រាជធានីភ្នំពេញ ៖ ជនសង្ស័យជាចោរលួចម៉ូតូ និងអ្នកទទួលទិញផលចោរកម្ម ចំនួន៦នាក់ រួមទាំងវត្ថុតាងម៉ូតូ១៣គ្រឿង និងសម្ភារមួយចំនួនទៀត ត្រូវបានកម្លាំងនគរបាលការិយាល័យ ព្រហ្មទណ្ឌកម្រិតស្រាលរាជធានីភ្នំពេញស្រាវជ្រាវ ឃាត់ខ្លួនដកហូត និងបង្ហាញមុខជាសាធារណៈ កាលពីរសៀលថ្ងៃទី១៧ កញ្ញានេះ។ លោកវរៈសេនីយ៍ឯក ប៊ុន សត្យា នាយការិយាល័យព្រហ្មទណ្ឌ កម្រិតស្រាល បានឲ្យដឹងថា ជនសង្ស័យដែលត្រូវបានបង្ហាញមុខនេះ មាន៣នាក់ជាមុខសញ្ញា លួចម៉ូតូយ៉ាងសកម្ម និង៣នាក់ទៀត ជាអ្នកទទួលទិញផលចោកម្ម ។
ជនសង្ស័យ១.ឈ្មោះ ត្រមុជ ស៊ីនោ ភេទប្រុស អាយុ២៦ឆ្នាំ មានលំនៅផ្ទះជួល ផ្លូវលេខ២០០៤ សង្កាត់ចោមចៅទី១ ខណ្ឌពោធិ៍សែនជ័យ ២.ឈ្មោះ លឹម ភារម្យ ភេទប្រុស អាយុ២៨ឆ្នាំ មានលំនៅផ្ទះលេខ៤៤ ផ្លូវលំ សង្កាត់ទឹកថ្លា ខណ្ឌសែនសុខ និង៣. ឈ្មោះ ភ័ក្រ ពន្លឺ ភេទប្រុស អាយុ២២ឆ្នាំ មានលំនៅ បន្ទប់ជួលលេខ៨ សង្កាត់ទឹកថ្លា ខណ្ឌសែនសុខ ជនទាំង៣នាក់ ជាមុខសញ្ញាលួច។
ចំណែក៣នាក់ ជាអ្នកទទួលទិញផលចោរកម្ម ១.ឈ្មោះ ម៉ុង ឡុង ភេទប្រុស អាយុ២៥ឆ្នាំ មានលំនៅតូច លេខ២២៣ សង្កាត់កាកាប១ ខណ្ឌពោធិសែនជ័យ មុខរបរជាងបិតតែមម៉ូតូ ២.ឈ្មោះ ពុធ រស្មី ហៅសូន្យ ភេទប្រុស អាយុ២៩ឆ្នាំ មានលំនៅផ្ទះលេខ១១អាផ្លូវ ៣៣៦ សង្កាត់បឹងសាឡាង ខណ្ឌទួលគោក និង៣.ឈ្មោះ តោ ដារ៉ូ ភេទប្រុស អាយុ៣៤ឆ្នាំ មុខរបរជាមន្ត្រីនគរបាល នាយកដ្ឋានប្រឆាំងភារកម្ម ឧក្រិដ្ឋកម្មឆ្លងដែន ស្នាក់នៅផ្ទះលេខ៥៩ ផ្លូវបេតុង សង្កាត់ទឹកថ្លា ខណ្ឌសែនសុខ។
លោកវរៈសេនីយ៍ឯក ប៊ុន សត្យា បានបន្តថា កាលពីកាលពីថ្ងៃ៤ កញ្ញា នៅវេលាម៉ោងប្រមាណ៣ និង៤០នាទីរសៀល ជនសង្ស័យ បានធ្វើសកម្មភាព លួចម៉ូតូម៉ាកហុងដាប៊ិច ពណ៌ខៀវ លាយស ពាក់ស្លាកលេខ ភ្នំពេញ ១GV-៥៦៦៥ មួយគ្រឿង នៅចំណុចតូចលក់ទូរស័ព្ទនៅវត្តស្ទឹងមានជ័យ ក្នុងសង្កាត់ស្ទឹងមានជ័យ។ បន្ទាប់ពីមានសកម្មភាព ចោរលួចនោះនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការស្រាវជ្រាវ ឈានដល់ការឃាត់ខ្លួនជនសង្ស័យម្នាក់ឈ្មោះ ភ័ក្រ ពន្លឺ នៅក្នុងសង្កាត់ទឹកថ្លា ខណ្ឌសែនសុខ ហើយបាននាំទៅឆែកឆេរ និងឃាត់ខ្លួនជនសង្ស័យ ជាបន្តបន្ទាប់ចំនួន៥នាក់ទៀត នៅចំណុចផ្ទះលេខ៧៤ ផ្លូវលេខ៣៧៤ ក្នុងសង្កាត់បឹងសាឡាង ខណ្ឌទួលគោក ។
ប្រតិបត្តិការនេះសមត្ថកិច្ចបានដកហូត ម៉ូតូ១៣គ្រឿង រថយន្ត២គ្រឿង ស្លាកលេខ ៩បន្លះ ប័ណ្ណសម្គាល់យានយន្តចំនួន៥ ឧបករណ៍ កែច្នៃ និងគ្រឿងបន្លាស់ម៉ូតូមួយចំនួនទៀត តែម៉ូតូ១៣គ្រឿងនោះ មាន២គ្រឿងជារបស់ជនរងគ្រោះ។ ក្រោយបង្ហាញមុខជនសង្ស័យទាំង៦នាក់ និងម៉ូតូ១៣គ្រឿង ត្រូវបានកម្លាំងសមត្ថកិច្ចកសាងសំនុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី៕
ចែករំលែកព័តមាននេះ