ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើង នៅវេលាម៉ោង១១ និង១០នាទីព្រឹក ថ្ងៃទី១៨ ខែកញ្ញា ឆ្នាំ២០១៨ ដោយសារតែរថយន្តដឹកត្រីមួយគ្រឿងបានបើកក្នុងល្បឿនយ៉ាងលឿនរួចជ្រុលទៅបុកចូលផ្ទះអ្នកលក់ដូរមួយកន្លែង បណ្តាលឲ្យកុមារាម្នាក់បានរងរបួសធ្ងន់…
ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើង នៅវេលាម៉ោង១១ និង១០នាទីព្រឹក ថ្ងៃទី១៨ ខែកញ្ញា ឆ្នាំ២០១៨ ដោយសារតែរថយន្តដឹកត្រីមួយគ្រឿងបានបើកក្នុងល្បឿនយ៉ាងលឿនរួចជ្រុលទៅបុកចូលផ្ទះអ្នកលក់ដូរមួយកន្លែង បណ្តាលឲ្យកុមារាម្នាក់បានរងរបួសធ្ងន់ និងអ្នកបើកបរម៉ូតូម្នាក់ទៀតរបួសស្រាល។ ហេតុការណ៍នេះបានកើតឡើង នៅលើកំណាត់ផ្លូវជាតិលេខ៥ ត្រុងចំណុចដំរីស ស្ថិតក្នុង ភូមិភូមិទួលខ្សាច់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។ សមត្ថកិច្ចនគរបាល ក្រុងកំពង់ឆ្នាំង បានទៅពិនិត្យ និងធ្វើការវាស់វែងដល់កន្លែងកើតហេតុបានឲ្យដឹងថា៖ រថយន្តបង្ករគ្រោះថ្នាក់ខាងលើនេះ ពាក់ស្លាកលេខ ភ្នំពេញ 2AL-8591 បើកបរដោយបុរសមិនស្គាល់ឈ្មោះ។ ចំណែកម្ចាស់ផ្ទះរងគ្រោះមានឈ្មោះ ចែ ប៉ុក អាយុ៤៥ឆ្នាំ។
ប្រភពដដែលបានបន្តថា នៅមុនពេលកើតហេតុ រថយន្តបង្កខាងលើ បានបើកដឹកត្រីពីទិសខាងជើងទៅត្បូងគឺឆ្ពោះទៅក្រុងភ្នំពេញក្នុងល្បឿនយ៉ាងលឿន។ លុះពេលបើកមកដល់ចំណុចកើតហេតុជាផ្លូវបែកជា៤ រថយន្តបានគេចពីម៉ូតូមួយគ្រឿង ម៉ាកដុងដាឌ្រីម ពាក់ស្លាកលេខ 1D-1869 បើកបរដោយឈ្មោះ កុយ ថាន់ អាយុ៥៩ឆ្នាំ ភេទប្រុស រស់នៅក្នុងភូមិទួលខ្សាច់ បានឆ្លងកាត់ពីលិចទៅកើត ផ្លូវបែកជា៤ ក៏ត្រូវរថយន្តកៀរដួល ហើយរថយន្តក៏បានជ្រុលចង្កូតបុកធ្លាយចូលដល់ក្នុងផ្ទះអ្នកលក់ដូរ នៅខាងឆ្វេងដៃ បណ្តាលកៀបជាប់រថយន្តនឹងប្រឡោះទ្វារផ្ទះតែម្តង។
ក្នុងហេតុការខាងលើបង្កឲ្យកុមារាឈ្មោះ អឿន ចំរ៉ុង អាយុ១២ឆ្នាំ នៅក្នុងផ្ទះបានរងរបួសធ្ងន់ ចំណែកបុរសអ្នកបើកម៉ូតូឈ្មោះ កុយ ថាន់ បានរងរបួសស្រាល។ ជនរងគ្រោះទាំងពីរនាក់ ត្រូវបានក្រុមគ្រួសារដឹកបញ្ជូនទៅសង្គ្រោះនៅមន្ទីរពេទ្យខេត្ត។ ចំណែកអ្នកបើកបររថយន្ត ក្រោយពេលកើតហេតុ បានចុះរត់គេចខ្លួនបាត់ទុករថយន្តចោលនៅកន្លែងកើតហេតុ។ ដោយឡែកផ្ទះរបស់ចែប៉ុក បានរងការខូចខាតយ៉ាងដំណំ ជាមួយនឹងទំនិញជាច្រើនក៏បានរងការខូចខាតផងដែរ។
ករណីនេះសមត្ថកិច្ចបានធ្វើការវាស់វែងតាមនីតិវិធី និងបានអូសយករថយន្ត ទៅរក្សាទុកនៅក្នុងអធិការដ្ឋាននគរបាលស្រុករលាប្អៀរ ដើម្បីរង់ចាំការដោះស្រាយតាមផ្លូវច្បាប់។ ករណីគ្រោះថ្នាក់នេះ ត្រូវបានសមត្ថកិច្ចនិយាយថា មកពីរថយន្តបើកលឿនពេកលើសល្បឿនកំណត់នៅក្នុងក្រុង ពេលជួបឧបសគ្គជាន់ហ្វ្រាំងមិនជាប់ព្រោះតែដឹងធ្ងន់លើសចំណុះ។ ចំណែកអ្នកជិះម៉ូតូឆ្លងថ្នល់ក៏មិនបានប្រុងប្រយ័ត្ន ទើបកើតមានគ្រោះថ្នាក់ចរាចរណ៍បែបនេះ៕
ចែករំលែកព័តមាននេះ