អប់រំចិត្តឱ្យស្ងប់រម្ងាប់តាមរយៈធ្វើវិបស្សនាភាវនា គឺជាការអប់រំផ្លូវចិត្តដ៏ពិសេសមួយសម្រាប់ដុតកម្លោចនូវបាបធម៌ និងកិលេសផ្សេងៗ ឱ្យរីងស្ងួត រហូតដាច់ស្រឡះ លែងត្រឡប់មកវិញ ព្រោះការបានសម្រេចនូវអរិយមគ្គជាលោកុត្តរ លែងអាឡោះស្រណោះអ្វីៗជារបស់លោកិយទៀតហើយ។ នេះ ជាសេចក្តីស្ងប់ដោយអំណាចវិបស្សនាភាវនា។ ឯវិបស្សនានេះទៀតសោតមិនមែនធ្វើបានតែអ្នកកាន់សីល៥ សីល៨នោះទេ គឺអាចធ្វើបានទាំងអស់គ្នាឱ្យតែមានចិត្តចង់ ។
តាមពិតទៅសេចក្តីស្ងប់ចិត្ត ស្ងប់អារម្មណ៍នេះ ជាគុណជាតិដែលចាំបាច់ដ៏ក្រៃលែង សម្រាប់ជីវិតប្រចាំថ្ងៃណាស់ ពោលគឺធ្វើឱ្យយើងស្ងប់ចាកកិលេសដែលជាហេតុនៃសេចក្តីខ្វល់ខ្វាយ និងការជំពាក់វាក់វិនក្នុងវត្ថុដទៃៗទៀត ។
បើយើងទាំងអស់គ្នាជួយរម្ងាប់នូវកិលេសក្នុងសន្តានរបស់ខ្លួនឯងឱ្យបានគ្រប់ៗគ្នា ពិភពលោកយើងនេះនឹងបានសុខស្ងប់ត្រជាក់ជាងសព្វថ្ងៃ រាប់រយរាប់ពាន់ដង ព្រោះកិលេសដែលមាននៅខាងក្នុងសន្តាននៃមនុស្សយើងម្នាក់ៗនោះឯង បានប្លែងឫទ្ធិចេញមកទម្លាយគ្នានិងគ្នាឱ្យក្តៅក្រហាយ ក្រវល់ក្រវាយជានិច្ច ។
ព្រោះហេតុនោះបានជាលោកពោលថា ការជួយគ្នារក្សានូវសេចក្តីស្ងប់ក្នុងចិត្តរៀងៗខ្លួន គឺជាការជួយដល់ពិភពលោក ជួយដល់សង្គមដ៏ធំ ជួយដល់អង្គភាព ស្ថាប័ន ជួយដល់ការងារដទៃៗទៀតឱ្យបានមាំមួន និងគង់វង្សឋិតថេរលូតលាស់ទៅមុនជារៀងរហូត ។
ចែករំលែកព័តមាននេះ