ខេត្តកំពង់ស្ពឺ ៖ ថ្វីត្បិតតែកើតមកក្នុងគ្រួសារកសិករក្រីក្រក៏យុវជនម្នាក់នេះមិនរួញរានឹងការងារនោះឡើយ គឺគាត់បានខិតខំតស៊ូជំនះរាល់ឧបសគ្គរហូតទទួលបានជោគជ័យយ៉ាងត្រចះត្រចង់ គួរឲ្យកត់សម្គាល់ ។ ពេលនេះមិនត្រឹមតែធ្វើឲ្យគាត់មានមោទនភាពចំពោះខ្លួនឯង និងក្រុមគ្រួសារប៉ុណ្ណោះទេ សូម្បីតែមហាជននៅទូទាំងប្រទេសក៏កោតសរសើស្ញប់ស្ញែងអំពីការខិតខំ និងការលះបង់ពេលវេលារបស់គាត់ដែរ ដែលការងារនោះ គឺជាការបង្កើតឲ្យមានស្នាដៃសូនរូបរបស់លោកវេជ្ជបណ្ឌិតបេអារិចន័តតែម្តង ។
ជួបជាមួយអ្នកយកព័ត៌មានកោះសន្តិភាពបុរសម្នាក់ដែលមហាជនបានស្គាល់គាត់តាមរយៈការសូនរូបបានប្រាប់ថា«គាត់ឈ្មោះ កាម៉ង់ដង់ អាយុ៤១ឆ្នាំ មានស្រុកកំណើតនៅឃុំជ្រៃលាស់ ស្រុកពញ្ញាលឺ ខេត្តកណ្តាល លោកមានបងប្អូន៣នាក់ ប្រុសម្នាក់ ស្លាប់ម្នាក់ ហើយសព្វថ្ងៃបងប្រុសម្នាក់រស់នៅសហរដ្ឋអាមេរិកឯណោះ ។ រាល់ថ្ងៃលោករស់នៅភូមិត្រពាំងព្រលឹត ឃុំជ្រៃលាស់ ស្រុកពញ្ញាលឺ ខេត្តកណ្តាល ស្ថានភាពគ្រួសា គឺលោកមានកូន៤នាក់(ប្រុស១ ស្រី៣) កូន២នាក់ ទើបតែជាប់បាក់ឌុបកាលពីពេលកន្លងទៅថ្មីៗនេះ កូនៗគ្មាននរណាម្នាក់បានដុង និងជំនាញដូចគាត់ឡើយ ។
លោកបានប្រាប់ថា គាត់មិនបានចូលសាលារៀនពីជំនាញនេះទេ តែដោយសារតែចាប់យករបរជាជាងចម្លាក់ កសាងព្រះវិហារ និងចេតិយនានាច្រើនកន្លែង នៅទូទាំងប្រទេស ទើបធ្វើឲ្យគាត់អាចយល់ដឹង និងចេះពីវិធីសូនរូបនេះ និយាយរួមតាំងពីចាប់យកអាជីពនេះមក គឺរយៈពេល២០ឆ្នាំមកហើយ ។ នៅពេលដែលដើរធ្វើសំណង់ជាមួយបងប្រុស (បច្ចុប្បន្នរស់នៅអាមេរិក) ដោយសារចិត្តស្រលាញ់ពីវិស័យនេះ ធ្វើឲ្យលោករិតតែត្រងត្រាប់ស្តាប់ការពន្យល់ណែនាំពីបងប្រុសរហូតអាចក្លាយខ្លួនជាអ្នកសូនរូបម្នាក់ដែលមហាជនទូទៅទទួលស្គាល់ពីស្នាដៃរបស់គាត់ ។
លោកាម៉ង់ដង់បានប្រាប់ទៀតថា«អ្វីដែលធ្វើឲ្យមហាជនចាប់អារម្មណ៍មកលើរូបលោកនោះ គឺដំបូងឡើយលោកបានសូនរូបរបស់លោក កែម ឡី ដែលរូបនោះក្រុមគ្រួសាររបស់គាត់យកទៅទុកនៅផ្ទះម្តាយគាត់នៅតាកែវ ។ នៅពេលថ្មីៗនេះទៀត បន្ទាប់ពីដឹងដំណឹងថា លោកវេជ្ជបណ្ឌិតបេអាតរិចន័រស្ថាបនិកមន្ទីរពេទ្យគន្ឋបុប្ផា បានទទួលមរណភាព រូបលោកក៏ចាប់ផ្តើមសូនរូបរបស់លោកវេជ្ជបណ្ឌិតតែម្តង ។ ការសូនរូបនេះឡើង គឺប្រើពេល៨ម៉ោង ទើបលេចចេញរូបរាងឡើងលោកបានបញ្ជាក់ថា ក្នុងការសូនរូបរហូតដល់រៀបពុម្ពចាក់ជាស្ពាន់ គឺបានការជួយជ្រោមជ្រែមពីសំណាក់មនុស្ស២នាក់នោះ គឺលោក តាន់ គឺមសួរ និងលោកអាចារ្យធំ ។
លោកកាម៉ង់ដង់បានបញ្ជាក់ពីគោលបំណងរបស់លោកថា ដោយមើលឃើញពីតថភាពជាក់ស្តែងនាពេលបច្ចុប្បន្នពីសន្ទុះ នៃការសោកស្តាយរូបលោកវេជ្ជបណ្ឌិតពីសំណាក់មហាជនទូទាំងប្រទេសអំពីមរណភាពរបស់គាត់ ដែលជាអ្នកលះបង់ដ៏ធំធេងសម្រាប់កម្ពុជា ជាពិសេសគឺកុមារតែម្តង» ។ ការធ្វើរូបសំណាកនេះឡើង ដើម្បីទុកជានិមិត្តរូបសម្រាប់កូនខ្មែរជំនាន់ក្រោយឲ្យកាន់តែបានយល់ និងកាន់តែចងចាំនូវអំពើល្អរបស់លោកវេជ្ជបណ្ឌិតបេអាតរិចន័រ ។ ព្រោះថា សម្រាប់កុមារគាត់ គឺជាអ្នកលះបង់ដ៏ធំធេងបំផុត ។
លោកកាម៉ង់ដង់បានសំដែងពីអារម្មណ៍ពិតរបស់លោកថា« នៅពេលដែលដឹងថា លោកវេជ្ជបណ្ឌិតទទួលមរណភាព គឺលោកមានការសោកស្តាយ និងក្តុកក្តួលយ៉ាងក្រៃលែង ម្យ៉ាងដោយមើលឃើញពីសន្ទុះនៃការសោកស្តាយរបស់មហាជនទៀតផងនោះ លោកកាន់តែមានអារម្មណ៍ថា ការបាត់បង់រូបលោកវេជ្ជបណ្ឌិតបេអាតរិចន័រនាពេលនេះ គឺជាការបាត់បង់ទេវតាដែលសង្គ្រោះកុមារកម្ពុជារាប់លាននាក់នាពេលកន្លង»។ «គាត់ជាវីរបុរសរបស់កុមារកម្ពុជា» ។ កត្តាទាំងនេះហើយដែលបណ្តាលឲ្យចិត្តរបស់លោកមានកម្លាំងក្នុងការសូនរូបធ្វើពុម្ភ ដើម្បីចាក់រូបលោកវេជ្ជបណ្ឌិតឡើង ។ រហូតមកដល់ពេលនេះ១៧ កញ្ញា ២០១៨ លោកបានបកពុម្ភបណ្តើរៗហើយ រួចនឹងបន្តចាក់ស្ពាន់បន្តទៀតនិយាយដល់ការចាក់ស្ពាន់នេះ លោកបានបញ្ជាក់ថា មិនឲ្យលើសពី១០ថ្ងៃឡើយ គឺតាមស្ថានភាពជាក់ស្តែង ក្នុងអំឡុងពេលនេះមិនយូរឡើយនឹងលេចចេញរូបសំណាកលោកវេជ្ជបណ្ឌិតបេអាតរិចន័រពីស្ពាន់ជាក់ជាមិនខានឡើយ ។ តាមការពិតលោកចង់ធ្វើរូបសំណាក់លោកវេជ្ជបណ្ឌិតជាបន្តបន្ទាប់ ដើម្បីយកទៅតម្កល់ទុកនៅតាមមន្ទីរពេទ្យគន្ឋបុប្ផាមិនថា នៅសៀមរាប ឬរាជធានីភ្នំពេញនោះទេ ។
លោកបានបញ្ជាក់ផងដែរថា«ការដែលលោកលើកឡើងខាងលើ គឺគ្រាន់តែចង់ឲ្យមានសប្បុរសជនជួយជាសម្ភារ ដើម្បីការសូនរូបនេះបានសម្រេចជោគជ័យជាបន្តទៀត ដោយលោកជាអ្នកចេញកម្លាំង ម្យ៉ាងជៀសវាងកុំឲ្យមជ្ឈដ្ឋានមហាជនមានការយល់ច្រឡំវាយប្រហារមកលើរូបខ្ញុំថា កេងចំណេញជាប្រយោជន៍ផ្ទាល់ខ្លួន» និយាយរួមបើមានអ្នកចេញសម្ភារលោកចេញកម្លាំងក្នុងការធ្វើជាការស្រេច ។
ចំពោះម្លាក់ដែលលោកបានសាងឡើងភាគច្រើនធ្វើពីស្ពាន់មានដូចជា រូបសំណាក់សម្តេចជួន ណាត ព្រះបាទជ័យវរ្ម័នទី៧ រូបបដិមាសមណគោត្តម និងរូបសំណាកផ្សេងៗជាច្រើនអង្គទៀត ។ ការធ្វើនេះតែលោកធ្វើតែម្នាក់ឯងប៉ុណ្ណោះ ។ បើនិយាយពីការលះបង់វិញ គឺលោកលះបង់ទាំងកម្លាំងកាយចិត្តក៏ព្រោះតែចង់ឲ្យមនុស្សជំបាន់ក្រោយបានដឹង និងស្គាល់ពីគំរូវីរភាព របស់លោកវេជ្ជបណ្ឌិតដែលលោកបានលះបង់ទ្រព្យសម្បត្តិផ្ទាល់ខ្លួនជួយដល់កុមារកម្ពុជារូបនេះ ៕
ចែករំលែកព័តមាននេះ