ទីក្រុងវ៉ាស៊ីនតោន ៖ យោងតាមសារព័ត៌មានអាមេរិកបានឲ្យដឹងថា លោកប្រធានាធិបតីដូណាល់ ត្រាំ (Donald Trump) បានសម្រេចចិត្តថានឹងដាក់ពន្ធលើផលិតផលនាំចូលពីប្រទេសចិនប្រមាណ២០០ប៊ីលានដុល្លារទៀត ហើយអាចនឹងប្រកាសពីការសម្រេចចិត្តនេះនៅប៉ុន្មានថ្ងៃខាងមុខ ។…
ទីក្រុងវ៉ាស៊ីនតោន ៖ យោងតាមសារព័ត៌មានអាមេរិកបានឲ្យដឹងថា លោកប្រធានាធិបតីដូណាល់ ត្រាំ (Donald Trump) បានសម្រេចចិត្តថានឹងដាក់ពន្ធលើផលិតផលនាំចូលពីប្រទេសចិនប្រមាណ២០០ប៊ីលានដុល្លារទៀត ហើយអាចនឹងប្រកាសពីការសម្រេចចិត្តនេះនៅប៉ុន្មានថ្ងៃខាងមុខ ។
សារព័ត៌មានខាងលើបានឲ្យដឹងថា ពន្ធនឹងមានកម្រិត១០%។ គួរបញ្ជាក់ដែរថា លោកប្រធានាធិបតីត្រាំបានដាក់ពន្ធ២៥%លើដែកថែប និង១០%លើអាលុយមីញ៉ូម រួមទាំង២៥%ទៀតលើផលិតផលចិនប្រមាណ៥០ប៊ីលានដុល្លាររួចទៅហើយ ។
អ្នកនាំពាក្យរបស់ White House លោកស្រី Lindsay Walters បាននិយាយថា ៖« លោកប្រធានាធិបតីបានឲ្យដឹងច្បាស់ហើយថាលោកនិងរដ្ឋាភិបាលរបស់លោក នឹងបន្តចេញសកម្មភាពដើម្បីដោះស្រាយបញ្ហាការធ្វើពាណិជ្ជកម្មមិនយុត្តិធម៌របស់ប្រទេសចិន ។
ពួកយើងកំពុងជំរុញដល់ប្រទេសចិនឲ្យដោះស្រាយបញ្ហាដែលបានលើកឡើងនេះ »។
ក្រសួងការបរទេសចិនបាននិយាយកាលពីថ្ងៃព្រហស្បតិ៍ថា សហរដ្ឋអាមេរិកបានអញ្ជើញពួកគេឲ្យចូលរួមការចរចា ។ បេសកជនមកពីប្រទេសទាំងពីរបានជួបគ្នាលើកចុងក្រោយនៅថ្ងៃទី ២២ខែសីហានៅរដ្ឋធានីវ៉ាស៊ីនតោន ។
ប្រទេសចិនបានច្រានចេញរាល់ការដាក់សម្ពាធពីសហរដ្ឋអាមេរិកឲ្យដកផែនការដែលឲ្យរដ្ឋាភិបាលអភិវឌ្ឍន៍នៅវិស័យមនុស្សយន្ត, Artificial Intelligence និងវិស័យដទៃទៀត ។
សហរដ្ឋអាមេរិក, អឺរ៉ុប និងដៃគូពាណិជ្ជកម្មដទៃ បាននិយាយថា គម្រោងទាំងនោះល្មើសនឹងការប្តេជ្ញារបស់ប្រទេសចិនក្នុងការបើកទូលាយទីផ្សារ ។ មន្ត្រីអាមេរិកក៏ព្រួយថា គម្រោងនេះអាចប៉ះពាល់ដល់សហរដ្ឋអាមេរិកដែលជាប្រទេសនាំមុខផ្នែកឧស្សាហកម្ម ។
អ្នកព្យាករណ៍បានព្រមានថា ការធ្ងន់ធ្ងរឡើងនៃជម្លោះរវាងសេដ្ឋកិច្ចធំជាងគេទាំងពីរលើពិភពលោកនេះ អាចនឹងកាត់បន្ថយការលូតលាស់សេដ្ឋកិច្ចពិភពលោកប្រមាណ០,៥% រហូតដល់ឆ្នាំ២០២០ ប្រសិនបើពន្ធដែលបានគំរាមនេះពិតជាត្រូវបានអនុម័តមែន។
គួរបញ្ជាក់ថា កាលពីថ្ងៃទី១២ កញ្ញា កន្លងមក រដ្ឋាភិបាលរបស់លោកប្រធានាធិបតីដូណាល់ ត្រាំ បានអញ្ជើញមន្ត្រីចិនឲ្យចាប់ផ្តើមការចរចាលើពាណិជ្ជកម្មសាជាថ្មីម្តងទៀត ខណៈដែលសហរដ្ឋអាមេរិកត្រៀមដាក់ពន្ធលើផលិតផលចិនប្រមាណ២០០ប៊ីលានដុល្លារ ។
លោក Larry Kudlow ប្រធានក្រុមប្រឹក្សាសេដ្ឋកិច្ចរបស់White House បានប្រាប់ថា រដ្ឋមន្ត្រីក្រសួងរតនាគារអាមេរិក លោក Steven Mnuchin បានផ្ញើលិខិតអញ្ជើញដល់មន្ត្រីថ្នាក់ខ្ពស់ក្នុងប្រទេសចិន ប៉ុន្តែមិនបានផ្តល់ព័ត៌មានលម្អិតទៀតទេ ។
លោក Kudlow បាននិយាយថា ៖« មានការពិភាក្សា និងព័ត៌មានមួយចំនួនដែលពួកយើងបានទទួលពីរដ្ឋាភិបាលចិនថា មន្ត្រីថ្នាក់ខ្ពស់នៃរដ្ឋាភិបាលចិនចង់បន្តការចរចា។ ដូច្នេះ រដ្ឋមន្ត្រី Mnuchin ដែលជាប្រធានក្រុមជាមួយនឹងប្រទេសចិនបានចេញលិខិតអញ្ជើញ »។
មកដល់ពេលនេះ សហរដ្ឋអាមេរិកនិងប្រទេសចិនបានដាក់ពន្ធលើផលិតផលនាំចូលគ្នាប្រមាណ៥០ប៊ីលានដុល្លារទៅហើយ ព្រោះតែជម្លោះដែលសហរដ្ឋអាមេរិកទាមទារឲ្យប្រទេសចិនកែទម្រង់គោលនយោបាយសេដ្ឋកិច្ច ។
លោកប្រធានាធិបតីត្រាំ បាននិយាយថា ក្រៅពីពន្ធលើផលិតផលចិនប្រមាណ២០០ប៊ីលានដុល្លារហើយ លោកអាចដាក់ពន្ធលើផលិតផលចិនប្រមាណ២៦៧ប៊ីលានដុល្លារបន្ថែមទៀតក្នុងរយៈពេលខ្លី ប្រសិនបើលោកចង់ ៕
ចែករំលែកព័តមាននេះ