រាជធានីភ្នំពេញ ៖ ស្ថិតលើកំណាត់ផ្លូវជាតិលេខ៤ ត្រូវបានបិទដោយក្រុមកម្មករ-កម្មការិនីអស់រយៈពេលជិត៥ម៉ោង បង្កឱ្យមានការកកស្ទះយ៉ាងខ្លាំងលើផ្លូវដ៏មមារញឹកនេះ កាលពីព្រឹកថ្ងៃទី១៧ កញ្ញា ។ ការឈានដល់បាតុភាពលើកគ្នាបិទផ្លូវតវ៉ា ព្រោះជាង១ខែមកហើយ ដែលកម្មករ-កម្មការិនីរោងចក្រកាត់ដេរជីមលីច្រើនរយនាក់ ធ្លាប់បានផ្ទុះការតវ៉ាទាមទាររកប្រាក់ឈ្នួល ប្រាក់បំណាច់ និងប្រាក់អត្ថប្រយោជន៍ផ្សេងៗ បន្ទាប់ពីរោងចក្រខាងលើបានប្ដូរស្លាកយីហោ និងដូរថៅកែថ្មី ឯថៅកែចាស់បានវេចបង្វិចរត់ទៅស្រុក
បាត់ ។ ប៉ុន្តែការតវ៉ាជាង១ខែមុននេះនៅតែគ្មានដំណោះស្រាយឡើយ ដែលជាហេតុធ្វើឲ្យក្រុមកម្មករ មានការពុះកញ្ជ្រោលកាន់តែខ្លាំងឡើងៗ រហូតឈានដល់លើកគ្នាបិទផ្លូវជាតិលេខ៤ ដើម្បីស្វែងរកដំណោះស្រាយឱ្យបានឆាប់ ។
ក្រុមកម្មករបានបិទផ្លូវជាតិលេខ៤ នៅវេលាម៉ោង៨ព្រឹកថ្ងៃទី១៧ កញ្ញា នៅចំណុចមុខរោងចក្រកាត់ដេរយីហោជីមលី ដែលពេលនេះបានប្ដូរទៅជារោងចក្រជីជីវិញ និងមានទីតាំងស្ថិតនៅទល់មុខបញ្ជាការដ្ឋានកងទ័ពជើងគោកក្នុងភូមិត្រពាំងទួល សង្កាត់កំបូល ខណ្ឌពោធិ៍សែនជ័យ ។ កម្មករបាននិយាយថា ពួកគាត់ធ្វើការតវ៉ានេះគឺដើម្បីទាមទារសុំឲ្យមានការដោះស្រាយប្រាក់ឈ្នួលនិងប្រាក់អត្ថប្រយោជន៍ផ្សេងៗ ដែលពួកគាត់ត្រូវទទួលបានទៅតាមច្បាប់ការងារ បន្ទាប់ពីរោងចក្រមួយនេះផ្លាស់ប្ដូរថៅកែថ្មី និងស្លាកយីហោថ្មី ។
តាមច្បាប់ការងារ គឺមុននឹងរោងចក្រសម្រេចប្ដូរស្លាកយីហោ ឬប្ដូរថៅកែគ្រប់គ្រងថ្មីត្រូវតែទូទាត់ប្រាក់ឈ្នួល ឬប្រាក់អត្ថប្រយោជន៍ និងប្រាក់បំណាច់ផ្សេងៗជូនកម្មករឲ្យបានរួចរាល់ជាមុនសិន ទើបអាចប្ដូរបាន ។ បុ៉ន្តែចំពោះរោងចក្រមួយនេះមិនដូច្នោះទេ បានផ្លាស់ប្ដូរទាំងស្លាកយីហោនិងថៅកែថ្មី ហើយថៅកែចាស់បានគេចខ្លួនបាត់ដោយមិនអនុវត្តន៍តាមច្បាប់ការងារឡើយ ទើបកម្មករធ្វើការតវ៉ាបែបនេះឱ្យដឹងដៃម្តង ។
កម្មករបានបន្តថា រយៈពេលជាង១ខែមកហើយ ដែលពួកគាត់ធ្វើការតវ៉ានេះ កន្លងមកពួកគាត់ធ្វើតែនៅមុខរោងចក្រតែប៉ុណ្ណោះ ហើយនៅព្រឹកថ្ងៃទី៧ កញ្ញា ពួកគាត់បានលើកគ្នាចាកចេញពីរោងចក្រ ឆ្ពោះទៅតវ៉ានៅមុខសភា តែក្បួនរបស់កម្មករត្រូវបានរារាំងដោយសមត្ថកិច្ចច្រើនដំណាក់កាល ទីបំផុតក៏បានទៅធ្វើការដោះស្រាយនៅក្រសួងការងារ ។ ប៉ុន្តែនៅតែមិនមានដំណោះស្រាយទៀត ទើបការតវ៉ាបានអូសបន្លាយពេលកាន់តែវែងរហូតមកដល់ពេលនេះ ទើបលើកគ្នាបិទផ្លូវជាតិលេខ៤ ក្នុងបំណងពន្លឿនការដោះស្រាយឲ្យបានឆាប់ ។
ដោយសារតែកម្មករបានយកផ្លូវជាតិលេខ៤ ធ្វើជាចំណាប់ខ្មាំងអស់រយៈពេលជាច្រើនម៉ោង បង្កឲ្យមានការកកស្ទះចរាចរណ៍យ៉ាងខ្លាំង ដោយយានយន្តគ្រប់ប្រភេទរាប់រយគ្រឿងបានជាប់គាំងទៅមុខក៏មិនរួច ថយក្រោយក៏មិនរួចបន្តកន្ទុយគ្នារាប់គីឡូម៉ែត្រ ។ បន្ទាប់ពីផ្ទុះបាតុភាពបិទផ្លូវ គណៈកម្មការចម្រុះ១ក្រុម រួមមានខាងមន្ត្រីក្រសួងការងារដឹកនាំដោយលោក ប្រាក់ ចាន់ធឿន អគ្គលេខាធិការដ្ឋាននៃគណៈកម្មការសម្រាប់ដោះស្រាយបញ្ហាកូដកម្មបាតុកម្ម ។
មន្ត្រីដោះស្រាយវិវាទនៃមន្ទីរការងាររាជធានីភ្នំពេញ ដឹកនាំដោយលោក ហុង ណារ៉េត អាជ្ញាធរខណ្ឌពោធិ៍សែនជ័យ ដឹកនាំដោយលោក អភិបាលរង ឃឹម ស៊ុនសូដា និងនគរបាលខណ្ឌដឹកនាំដោយលោកអធិការ យឹម សារ៉ាន់ បានចុះជួបសម្របសម្រួលជាមួយកម្មករភ្លាមៗដែរ ។ មិនតែប៉ុណ្ណោះអាជ្ញាធរបានសម្រួលឲ្យយានយន្តដែលមិនទាន់ទៅដល់ត្រង់ចំណុចដែលកម្មករបិទផ្លូវនោះ ធ្វើដំណើរតាមផ្លូវវាងនានា ដូចជាផ្លូវបែកចាន វត្តស្លែងឡើងទៅតាមផ្លូវជាតិលេខ៣ ផ្លូវវត្តស្វាយផ្អែម រួមនិងផ្លូវមួយចំនួនទៀត ។
ប្រភពព័ត៌មានបានបន្តទៀតថា គណៈកម្មការខាងលើបានលួងលោមឲ្យកម្មករបើកផ្លូវឡើងវិញ ប៉ុន្តែពួកគេមិនព្រមឡើយ ទើបគណៈកម្មការបានហៅតំណាងចូលធ្វើការដោះស្រាយនៅក្នុងរោងចក្រ ។ ពេលនោះតាមរយៈការឆ្លងយោបល់លោករដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ អុិត សំហេង គណៈកម្មការបានសម្រេចចេញសេចក្ដីជូនដំណឹងមួយចែកជូនដល់កម្មករទាំងអស់ឱ្យស្ងប់ចិត្តនិងបើកផ្លូវឡើងវិញ ដែលនៅក្នុងសេចក្ដីជូនដំណឹងនោះមានខ្លឹមសារថា អគ្គលេខាធិការដ្ឋាននៃគណៈកម្មការសម្រាប់ដោះស្រាយបញ្ហាកូដកម្មបាតុកម្ម នៅតាមគ្រប់មុខសញ្ញា សូមជម្រាបជូនដំណឹងដល់បងប្អូនកម្មករនិយោជិតទាំងអស់នៃរោងចក្រជីមលី (ខាមបូឌា)ភីធីអុីជ្រាបថា យោងតាមប្រសាសន៍លោកបណ្ឌិត អុិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈបានឯកភាពជាគោលការណ៍ស្នើសុំប្រាក់បុរេប្រទាន របស់រាជរដ្ឋាភិបាល បើកជូនបងប្អូនកម្មករ និយោជិតរោងចក្រជីមលី (ខេមបូឌា)ភីធីអុី ។
អគ្គលេខាធិការដ្ឋាននៃគណៈកម្មការ សម្រាប់ដោះស្រាយបញ្ហាកូដកម្មបាតុកម្ម នៅតាមគ្រប់មុខសញ្ញា នឹងខិតខំពន្លឿន និងរៀបចំទូទាត់តាមសំណូមពររបស់បងប្អូនកម្មករ និយោជិតនូវអត្ថប្រយោជន៍ផ្សេងៗ តាមច្បាប់ស្ដីពីការងារ ។ សូមបងប្អូនកម្មករនិយោជិតទាំងអស់រក្សាភាពស្ងៀមស្ងាត់ និងត្រូវពិនិត្យប្រាក់អតីតភាពផ្ទាល់ខ្លួនម្នាក់ៗ ចៀសវាងការបាត់បង់ ដោយប្រការណាមួយ និងរង់ចាំបើកប្រាក់បុរេប្រទានរបស់រាជរដ្ឋាភិបាលតាមនិតិវិធី ។
គួរកត់សម្គាល់ផងដែរថា កម្មករបានបិទផ្លូវចាប់តាំងពីវេលាម៉ោង៨ព្រឹក រហូតដល់វេលាម៉ោង១២ថ្ងៃត្រង់ លោក យឹម សារ៉ាន់ អធិការនគរបាលខណ្ឌរួមជាមួយលោក ឃឹមស៊ុន សូដា អភិបាលរងខណ្ឌ បានយកសេចក្ដីជូនដំណឹងខាងលើទៅប្រកាសប្រាប់កម្មករ និងសុំឲ្យកម្មករយល់យោគហើយបើកផ្លូវឡើងវិញ ដោយលោកអធិការបានសន្យាថានិងដោះស្រាយបញ្ចប់ជូនកម្មករឲ្យបានមុនថ្ងៃបុណ្យភ្ជុំបិណ្ឌមិនឲ្យហួសឡើយ ។
ម្យ៉ាងទៀតលុយកាក់ដែលត្រូវដោះស្រាយមិនតិចនោះឡើយ ។ ប៉ុន្តែខណៈនោះកម្មករមិនបានយល់ព្រមទទួលយកសេចក្ដីជូនដំណឹងនោះភ្លាមៗទេនៅក្រាញននៀលរហូតដល់វេលាម៉ោង១២និង៣៥នាទីទើបព្រមបើកផ្លូវ ។ ការបើកផ្លូវនោះមួយចំណែកមិនមែនបានន័យថាពួកគាត់យល់ព្រមទេ គឺដោយសារអាកាសធាតុក្ដៅផង ឃ្លានបាយផង ម្យ៉ាងកម្មករខ្លះបានដកថយទៅរកហូបបាយហូបទឹកហើយអ្នកនៅបិទផ្លូវមានចំនួនកាន់តែតិច ក៏ទ្រាំលែងបាន ។ ម្យ៉ាងរថយន្តធុនយក្សបាននាំគ្នាបើករុលទៅមុខគ្រឿនៗរកផ្លូវដែលស្រឡះ ទើបកម្មករនាំគ្នាថយ ទើបអាចធ្វើចរាចរណ៍ឡើងវិញ ។ ប៉ុន្តែកម្មករបាននិយាយថាពួកគាត់ និងបន្តធ្វើបាតុកម្មបិទផ្លូវនៅថ្ងៃបន្ទាប់ទៀតមិនអាចឈប់ត្រឹមនេះទេ ។
ដោយឡែក អ្នកធ្វើដំណើរក្រហមមុខគ្រប់គ្នាសម្ដែងការមិនពេញចិត្តចំពោះការបិទផ្លូវរបស់កម្មករ ដែលនាំឲ្យពួកគាត់ខាតពេលវេលានិងយឺតយ៉ាវក្នុងការធ្វើដំណើរទៅបំពេញការងាររបស់ខ្លួន ។ ក្រៅពីនេះពួកគាត់បានស្ដីបន្ទោសដល់ស្ថាប័នពាក់ព័ន្ធនានាដែលដោះស្រាយបញ្ហារបស់កម្មករយឺតយ៉ាវ អូសបន្លាយពេល រហូតកម្មករបិទផ្លូវសាធារណៈបង្កការប៉ះពាល់ដល់មនុស្សរាប់ពាន់នាក់ មិនអាចធ្វើដំណើរបានទើបបើកភ្នែកធំរត់រកស្នៀតថ្មី ៕
ចែករំលែកព័តមាននេះ