ខេត្តពោធិ៍សាត់ ៖ សិស្សសាលាចំនួន៣នាក់ស្លាប់ ៤នាក់របួសធ្ងន់ និង៨នាក់ទៀតរបួសស្រាល ដោយសាររថយន្តបុក។ គ្រោះថ្នាក់ចរាចរណ៍នេះកើតឡើងនៅលើផ្លូវជាតិលេខ៥ ត្រង់ចំណុចស្ថានីយប្រេងឥន្ធនៈ ស្ថិតក្នុងភូមិឈើទាលខ្ពស់ ឃុំក្បាលត្រាច ស្រុកក្រគរ ខេត្តពោធិ៍សាត់ កាលពីវេលាម៉ោង១០និង៣០នាទីព្រឹក ថ្ងៃទី១៩ មីនា។ រថយន្តបង្កគ្រោះថ្នាក់ម៉ាកហ៊ីយ៉ាន់ដាយ កង់៦ ពណ៌ទឹកប៊ិចចាស់ ពាក់ស្លាកលេខបណ្តោះអាសន្ន ៨០៤៥ បើកបរដោយឈ្មោះម៉ៅ ម៉ាក ភេទប្រុស អាយុ២១ឆ្នាំ មានទីលំនៅក្នុងភូមិសំបូរ ឃុំព្រៃឃ្នាស ស្រុកមេសាង ខេត្តព្រៃវែង។
អ្នកឃើញហេតុការណ៍និយាយថា រថយន្តនោះធ្វើដំណើរទៅលិចក្នុងល្បឿនលឿន ហើយបានវ៉ារថយន្តទួរីសមួយគ្រឿង ប៉ុន្តែដោយសារមានរថយន្តនៅពីមុខមិនអាចវ៉ាបានក៏ងាកចង្កូតមកស្តាំវិញជ្រុលទៅបុករះហ្វូងសិស្សសាលាពីក្រោយដែលខ្លះកំពុងជិះកង់ ខ្លះកំពុងដើរអែបលើចិញ្ចឹមថ្នល់តែម្តង។ ក្រោយកើតហេតុអ្នកបើកបររថយន្តត្រូវសមត្ថកិច្ចឃាត់ខ្លួន។
លោកង៉ាន វ៉ាន់នី មន្ត្រីប៉ូលិសចរាចរផ្លូវគោកខេត្តឱ្យដឹងថា គ្រោះថ្នាក់ចរាចរណ៍នេះបណ្តាលឱ្យស្លាប់មនុស្ស៣នាក់ របួសធ្ងន់៤នាក់ របួសស្រាល៨នាក់ ក្នុងនោះស្រី៦នាក់ និងខូចកង់១២គ្រឿង។ អ្នកស្លាប់ ១-ឈ្មោះនួន ចិន្តា ភេទប្រុស អាយុ១៥ឆ្នាំ រស់នៅភូមិសំរោង (ស្លាប់នៅនឹងកន្លែង), ២-ឈ្មោះហ៊ុន ពុទ្រា ភេទប្រុស អាយុ២០ឆ្នាំ រស់នៅភូមិកំពង់លើ (ស្លាប់នៅមន្ទីរពេទ្យ) និង៣-ឈ្មោះអន ធីតា ភេទស្រី អាយុ១៦ឆ្នាំ រស់នៅភូមិផ្សារ ឃុំអន្លង់ត្នោត (ស្លាប់នៅមន្ទីរពេទ្យ)។ សិស្សរងគ្រោះទាំងអស់សុទ្ធតែរៀននៅអនុវិទ្យាល័យសីហនុវរ្មន័ក្រគរ។
អ្នកបើកបរឈ្មោះម៉ៅ ម៉ាក ប្រាប់ថា គេទើបតែចេះបើកបររយៈពេល៣ខែប៉ុណ្ណោះ។ នៅថ្ងៃនោះគេយកម៉ាស៊ីនភ្លើងមួយគ្រឿងទៅឱ្យក្រុមហ៊ុនចិនកសាងវារីអគ្គិសនី ហើយពេលត្រឡប់មកវិញ ដោយគេងងុយដេកខ្លាំងពេក ធ្វើឱ្យងោកមួយភាំង លុះងើបវិញវាក់នឹងរថយន្តទួរីសខាងមុខក៏កាច់ចង្កូតទៅស្តាំបុករះសិស្សសាលាតែម្តង។ រថយន្ត កង់ និងអ្នកបើកបរត្រូវបានរក្សាទុកនៅការិយាល័យនគរបាលចរាចរផ្លូវគោកនៃស្នងការដ្ឋានខេត្ត ដើម្បីដោះស្រាយតាមច្បាប់៕
ចែករំលែកព័តមាននេះ