ព្រះអនុគណស្រុកកងមាស នាំយកអំណោយជូនដល់អភិបាលខេត្ត
- កំពង់ចាម
ខេត្តកំពង់ចាម ៖ ព្រះបញ្ញារង្សី ស្រ៊ាង ម៉ុក ព្រះអនុគណស្រុកកងមាស គង់នៅវត្តកែវមុនី ហៅវត្តថ្មី ឃុំអង្គរបាន ស្រុកកងមាស…
ខេត្តកំពង់ចាម ៖ ព្រះបញ្ញារង្សី ស្រ៊ាង ម៉ុក ព្រះអនុគណស្រុកកងមាស គង់នៅវត្តកែវមុនី ហៅវត្តថ្មី ឃុំអង្គរបាន ស្រុកកងមាស ខេត្តកំពង់ចាម បានផ្តល់អំណោយមនុស្សធម៌ ដល់គណៈកម្មាធិការគ្រប់គ្រង គ្រោះមហន្តរាយខេត្តកំពង់ចាម សម្រាប់ជួយដល់ប្រជាពលរដ្ឋដែលរងគ្រោះ និងរងផលប៉ះពាល់គ្រោះ ទឹកជំនន់ទន្លេមេគង្គ។ ពិធីប្រគល់-ទទួលអំណោយ បានធ្វើឡើងនៅសាលាខេត្តកំពង់ចាម នាពីរសៀល ថ្ងៃទី១៧ ខែកញ្ញា ស្ថិតក្នុងអធិបតីភាព លោក គួច ចំរើន អភិបាលខេត្តកំពង់ចាម និងជាប្រធាន គណៈកម្មាធិការគ្រោះមហន្តរាយខេត្ត។
អំណោយដែលបានផ្តល់ជូនគណៈកម្មាធិការគ្រប់គ្រងគ្រោះ មហន្តរាយ ខេត្តកំពង់ចាម នាពេលនេះ រួមមាន៖ ព្រះបញ្ញារង្សី ស្រ៊ាង ម៉ុក ព្រះអនុគណស្រុកកងមាស គង់នៅវត្តកែវមុនី ហៅវត្តថ្មី ឃុំអង្គរបាន ស្រុកកងមាស ឧបត្ថម្ភអង្ករ២តោន មី៥០កេះ ត្រីខ១៣យួរ ទឹកត្រី ៥០យួរ ទឹកស៊ីអ៊ីវ៥០យួរ ព្រមទាំងថវិកា១លានរៀលផងដែរ។ និងអំណោយរបស់ព្រះបញ្ញាសោភ័ណ ដេន លាង ព្រះរាជគណៈថ្នាក់កិត្តិយស ព្រះវិន័យធរអនុគណស្រុកកងមាស និងជាព្រះចៅអធិការ វត្តសុវណ្ណរង្សី (អង្គរបាន) ឃុំអង្គរបាន ស្រុកកងមាស រួមមាន៖ អង្ករ៤តោន និងគ្រឿងឧបភោគបរិភោគមួយចំនួនទៀត។
ក្នុងឱកាសនោះ លោក គួច ចំរើន អភិបាលខេត្តកំពង់ចាម បានថ្លែងអំណរព្រះគុណ ចំពោះព្រះអនុគណស្រុកកងមាស និងព្រះវិន័យធរអនុគណស្រុកកងមាស ដែលបានឧបត្ថម្ភដល់ជនរងគ្រោះដោយគ្រោះទឹកជំនន់នាពេលកន្លងមក។ លោក គួច ចំរើន បានសន្យាថា នឹងយកអំណោយទាំងនេះ ទៅប្រគល់ឲ្យដល់ដៃជនរងគ្រោះដោយសារទឹកជំនន់ ព្រមទាំងយកទៅប្រគេនដល់បណ្តាវត្តអារាមមួយចំនួន ដែលកំពុងរងគ្រោះដោយទឹកជំនន់ផងដែរ។ លោក គួច ចំរើន បានបន្តអំពាវដល់បងប្អូនសប្បុរជននាៗ សូមបន្តឲ្យជួយឧបត្ថម្ភនូវអំណោយ ផ្សេងៗបន្ថែមទៀត ដើម្បីជួយដល់ជនរងគ្រោះ ដែលកំពុងរង់ចាំជំនួយសង្គ្រោះបន្ទាន់យ៉ាងចាំបាច់នោះ៕
ចែករំលែកព័តមាននេះ