រាជធានីភ្នំពេញ ៖ ជនសង្ស័យម្នាក់ត្រូវបានសមត្ថកិច្ចប៉ុស្តិ៍នគរបាលវាលស្បូវធ្វើការឃាត់ខ្លួនបន្ទាប់ពីជនសង្ស័យរូបនោះបានធ្វើសកម្មភាពគាស់ដំបូលផ្ទះលក់ទូរស័ព្ទមួយកន្លែងមិនបានសម្រេច ហេតុការណ៍ឃាត់ខ្លួននេះបានធ្វើឡើងនៅវេលាម៉ោង១២នាទី៤០នាទីរំលងអធ្រាត្រឈានចូល ថ្ងៃទី១៨ ខែកញ្ញា ឆ្នាំ២០១៨ ទៅផ្ទះលក់ទូរស័ព្ទមួយកន្លែងក្បែរនឹងប៉ុស្តិ៍នគរ
បាល និងរដ្ឋបាលវាលស្បូវ ផ្លូវជាតិលេខ១ សង្កាត់វាលស្បូវ ខណ្ឌច្បារអំពៅ ។
ជនសង្ស័យសមត្ថកិច្ចមិនទាន់អោយស្គាល់អត្តសញ្ញាណនៅឡើយទេដកហូតបានម៉ូតូ
ម៉ាកហុងដាឌ្រីម ស៊េរីឆ្នាំ២០០៨ ពណ៌ខ្មៅ កាំបិត១ ដែកកាប់មួយ ។
តាមសម្តីជនរងគ្រោះសុំមិនបញ្ចេញឈ្មោះបានអោយដឹងថា មុនពេលកើតហេតុពួកគាត់បានចូលគេងដូចសព្វដង ហើយខណៈដល់ពេលកើតហេតុពួកគាត់ក៏ស្រាប់តែឮសំលេងសំរឹបជើងនៅលើដំបូលផ្ទះដោយសារតែមានការសង្ស័យបានបើកភ្លើងរកមើល ក៏ស្រាប់តែឃើញដំបូលផ្ទះរបស់ពួកគាត់មានស្នាមរយះដូចត្រូវគេគាស់ ហើយភ្លាមៗនោះដែរពួកគាត់ក៏បានឆោឡោឡើងចេញមកក្រៅអោយសមត្ថកិច្ចកិច្ចជួយពីព្រោះផ្ទះគាត់នៅជាប់នឹងប៉ុស្តិ៍នគរបាលវាលស្បូវស្រាប់ ។
ប្រភពដដែលបានបន្តទៀតថា បន្ទាប់ពីមានការឆោឡោឡើងពួកគាត់បានប្រទះឃើញម៉ូតូមួយគ្រឿងទុកចោលនៅក្រោមដើមឈើ ដោយមិនឃើញម្ចាស់តែចៃដន្យនៅពេលដែលកំពុងតែឆោឡោស្រាប់តែបុរសជាជនសង្ស័យរូបនោះបានដើរចេញតាមផ្លូវចំហៀងប៉ុស្តិ៍មកយកម៉ូតូរបស់ខ្លួនវិញក៏ត្រូវសមត្ថកិច្ចឃាត់ និងឆែកឆេររកឃើញនូវកាំបិត និងដែកកាប់មួយ រួចហើយក៏បាននាំខ្លួនយកទៅសាកសួរនៅប៉ុស្តិ៍នគបាលវាលស្បូវដែលនៅជិតនោះតែម្តង ។
នៅចំពោះមុខសមត្ថកិច្ចជនសង្ស័យបានសារភាពថា រូបគេពិតបានប្លោះចូលឡើងលើដំបូលបំណងលួចទ្រព្យសម្បត្តិពិតប្រាកដមែន ។ ក្រោយពេលកើតហេតុបន្ទាប់ពីសាកសួរជនរងគ្រោះបានដាក់ពាក្យបណ្តឹងអោយសមត្ថកិច្ចចាត់ការតាមផ្លូវច្បាប់ ចំណែកជនសង្ស័យវិញត្រូវបានសមត្ថកិច្ចកសាងសំណុំរឿងបញ្ជូនទៅអធិការដ្ឋានខណ្ឌច្បារអំពៅដើម្បីចាត់ការបន្តតាមនីតិវិធី ៕
ចែករំលែកព័តមាននេះ