រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បានអះអាងថា សម្រាប់អាណត្តិថ្មីនេះសម្តេចនឹងខិតខំប្រឹងប្រែងទ្វេដងក្នុងការផ្តល់សេវាសាធារណៈជូនដល់ពលរដ្ឋ ។ ការប្រកាសជំហររបស់ប្រមុខរាជរដ្ឋាភិបាលបែបនេះ…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បានអះអាងថា សម្រាប់អាណត្តិថ្មីនេះសម្តេចនឹងខិតខំប្រឹងប្រែងទ្វេដងក្នុងការផ្តល់សេវាសាធារណៈជូនដល់ពលរដ្ឋ ។
ការប្រកាសជំហររបស់ប្រមុខរាជរដ្ឋាភិបាលបែបនេះ បន្ទាប់ពីប្រជាពលរដ្ឋមួយចំនួនបានផ្ញើសារពីក្តីលំបាករបស់ពួកគាត់ចូលទៅកាន់ផេកហ្វេសប៊ុករបស់សម្តេចដោយផ្ទាល់ ។ ជាងនេះទៀត ការប្រកាសនេះស្របពេលដែលក្បាលម៉ាស៊ីនរាជរដ្ឋាភិបាលនិងរដ្ឋសភា ត្រូវបានរៀបចំជាស្ថាពរ ។
សម្តេចតេជោ ហ៊ុន សែន បានសរសេរលើបណ្តាញសង្គមផ្លូវការរបស់សម្តេច នៅថ្ងៃទី១៨ ខែកញ្ញាថា «អរគុណបងប្អូនប្រជាពលរដ្ឋ និងកូនក្មួយទាំងក្នុងនិងក្រៅប្រទេស ដែលបានផ្ញើសារមកកាន់ខ្ញុំក្នុងហ្វេសប៊ុក ដែលមានសារខ្លះជាសារជូនពរ និងសារខ្លះអំពីសុខទុក្ខផ្ទាល់របស់បងប្អូនកូនក្មួយ ។ ទំនាក់ទំនងជាប្រចាំរបស់បងប្អូននិងកូនក្មួយ គឺបានបង្ហាញច្បាស់ពីមនោសញ្ចេតនា និងការគោរពស្រឡាញ់ដ៏ជ្រាលជ្រៅបំផុត ដែលបានលើកទឹកចិត្តដល់ខ្ញុំ» ។សម្តេចតេជោបានគូសបញ្ជាក់ថា «ពិតណាស់ សេចក្តីសុខរបស់បងប្អូន គឺជាសុខទុក្ខផ្ទាល់របស់ខ្ញុំ ។ នៅក្នុងអាណត្តិនៃរាជរដ្ឋាភិបាលថ្មី(២០១៨-២០២៣) គឺយើងនឹងខិតខំប្រឹង ប្រែងទ្វេដងក្នុងការផ្តល់ជូននូវសេវាសាធារណៈដល់បងប្អូនប្រជាពលរដ្ឋឲ្យបានកាន់តែឆាប់ រហ័ស និងមាន
ប្រសិទ្ធភាពខ្លាំងជាងមុន» ។
សូមជម្រាបថា ការសន្យារបស់សម្តេចតេជោ ហ៊ុនសែន គឺបន្ទាប់ពីការបោះឆ្នោតជ្រើសតាំងតំណាងរាស្ត្រនីតិកាលទី៦ មានតែគណបក្សប្រជាជនកម្ពុជាមួយគត់ទទួលបានការគាំទ្រពីប្រជាពលរដ្ឋរហូតទទួលបានអាសនៈក្នុងសភាទាំង១២៥ ក្នុងចំណោមគណបក្សចំនួន២០ដែលចូលរួម។ ការតាមសង្កេត ទោះបីជាប្រមុខរាជរដ្ឋាភិបាលបានប្រកាស និងប្តេជ្ញាចិត្តក្នុងការអភិវឌ្ឍប្រទេស ក៏ដូចជាផ្តល់សេវាជូនប្រជាពលរដ្ឋយ៉ាងណាក្តី ក៏គេឃើញមានមន្ត្រីមួយចំនួននៅតាមមូលដ្ឋាន មិនសូវអើពើឬយកចិត្តទុកដាក់ចំពោះពលរដ្ឋ ដូចការណែនាំរបស់សម្តេចតេជោនោះទេ ក្នុងនោះមានដូចជាសេវានៅមន្ទីរពេទ្យរដ្ឋ ការជួសជុលផ្លូវ ស្អាន ជាដើម ៕
ចែករំលែកព័តមាននេះ