងទៅសមត្ថកិច្ចថៃឲ្យជួយស្វែងរក និងក្រោយមកត្រូវបានសន្តិសុខផ្សាររុងក្លឿប្រាប់ថា មានក្មេងស្រីម្នាក់ត្រូវបានដឹកទៅសង្គ្រោះនៅមន្ទីរពេទ្យ លុះគាត់និងប្តីទៅមើលក៏ដឹងថា ក្មេងស្រីរងគ្រោះនោះគឺជាចៅរបស់គាត់ ។
លោកវរសេនីយ៍ត្រី ំអោក សំណុក នាយរងការិយាល័យប្រឆាំងការជួញដូរមនុស្សនិងការពារអនីតិជនខេត្ត ថ្លែងថា បន្ទាប់ពីឃើញក្មេងស្រីរងគ្រោះត្រូវបានគេបង្ហោះស្វែងរកសាច់ញាតិ និងដឹងថាត្រូវស្ត្រីក្មេងជាម្តាយចុងធ្វើទារុណកម្ម លោកក៏ទទួលបញ្ជាពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត ក៏ដូចជានាយការិយាល័យ ចុះស្រាវជ្រាវដោយសហការជាមួយអង្គការដៃគូ រហូតបានជួបគ្រួសាររងគ្រោះនិងក្មេងស្រីរងគ្រោះសាកសួររកមូលហេតុ ។លោកនាយរងការិយាល័យបន្តថា ស្ត្រីជាម្តាយចុង ក្រោយពីសួរនាំបានសារភាពថា នាងពិតជាបានធ្វើទារុណកម្មលើក្មេងស្រីខាងលើប្រាកដមែន ។
ស្ត្រីរូបនេះរៀបរាប់ថា ដោយមានជម្លោះក្នុងគ្រួសារផង គាប់ជួនប្តីយកកូនដើមមកលេង ផង ឆ្លៀតឱកាសប្តីមិននៅនាងខឹងក៏នាំក្មេងស្រីខាងលើទៅក្នុងព្រៃខាងក្រោយផ្សាររុងក្លឿ វាយធ្វើបាប និងយកស្មៅញ៉ុកមាត់កុំឲ្យស្រែកឮដល់គេ ។ ជាមួយនេះ បានច្របាច់កនិងទះមាត់ជាច្រើនដៃរហូតដួលសន្លប់ ក៏ទុកក្មេងស្រីនោះចោលនៅកន្លែងកើតហេតុ ។ លុះពេលប្តីវិលត្រឡប់ពីអូសរទេះវិញ នាងបានព្យាយាមកុហកថាបាត់កូនស្រីហើយ និងធ្វើជានាំប្តីដើររកកូនទៀតផង ។
ទីបំផុត ស្រី្តចិត្តឃោរឃៅរូបនេះអស់លក្ខណ៍ត្រូវបែកការណ៍ ដោយសារបណ្តាញសង្គមហ្វេសប៊ុកគេបង្ហោះព្រោងព្រាត ។ ពេលនោះនាងបានគេចពីផ្សាររុងក្លឿទៅភូមិព្រៃព្រិច សង្កាត់ប៉ោយប៉ែត និងត្រូវសមត្ថកិច្ចហៅមកសាកសួរ និងឃាត់ខ្លួននៅព្រឹកថ្ងៃទី១៨ ខែកញ្ញា ។ លោកវរសេនីយ៍ត្រី អោក សំណុក បញ្ជាក់ថា ស្ត្រីក្មេងជាម្តាយចុងរូបនេះ ត្រូវបានឃាត់ខ្លួនតាមបទបញ្ជារបស់លោកព្រះរាជអាជ្ញាអមសាលាដំបូងខេត្ត និងបានបញ្ជូនពីក្រុងប៉ោយប៉ែត ទៅស្នងការដ្ឋាននគរបាលខេត្តដើម្បីចាត់ការតាមនីតិវិធី ៕
ចែករំលែកព័តមាននេះ