រាជធានីភ្នំពេញ ៖ ជនបន្លំជាសង្ឃចំនួន៥នាក់ ដែលដើរបិណ្ឌបាត្រតាមទីសារធារណៈ និងជាពិសេសទៀតបិណ្ឌបាតតាមផ្សារនោះ ត្រូវបានកម្លាំងអាជ្ញាធរខណ្ឌដូនពេញឃាត់ខ្លួន និងចាប់ផ្សឹកកាលពីថ្ងៃទី១៨ ខែកញ្ញា ឆ្នាំ២០១៨ ។
លោកគឹម វុត្ថា ប្រធានប្រជាការពារខណ្ឌដូនពេញបានឲ្យដឹងថា បន្ទាប់ពីមានសេចក្តីរាយការណ៍ពីប្រជាពលរដ្ឋនៅក្នុងមូលដ្ឋានខណ្ឌដូនពេញថា មានព្រះសង្ឃចំនួន៥អង្គ បានដើរបិណ្ឌបាត្រនៅតាមទីសាធារណៈ និងជាពិសេសទៀត បានចូលបិណ្ឌបាតនៅតាមផ្សារទើបកម្លាំងប្រជាការពារខណ្ឌដូនពេញ បានចាប់បញ្ជូនទៅផ្សឹកនៅវត្តបទុមវតីរួចរាល់ហើយ ទើបបញ្ជូនទៅអប់រំនៅសាលាខណ្ឌដូនពេញឲ្យឈប់ប្រព្រឹត្តដូច្នេះតទៅទៀត ទើបអនុញ្ញាតឲ្យវិលត្រឡប់ទៅផ្ទះសម្បែងដោយមិនចាត់ការតាមនីតិវិធីនោះទេ ។
ជនបន្លំជាសង្ឃដែលត្រូវចាប់ផ្សិកចំនួន៥នាក់ខាងលើនេះរួមមាន ១-ឈ្មោះ រដ្ឋ ឈុន ភេទប្រុស អាយុ២០ឆ្នាំ មានទីកន្លែងកំណើតនៅភូមិក្បាលដំរី ឃុំរោលលើ ស្រុកជីក្រែង ខេត្តសៀមរាប បួសនៅវត្តសាលព្រឹក ស្រុកគងពិសី ខេត្តកំពង់ស្ពឺ ២-ឈ្មោះ ហឿង ហន ភេទប្រុសអាយុ២២ឆ្នាំ មានស្រុកកំណើតនៅភូមិត្បែង ឃុំត្បែង ស្រុកបន្ទាយស្រី ខេត្តសៀមរាប បួសនៅវត្តនិគ្រោធល័ក្ខ (ជ្រៃហូរព្នៅ) ស្រុកគងពិសី ខេត្តកំពង់ស្ពឺ
៣-ឈ្មោះ វណ្ណ វាសនា ភេទប្រុស អាយុ២៨ឆ្នាំ ស្នាក់នៅភូមិឆ្កែកូន ឃុំជាខ្លាង ស្រុកស្វាយអន្ទរ ខេត្តព្រៃវែង បួសនៅវត្តនិគ្រោធល័ក្ខ(ជ្រៃហូរព្នៅ) ស្រុកគងពិសី ខេត្តកំពង់ស្ពឺ ៤-ឈ្មោះ ផាត តុលា ភេទប្រុស អាយុ២០ឆ្នាំ ស្នាក់នៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប បួសវត្តនិគ្រោធល័ក្ខ(ជ្រៃហូរព្នៅ) ស្រុកគងពិសី ខេត្តកំពង់ស្ពឺ និង៥-ឈ្មោះ គឺម លីម៉ន ភេទប្រុស អាយុ១៨ឆ្នាំ ស្នាក់នៅដំបូកខ្ពស់ ឃុំដំបូកខ្ពស់ ស្រុកអង្គរជ័យ ខេត្តកំពត បួសនៅវត្តនិគ្រោធល័ក្ខ(ជ្រៃហូរព្នៅ) ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ