រាជធានីភ្នំពេញ ៖ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីរសៀលថ្ងៃទី១៧ កញ្ញា បានបង្ហាញមុខជនសង្ស័យ១ក្រុម ពាក់ព័ន្ធករណីលួច និងឆក់ទ្រព្យសម្បត្តិប្រជាពលរដ្ឋ ក្នុងរាជធានីភ្នំពេញកន្លងមក ។ អ្វីដែលត្រូវបានកត់សម្គាល់នោះ គឺករណីលួចស្លាកលេខរថយន្ត ។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញបានឱ្យដឹងថា ១-ឈ្មោះ លី អុីឆែ ហៅឆែ ភេទប្រុស អាយុ២៨ឆ្នាំ ជាអ្នករត់ឡំប្រឺតាឥណ្ឌា(កង់៣ឥណ្ឌា) ស្នាក់នៅមិនពិតប្រាកដ ត្រូវឃាត់ខ្លួននៅចំណុចផ្លូវលេខ១០៥ កែងផ្លូវលេខ៣៦៨ សង្កាត់បឹងកេងកង៣ ខណ្ឌចំការមន ។ ជនសង្ស័យរូបនេះ ជាអ្នកធ្វើសកម្មភាពលួចដោះស្លាកលេខរថយន្ត និងទទួលទិញផលចោរកម្មក្នុងអំពើលួចនោះផង ។ ២-ឈ្មោះ ចាន់ ណាវុឌ្ឍ ហៅមី ភេទប្រុស អាយុ៣០ឆ្នាំ មុខរបរមិនពិតប្រាក ស្នាក់នៅផ្ទះលេខ២G ផ្លូវលេខ២០០២ សង្កាត់ទឹកថ្លា ខណ្ឌសែនសុខ ឃាត់ខ្លួនចំណុចផ្ទះសំណាក់ខ្លឹមចន្ទ័ ផ្លូវលេខ៤១៤ សង្កាត់ទំនប់ទឹក ខណ្ឌចំការមន ។ ៣-ឈ្មោះ បូ វីរៈ ភេទប្រុស អាយុ១៩ឆ្នាំ ជាសិស្សវិទ្យាល័យបាក់ទូក ស្នាក់នៅផ្ទះលេខ២០E០ ផ្លូវលេខ១៣៤ សង្កាត់វាលវង់ ខណ្ឌ៧មករា ឃាត់ខ្លួននៅចំណុចផ្លូវលេខ៦៧ កែងផ្លូវឌឿងហែម សង្កាត់ផ្សារថ្មី២ ខណ្ឌដូនពេញ ។ ពួកគេ២នាក់ខាងលើនេះ ជាសមាជិកក្រុមចោររបស់ឈ្មោះ លី អុីឆែ ដែលដើរលួចបានត្រូវយកមកលក់ឱ្យមេ ។
លោកវរសេនីយ៍ឯក ប៊ុន សត្យា បន្តថា ថ្មីៗនេះសមត្ថកិច្ចនគរបាលជំនាញ បានទទួលពាក្យបណ្តឹងពីម្ចាស់រថយន្តរងគ្រោះជាបន្តបន្ទាប់ស្តីពីករណីចោរលួចដោះយកស្លាកលេខហើយភាគច្រើនជារថយន្តទំនើបៗទៀតផង ។ ជាក់ស្តែង កាលពីប៉ុន្មានថ្ងៃមុននេះ ម្ចាស់រថយន្តបានបង្ហោះរូបភាពចោរជិះឡំប្រឺតាធ្វើសកម្មភាពលួចដោះយកស្លាកលេខរថយន្តដែលចតនៅមុខផ្ទះ មុខហាងមុខសណ្ឋាគារ លើដងផ្លូវសាធារណៈក្នុងរាជធានីភ្នំពេញតាមរយៈកាមេរ៉ាសុវត្ថិភាព ។
ក្រោយពីទទួលបានពាក្យបណ្តឹង និងឃើញវីដេអូឃ្លីបបង្ហោះតាមបណ្តាញសង្គមហ្វេសប៊ុកពីសកម្មភាពចោរជិះឡំប្រឺតាដើរលួចដោះស្លាកលេខរថយន្តនោះ លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី សុង លី ស្នងការរងទទួលបន្ទុកជាប្រធានការិយាល័យកណ្តាលនគរបាលព្រហ្មទណ្ឌ បានដាក់បទបញ្ជាឱ្យកម្លាំងជំនាញចុះស្រាវជ្រាវជាបន្ទាន់ ។
លុះដល់ថ្ងៃទី១៤ និងថ្ងៃទី១៥ កញ្ញា កម្លាំងជំនាញបានឈានដល់ការឃាត់ខ្លួនជនសង្ស័យ៣នាក់ខាងលើ ក្នុងបទល្មើសជាក់ស្តែង ។ ក្នុងពិធីបង្ហាញមុខក្រុមចោរលួចដោះស្លាកលេខរថយន្តលោក ប៊ុន សត្យា បន្តថាតាមចម្លើយជនសង្ស័យ ពួកគេទើបលួចដោះស្លាកលេខរថយន្តបានចំនួន៣លើក ។
លើកទី១-លួចដោះយកស្លាកលេខ២AT-៤១៣៦ ដែលបំពាក់លើរថយន្តម៉ាក TOYOTA PRIUS ពណ៌ស ស៊េរីឆ្នាំ២០០៤ ទាំងមុខនិងក្រោយ នៅចំណុចចំហៀងផ្ទះលេខ២៨៩ ផ្លូវលេខ២៦BT ភូមិត្នោតជ្រុំ៦ សង្កាត់បឹងទំពុន២ ខណ្ឌមានជ័យ កាលពីថ្ងៃទី១៣ កញ្ញា វេលាម៉ោង១១និង១០នាទីយប់ ដែលមានម្ចាស់រថយន្តឈ្មោះ កែវ ចាន់លក្ខណា ភេទស្រី អាយុ១៩ឆ្នាំ ។ ការលួចនេះ ត្រូវបានថតជាប់ដោយកាមេរ៉ាសុវត្ថិភាព ។ លើកទី២-លួចដោះយកស្លាកលេខ២AJ-៨១៥៤ ដែលបំពាក់លើរថយន្តម៉ាកTOYOTA HIGHTLENDER ពណ៌ស ស៊េរីឆ្នាំ២០០៨ ទាំងមុខនិងក្រោយ នៅចំណុចចំហៀងផ្ទះលេខ៩០៦ ផ្លូវលេខ២៦BT ភូមិត្នោតជ្រុំ៦ សង្កាត់បឹងទំពុន២ ខណ្ឌមានជ័យ កាលពីថ្ងៃទី១៣ កញ្ញា វេលាម៉ោង១១និង១០នាទីព្រឹក ដែលមានម្ចាស់រថយន្តឈ្មោះ ថន ប្រុស ភេទប្រុស អាយុ៣២ឆ្នាំ ។ លើកទី៣-លួចដោះយកស្លាកលេខ២AS-២៨១៨ ដែលបំពាក់លើរថយន្តម៉ាកTOYOTA LEXUS RX៣៣០ ពណ៌ស ស៊េរីឆ្នាំ២០០៤ ទាំងមុខនិងក្រោយ នៅចំណុចផ្ទះលេខ២៧៨E០ ផ្លូវលេខ១២៨ ភូមិ៤ សង្កាត់មិត្តភាព ខណ្ឌ៧មករា កាលពីថ្ងៃទី១២ កញ្ញា វេលាម៉ោង១២និង១៥នាទីយប់ ដែលម្ចាស់រថយន្តឈ្មោះ ថៃ មួយហួង ភេទស្រី អាយុ២៣ឆ្នាំ ។
ខាងលើនេះគ្រាន់តែជាចម្លើយបឋមរបស់ជនសង្ស័យប៉ុណ្ណោះ និងនៅមានវត្ថុតាង ដែលសមត្ថកិច្ចចាប់យកបានមួយចំនួនទៀតដូចជា ម៉ូតូរ៉ឺម៉ក១គ្រឿង កូនសោសម្រាប់ដោះខ្ចៅលេខ៨ ចំនួន២,លេខ១០ ចំនួន២,លេខ១១ ចំនួន១ និងលេខ១២ ចំនួន១ដើម,សោខ្សៀលេខ៨ ចំនួន១,លេខ១០ ចំនួន១,លេខ១២ ចំនួន១ និងលេខ១៤ ចំនួន១ដើម,ម៉ាឡេតចំនួន១ដើម,កូនកន្ត្រៃកាត់ដែកចំនួន១,កូនសោអក្សរតេ(T)គ្មានលេខចំនួន១ដើម,ដែកសម្រាប់ឆ្កឹះសោម៉ូតូ រាងសំប៉ែតចំនួន៥ដើម,ដែកសំប៉ែតចុងស្រួចជាឧបករណ៍សម្រាប់កាច់បំបែកសោ.កម៉ូតូចំនួន១ដើម ។ ឧបករណ៍សម្រាប់ប្រើប្រាស់គ្រឿងញៀនមួយចំនួន មានដែកកេះចំនួន៣,ថង់តូចសម្រាប់ដាក់សារធាតុញៀនចំនួន៧ថង់ ។
ភស្តុតាងដែលចាប់យកបានមាន ៖
១-ស្លាកលេខភ្នំពេញ២AP-៩០០៦ ចំនួន១បន្ទះ ។
២-ស្លាកលេខភ្នំពេញ២AM-២៣៩៨ ចំនួន១បន្ទះ ។
៣-ស្លាកលេខភ្នំពេញ២AX-២២២៧ ចំនួន១បន្ទះ ។
៤-ស្លាកលេខភ្នំពេញ២AM-២០៥៤ ចំនួន១បន្ទះ ។
៥-ស្លាកលេខភ្នំពេញ២AS-២៨៨១ ចំនួន២បន្ទះ ជារបស់ឈ្មោះ ថៃ មួយហួង ។
ក្រោយបង្ហាញមុខជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី ។ ជាមួយនោះផងដែរ លោក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានអំពាវនាវបេីបងប្អូនណា ដែលបានបាត់ស្លាកលេខរថយន្តសូមទាក់ទងមកទូរស័ព្ទលេខ ០១២ ៧១ ៨១ ៧១ ។
គួរបញ្ជាក់ទៀតថា ប៉ុន្មានថ្ងៃមុននេះលោកចៅក្រមសាលាដំបូងរាជធានីភ្នំពេញម្នាក់ ក៏ត្រូវចោរលួចដោះយកស្លាកលេខរថយន្តទាំងមុខក្រោយបាត់ដែរ ។ រថយន្តរបស់លោកស៊េរីទំនើប ហើយទើបនិងទិញទៀតផង ក្រោយពីចោរលួចដោះយកបាត់ទៅ លោកចៅក្រមរូបនោះជិះរថយន្តមកធ្វើការអត់ស្លាកលេខ ។
លោកបានឱ្យដឹងថា ការលួចដោះយកស្លាកលេខរថយន្តនេះ ត្រូវតែលួចទាំងមុខទាំងក្រោយដែលលក់បានតម្លៃ៣០ដុល្លារ និងយកតែលេខរថយន្តស៊េរីខ្ពស់ ហើយអ្នកទិញយកទៅគឺដើម្បីបំពាក់លើរថយន្តគេចពន្ធឬយកទៅបំពាក់លើរថយន្តអត់ពន្ធដែលលួចនាំចូលពីក្រៅប្រទេស ៕
ចែករំលែកព័តមាននេះ