រាជធានីភ្នំពេញ ៖ ការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ កាលពីរសៀលថ្ងៃទី១៧ កញ្ញា បានបង្ហាញមុខជនសង្ស័យម្នាក់ពាក់ព័ន្ធករណីឆក់កាបូបតាមផ្លូវសាធារណៈ ដោយមានប្រើប្រាស់អាវុធខ្លី ។ ជនសង្ស័យខាងលើឈ្មោះ ម៉ន…
រាជធានីភ្នំពេញ ៖ ការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ កាលពីរសៀលថ្ងៃទី១៧ កញ្ញា បានបង្ហាញមុខជនសង្ស័យម្នាក់ពាក់ព័ន្ធករណីឆក់កាបូបតាមផ្លូវសាធារណៈ ដោយមានប្រើប្រាស់អាវុធខ្លី ។
ជនសង្ស័យខាងលើឈ្មោះ ម៉ន សំនៀង ភេទប្រុស អាយុ២៤ ឆ្នាំ មុខរបរមិនពិតប្រាកដ ស្នាក់នៅផ្ទះលេខ៦០E0Z ផ្លូវលេខ១២២ ក្រុម៧០ សង្កាត់មិត្តភាព ខណ្ឌ៧មករា រាជធានីភ្នំពេញ ។
លោកវរ សេនីយ៍ឯក ប៊ុន សត្យា ប្រធានការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានថ្លែងឲ្យដឹងថា ជនសង្ស័យត្រូវបានចាប់ខ្លួនកាលពីថ្ងៃទី១៥ កញ្ញា នៅចំណុចផ្ទះសំណាក់ទិតហួរ ផ្លូវលំ សង្កាត់គោកឃ្លាង ខណ្ឌសែន សុខ រាជធានីភ្នំពេញ ដែលបានធ្វើសកម្មភាព ឆក់កាបូបដៃ ពណ៌ខ្មៅ នៅចំណុចមុខផ្ទះលេខ៨ ផ្លូវលេខ២៩៤ ភូមិ៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីវេលាម៉ោង១រសៀ លថ្ងៃទី១៣ សីហា ។
ជនរងគ្រោះឈ្មោះ ម៉េង វិមានតារា ភេទប្រុស អាយុ៣៧ ឆ្នាំ មុខរបរជាមន្ត្រីនគរបាលជាតិ ស្នាក់នៅ
ផ្ទះលេខ១៥៤ ផ្លូវបេតុង ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
លោក ប៊ុន សត្យា បន្តថា ពេលឃាត់ខ្លួនជនសង្ស័យ សមត្ថកិច្ចបានដកហូត អាវុធខ្លីម៉ាកGLOCK១៩ ពណ៌ខ្មៅ លេខAAMY៨៦០ ផលិតនៅប្រទេសអាមេរិក ចំនួន១ដើម បង់អាវុធខ្លី១ និងគ្រាប់ចំនួន១៥ គ្រាប់ ។ ទូរសព្ទ័ដៃម៉ាក SamsungGalaxyS9 ពណ៌ខ្មៅ ចំនួន១គ្រឿង ប័ណ្ណសម្គាល់យានយន្ត ពាក់ស្លាកលេខ ភ្នំពេញ ២AC-៨៧៩៨ មួយច្បាប់ ប័ណ្ណបើកបរ ១ច្បាប់ អត្តសញ្ញាណប័ណ្ណសញ្ជាតិខ្មែរ១ច្បាប់ កាតATM ចំនួន៤សន្លឹក លុយខ្មែរ៤លានរៀល និងប្រាក់ដុល្លារ២០ដុល្លារអាមេរិក ។
ក្រោយពេលបង្ហាញមុខ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ