ខេត្តកំពង់ធំ ៖ ត្រឹមតែមួយប៉ប្រិចភ្នែកផ្ទះ១ខ្នងត្រូវអគ្គីភ័យលេបត្របាក់សល់តែគ្រោងឆ្អឹងបានបង្កឲ្យមានការភ្ញាក់ផ្អើលមួយកាលពីព្រឹកថ្ងៃទី១៧ ខែកញ្ញា ឆ្នាំ២០១៨ ស្ថិតនៅក្នុងភូមិព្រៃក្តី ឃុំតាំងក្រសៅ ស្រុកប្រាសាទសំបូរ ។
តាមប្រភពពីសមត្ថកិច្ចបានឲ្យដឹងថា ម្ចាស់ផ្ទះរងគ្រោះឈ្មោះ ថា ផាត ភេទប្រុស អាយុ៤១ឆ្នាំ មានប្រពន្ធឈ្មោះ មឿន ច្រិប អាយុ៣៤ឆ្នាំ រស់នៅភូមិកើតហេតុខាងលើ ។ ផ្ទះរបស់ជនរងគ្រោះដែលត្រូវអគ្គីភ័យឆាបឆេះនៅសល់តែគ្រោងឆ្អឹងខាងលើមានទំហំ ៦ម៉ែត្រ x ៧ម៉ែត្រ ធ្វើអំពីឈើប្រក់ក្បឿង រួមជាមួយមាសប្រាក់មួយចំនួន និងសម្ភារប្រើប្រាស់ជាច្រើនត្រូវបានអគ្គីភ័យត្របាក់យកអស់គ្មានសល់ ។
សមត្ថកិច្ចបញ្ជាក់ថា ករណីអគ្គីភ័យឆេះផ្ទះខាងលើគឺបណ្តាលមកពីទុស្សេខ្សែភ្លើងក្រោយពេលឆេះរួចនៅរសៀលថ្ងៃដដែលគេសង្កេតឃើញវត្តមានលោក អ៊ុត វណ្ណរ៉ា អភិបាស្រុកប្រាសាទសំបូរ និងសហការីនៃអនុសាខាកាកបាទក្រហមស្រុក ព្រមទាំងមន្ត្រីក្រោមឱវាទបាននាំយកនូវគ្រឿងឧបភោគ បរិភោគ សម្ភារជាមួយនឹងថវិការមួយចំនួនចុះទៅសួរសុខទុក្ខប្រជាពលរដ្ឋដែលរងគ្រោះខាងលើ និងបានលើកទឹកចិត្តដល់ជនរងគ្រោះ សូមឲ្យខិតខំតស៊ូរកស៊ីតទៅទៀត កុំអស់សង្ឃឹមឲ្យសោះ ឆេះតែផ្ទះម៉ែនពិតតែជីវិតនៅត្រូវតែតស៊ូ ៕
ចែករំលែកព័តមាននេះ