រាជធានីភ្នំពេញ ៖ ទីបំផុត រឿងអាស្រូវស្នេហ៍របស់ចៅអធិការវត្តកំពង់ក្ដុល ដែលលួចលាក់មានស្រីស្នេហ៍ ថែមទាំងបង្កើតបានកូនស្រីម្នាក់ ព្រមទាំងសេពគ្រឿងញៀនផងនោះ បានក្លាយជាការពិតដូចអ្វីដែល
ពុទ្ធបរិស័ទចោទប្រកាន់ ។
ពេលនេះចៅអធិការវត្តអង្គនោះ ត្រូវបានអ្នកកស្រុកតាមទាន់ ខណៈពេលកំពុងតឺនុយស៊ីវិលស្អាតបាតជិះម៉ូតូជាមួយស្រីស្នេហ៍ ចេញពីផ្ទះត្រឡប់ទៅវត្តវិញ នាវេលាទៀបភ្លឺ ក្រោយពេលដេករួមមេត្រីជាមួយគ្នាស្ទើរពេញ១យប់រួចមក ។
អ្នកភូមិនិយាយថា ពេលឃាត់ខ្លួនបានប្រគល់ជូនអាជ្ញាធរសង្កាត់ និងព្រះអនុគណខណ្ឌដង្កោផ្សឹករួចរាល់ ក៏បន្តប្រគល់ជូននគរបាលខណ្ឌដង្កោ ចាត់ការតាមច្បាប់ ។
ដោយឡែក នគរបាលខណ្ឌដង្កោបានបញ្ជាក់ថា ចៅអធិការអង្គនោះ ពិតជាបានស្លៀកពាក់បន្លំជាគ្រហស្ថ ចេញក្រៅវត្តពិតមែន ប៉ុន្តែមិនបានជិះម៉ូតូជាមួយស្រីទេគឺលោកដើរ ព្រោះផ្ទះរបស់ស្រីស្នេហ៍រូបនោះ ស្ថិតនៅចម្ងាយពីវត្តប្រមាណ១ពាន់ម៉ែត្រប៉ុណ្ណោះ ។ លុះពេលដើរត្រឡប់មកវិញ ក៏ត្រូវបានអ្នកភូមិចាប់ខ្លួនតែម្ដង កាលពីវេលាម៉ោង៣រំលងអធ្រាត្រឈានចូលថ្ងៃទី១៨ កញ្ញា នៅក្នុងភូមិខ្វិត សង្កាត់សាក់សំពៅ ខណ្ឌដង្កោ ។
ចៅអធិការខាងលើ នាម មាជ សុវណ្ណ អាយុប្រហែលជាង៣០ឆ្នាំ បានលួចលាក់មានស្នេហាជាមួយស្រី្តម្នាក់រហូតមានកូនស្រីម្នាក់ អាយុ២ឆ្នាំ ពេលនេះ ត្រូវបានផ្សឹកនឹងបណ្តេញចេញពីវត្ត នៅវេលាព្រឹកថ្ងៃទី១៨ កញ្ញា នៅក្នុងវត្ដស្លែង ដែលជាវត្តព្រះអនុគណខណ្ឌ នៅសង្កាត់ពងទឹក ខណ្ឌដង្កោ ។
អ្នកភូមិបាននិយាយថា ចៅអធិការវត្តកំពង់ក្ដុលរូបនេះ បានលួចមានស្នេហាលួចលាក់ជាមួយស្ត្រីម្នាក់
នៅក្នុងភូមិខ្វិត អស់រយៈពេលជាច្រើនឆ្នាំកន្លងមកហើយ រហូតបានកូនស្រីម្នាក់ ។ តាមការចោទប្រកាន់ថា បានសេពគ្រឿងញៀនថែមទៀតផង ដែលកន្លងមក ពួកគាត់ជាពុទ្ធបរិស័ទចំណុះជើងវត្ត បានដឹងរឿងទាំងអស់ ។
មិនតែប៉ុណ្ណោះ បានស្នើសុំឲ្យមានការចាប់ផ្សឹកច្រើនដងហើយដែរ ប៉ុន្តែមិនបានជោគជ័យ ព្រោះគ្មានភស្តុតាងគ្រប់គ្រាន់ ដែលអាចចោទប្រកាន់ ។ ជាក់ស្ដែង កាលពីវេលាម៉ោង៣ និង៣០នាទីរសៀលថ្ងៃទី៣១ សីហា ឆ្នាំ២០១៨កន្លងទៅ ពួកគាត់បានធ្វើការរប្រមូលផ្តុំគ្នាតវ៉ា និងបណ្ដេញសង្ឃអង្គនេះ ចេញពីវត្តម្ដងរួចមកហើយដែរ បន្ទាប់ពីបានឃើញវីដេអូសង្ឃខាងលើ ប្រឡែងគ្នាជាមួយកូនស្រីម្នាក់ ប៉ុន្តែពេលនោះមិនបានសម្រេចឡើយ ដោយខាងព្រះអនុគណខណ្ឌបាន យកសំណុំរឿងទៅធ្វើការស៊ើបអង្កេតសិនទើបសម្រេចជាក្រោយក៏ស្ងាត់វិញទៅ ។
ប្រភពដដែលបានបន្តទៀតថា ដោយសារតែគ្មានចំណាត់ការ ទើបពួកគាត់សម្រេចធ្វើការតាមដានចៅអធិការវត្តអង្គនេះដោយខ្លួនឯង រហូតដល់ពេលកើតហេតុ បានប្រទះឃើញចៅអធិការនេះស្លៀកពាក់ជាគ្រហស្ថ ជិះម៉ូតូ១គ្រឿងជាមួយស្រីស្នេហ៍ចេញពីផ្ទះរបស់នាង នៅភូមិខ្វិតឆ្ពោះមកកាន់វត្តកំពង់ក្ដុលវិញ ទើបឃាត់ខ្លួនប្រគល់ជូនអាជ្ញាធរសង្កាត់ និងព្រះអនុគណខណ្ឌធ្វើការផ្សឹកចាកសិក្ខាបទ និងបណ្ដេញចេញពីវត្តតែម្ដង ។
ចំណែកនគរបាលខណ្ឌដង្កោបាននិយាយថា ចៅអធិការអង្គនោះ ពិតជាបានប្រព្រឹត្តកំហុសបែបនឹងមែន ដោយនៅវេលាម៉ោង៨យប់ថ្ងៃទី១៧ កញ្ញា បានដោះស្បង់ចីវរស្លៀកពាក់បន្លំជាគ្រហស្ថ រួចបានដើេចេញពីក្នុងវត្ត ឆ្ពោះទៅជួបស្រីស្នេហ៍ដល់ផ្ទះ នៅក្នុងភូមិខ្វិត សង្កាត់សាក់សំពៅ ។
បន្ទាប់ពីដេកនៅផ្ទះស្រីស្នេហ៍ស្ទើរពេញមួយយប់មិនដឹងធ្វើអីខ្លះទេ រហូតដល់វេលាម៉ោង៣រំលងអធ្រាត្រឈានចូលថ្ងៃទី១៨ កញ្ញា ទើបចាកចេញត្រឡប់មកវត្តវិញ ហើយក៏ត្រូវបានអ្នកស្រុកចាប់ខ្លួនតែម្តង ។ បន្ទាប់មកត្រូវបានបញ្ជូនទៅកាន់វត្តព្រះអនុគណខណ្ឌដង្កោ គឺវត្តស្លែងហើយត្រូវបានគណៈសង្ឃចាប់ផ្សឹករួចរាល់ហើយ ទើបបាននាំទៅកាន់អធិការដ្ឋានខណ្ឌដង្កោដើម្បីចាត់ការតាមច្បាប់ ។ តាមរយៈការពិនិត្យទឹកនោមអតីតសង្ឃអង្គនេះ មានសារធាតុញៀននៅក្នុងខ្លួនប្រាកដមែន ។
ពិតជាមានរឿងអាស្រូវប៉ះពាល់ដល់កិត្តិយសធ្ងន់ធ្ងរណាស់ ក្នុងនាមជាគ្រូចៅអធិការវត្តមួយអង្គមិនគប្បីឈ្លក់វង្វេងបែបនេះទេ ។ គេថា បើចង់បានប្រពន្ធ តើបួសធ្វើអ្វី? ឬមួយក៏មានគំនិត បន្លំសន្សំលុយងាយៗក្នុងនាមជាស្រែបុណ្យ។ សកម្មភាពបែបនេះ ធ្លាក់នរកទាំងរស់មែន ទីបំផុតរឿងអាស្រូវកេរ្តិ៍នេះ គេចមិនផុតឡើយ ៕
ចែករំលែកព័តមាននេះ