ប្រទេសវៀតណាម ៖ បើតាមអាជ្ញាធរបានរាយការណ៍ឱ្យដឹងនាថ្ងៃទី១៧ កញ្ញា ២០១៨ ថា យុវជនវៀតណាម៧នាក់ស្លាប់ ហើយ៥នាក់ទៀតសន្លប់មិនដឹងខ្លួន ក្រោយពីពួកគេ សេពគ្រឿងញៀននាឱកាសនៃការប្រគំតន្ត្រីអេឡិចត្រូនិកមួយនៅក្រុងហាណូយ។
អាជ្ញាធរប៉ុនប៉ងស្រាវជ្រាវរកថា តើសារធាតុញៀនប្រភេទណាដែលពួកគេប្រើ។ ចំណែកជនរងគ្រោះទាំងនោះកាលពីយប់ថ្ងៃទី១៦ កញ្ញា បានចូលរួមទស្សនាការប្រគំតន្ត្រី និងរាំរែកមួយមានប្រធានបទថា ដំណើរលើភពព្រះចន្ទ ដោយប្រមូលផ្ដុំមនុស្សជាច្រើនរយនាក់ក្នុងសង្កាត់មួយ។ ទោះបីការស៊ើបអង្កេតអះអាងពីទំនាក់តំនងនៃការស្លាប់របស់អ្នកទាំងនោះជាមួយការប្រើគ្រឿងញៀនក្ដី នោះជារឿងពុំធ្លាប់ជួបប្រទះក្នុងប្រទេសនេះ។ ហើយការប្រគំតន្ត្រីអេឡិចត្រូនិកត្រូវហាមឃាត់នៅក្រុងហាណូយ រហូតដល់ការស៊ើបអង្កេតចប់សព្វគ្រប់។
ការប្រើគ្រឿងញៀនសំយោគមានការកើនឡើងនៅវៀតណាម ប៉ុន្តែលួចលាក់ហើយកម្រិតត្រឹមក្នុងចំណោមយុវជនមួយក្រុមតូច។ ហើយមានអាយុពី១៨ទៅ៣០ឆ្នាំ ជនរងគ្រោះទាំងនេះពេលធ្វើតេស្តឈាមមានលទ្ធផលវិជ្ជមាននៃគ្រឿងញៀន។ ចំណែគពួកអ្នកស៊ើបអង្កេតប៉ុនប៉ងកំណត់ថា តើសារធាតុញៀនប្រភេទអ្វីដែលពួកគេប្រើ។ នេះជាការអះអាងរបស់នាយករងប៉ូលិសក្រុងហាណូយ លោក NGUYEN VAN VIEN។ លោកក៏និយាយដែរថា យើងក៏ស្រាវជ្រាវដែរថា តើពួកគេបានផឹកស្រាដែរឬយ៉ាងណា? ហើយតើនរណានាំគ្រឿងញៀនចូលមកក្នុងការប្រគំតន្ត្រីនោះ?
ការលក់សំបុត្រទស្សនាការប្រគំតន្ត្រី និងរាំរែកនោះមានចាប់ពី២១ទៅ១៣៥ដុល្លារ។ នៅវៀតណាមក៏ដូចជានៅប្រទេសអាស៊ីឯទៀតៗដែរ តន្ត្រីរាំរែកអេឡិចត្រូនិក លាយការប្រើគ្រឿងញៀនរាំងោកក្បាលរីកដុះដាលខ្លាំង ជាពិសេសនៅក្រុងហូជីមិញ ហើយរីករាលដាលដល់រដ្ឋធានីហាណូយ ដែលបារ និងក្លិបរាត្រីសន្មត់ថា បិទនាពាក់កណ្ដាលអធ្រាត្រ៕
ចែករំលែកព័តមាននេះ