រាជធានីភ្នំពេញ ៖ ជនសង្ស័យជួញដូរ និងប្រើប្រាស់គ្រឿងញៀនចំនួន២នាក់ត្រូវបានកម្លាំងនគរបាលប៉ុស្តិ៍ស្វាយប៉ាកឃាត់ខ្លួនជាបន្តបន្ទាប់ កាលពីព្រឹកថ្ងៃទី១៨ ខែកញ្ញា ឆ្នាំ ២០១៨ និងបានដកហូតថ្នាំញៀនប្រភេទម៉ាទឹកកកចំនួន៥៤កញ្ចប់ ព្រមទាំងដាវចំនួនមួយដើម។
ជនសង្ស័យទាំង២នាក់ខាងលើដែលត្រូវឃាត់ខ្លួន ម្នាក់ឈ្មោះ ឌឹន យ៉ាំងហ្សើ ភេទប្រុស អាយុ១៨ឆ្នាំ ជាជនជាតិវៀតណាម មានមុខរបរនិងទីលំនៅមិនពិតប្រាកដ ចំណែកម្នាក់ទៀតឈ្មោះមាន រិត ភេទប្រុសអាយុ៣២ឆ្នាំ ជាជនជាតិខ្មែរ ជាអ្នកជួញដូរថ្នាំញៀន ស្នាក់នៅផ្ទះជួលក្នុងភូមិស្វាយប៉ាក សង្កាត់ស្វាយប៉ាក ។
តាមរបាយការណ៍បឋមរបស់នគរបាលប៉ុស្តិ៍បានឱ្យដឹងថា ដោយមានការស្រាវជ្រាវ សមត្ថកិច្ច នគរបាលក៏
បានឃាត់ខ្លួនជនសង្ស័យម្នាក់ឈ្មោះ ឌឹន យ៉ាំងហ្សើ កាលពីវេលាម៉ោង៨នឹង៣០នាទីព្រឹកថ្ងៃទី១៨ ខែកញ្ញា នៅចំណុចក្រុមទី៧ ភូមិលូ សង្កាត់ស្វាយប៉ាក ខណ្ឌឫស្សីកែវដោយដកហូតបានថ្នាំញៀនចំនួន២កញ្ចប់ ។
តាមព័ត៌មានអោយដឹងទៀតថា បន្ទាប់ពីឃាត់ខ្លួន ជនសង្ស័យម្នាក់នោះក៍បានសារភាពថា ថ្នាំញៀននោះខ្លួនបានទិញពីជនសង្ស័យម្នាក់ ហើយសមត្ថកិច្ចក៏បន្តស្រាវជ្រាវឈានទៅឃាត់ខ្លួនបានជនសង្ស័យម្នាក់ទៀតឈ្មោះមាន រិត នៅវេលាម៉ោងប្រមាណ១០និង៣០នាទីព្រឹកថ្ងៃដដែលនៅចំណុចផ្ទះជួលក្នុងភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ដោយដកហូតបានថ្នាំញៀនចំនួន៥២កញ្ចប់ និងដាវកែច្នៃចំនួន ១ ។
តាមប្រភពពីនគរបាលបានអោយដឹងទៀតថា ជនសង្ស័យជាមុខសញ្ញាជួញដូរ និងប្រើប្រាស់គ្រឿងញៀនយ៉ាងសកម្មនៅក្នុងមូលដ្ឋាន បន្ទាប់ពីឃាត់ខ្លួន ជនសង្ស័យទាំង២នាក់រួមទាំងថ្នាំញៀនចំនួន៥៤កញ្ចប់ត្រូវបាននគរបាលបញ្ជូនទៅកាន់អធិការដ្ឋានខណ្ឌឬស្សីកែវ ដើម្បីសាកសួរ និងចាត់ការតាមច្បាប់៕
ចែករំលែកព័តមាននេះ