បើតាមសារព័ត៌មានបរទេសកាលពីពេលថ្មីៗកន្លងមកផ្សាយថា ចានស្រាក់មាសដែលជាវត្ថុបុរាណមានតម្លៃដាក់តាំងនៅសារមន្ទីរត្រូវចោរលួចយកទៅបាត់ ។
ទោះជាយ៉ាងណាក្តីប៉ូលិសឥណ្ឌាបានចាប់ខ្លួនបុរស២នាក់នៅក្រុងអ៊ីដេរ៉ាបាត Hyderabad ក្រោយពេលលួចចានស្រាក់មាសលម្អដោយគ្រាប់ពេជ្រនោះ ព្រមទាំងពែងតែមាស ទ្រនាប់ចាន និងស្លាបព្រា ។ ចានស្រាក់នោះតម្លៃ៧លានដុល្លារ ជាសម្បត្តិរបស់ម្ចាស់ស្រុកអ៊ីដេរ៉ាបាត ។
វត្ថុទាំងអស់នោះសុទ្ធសឹងជារបស់របរប្រើប្រាស់ផ្ទាល់របស់ព្រះអង្គ Mir Osman Ali Khan ឬអ្នកដឹកនាំអង្គចុងក្រោយក្នុងទីក្រុងNizam of Hyderabad ។
បើតាមប៉ូលិសបង្ហើបឲ្យដឹងថា បុរសទាំង២បានសារភាពថា ក្រោយពេលលួចបានហើយ ពួកគេគេចខ្លួនទៅក្រុងមុមបៃ នៅភាគខាងលិចប្រទេសដើម្បីយកវត្ថុដ៏មានតម្លៃទៅលក់ ។ ពួកគេ ដេកនៅសណ្ឋាគារផ្កាយ៥ និងយកចានស្រាក់មាសប្រើជំនួសចានបាយ ។ ពួកគេរកអ្នកទិញមិនបានក៏ត្រឡប់ទៅក្រុងអ៊ីដេរ៉ាបាតវិញ និងត្រូវចាប់ខ្លួន។ ចំពោះវត្ថុតាងទាំងអស់ត្រូវអាជ្ញាធរយកប្រគល់ដល់សារមន្ទីរវិញ ៕
ចែករំលែកព័តមាននេះ