រាជធានីភ្នំពេញ ៖ រដ្ឋបាលរាជធានីភ្នំពេញ បានចេញសេចក្តីប្រកាសព័ត៌មានមួយចុះថ្ងៃទី១៤ ខែកញ្ញា ឆ្នាំ២០១៨ ជម្រាបជូនដល់បងប្អូនប្រជាពលរដ្ឋ អាជីវករ ជាពិសេសអាជីវករលក់ដូរក្នុងផ្សារដើមគទាំងអស់ឱ្យដឹងថា ស្ថានភាពចរាចរណ៍នៅតាមដងផ្លូវ…
រាជធានីភ្នំពេញ ៖ រដ្ឋបាលរាជធានីភ្នំពេញ បានចេញសេចក្តីប្រកាសព័ត៌មានមួយចុះថ្ងៃទី១៤ ខែកញ្ញា ឆ្នាំ២០១៨ ជម្រាបជូនដល់បងប្អូនប្រជាពលរដ្ឋ អាជីវករ ជាពិសេសអាជីវករលក់ដូរក្នុងផ្សារដើមគទាំងអស់ឱ្យដឹងថា ស្ថានភាពចរាចរណ៍នៅតាមដងផ្លូវ ជុំវិញតំបន់ផ្សារដើមគកាន់តែមានភាពស្មុគស្មាញ និងអាក្រក់ឡើងៗដោយមានការទន្ទ្រានយកចិញ្ចើមផ្លូវ និងទ្រូងផ្លូវធ្វើជាកន្លែងលក់ដូរ ។
ក្នុងគោលបំណងរៀបចំសណ្តាប់ធ្នាប់សាធារណៈតាមដងផ្លូវ និងសម្រួលដល់ការធ្វើចរាចរណ៍ឱ្យមានលក្ខណៈល្អប្រសើរជាងមុននេះ រដ្ឋបាលរាជធានីភ្នំពេញ បានចាត់វិធានការចុះរៀបចំសណ្តាប់ធ្នាប់ ការដាក់តាំងទំនិញ ការចតយានយន្ត ដើម្បីលើកដាក់និងទម្លាក់ទំនិញនៅលើចិញ្ចើមផ្លូវ និងទ្រូងផ្លូវសាធារណៈមួយចំនួនជុំវិញផ្សារដើមគដូចជា កំណាត់មហាវិថីសម្តេចមុនីរ៉េត ផ្លូវលេខ៣៣៦ លេខ២៣១ លេខ២៣៤ និងផ្លូវលេខ២៣៩ជាដើម ដោយទទួលលទ្ធផលល្អប្រសើរ និងមានការសាទរពីប្រជាពលរដ្ឋគ្រប់មជ្ឈដ្ឋាន ។
ទន្ទឹមនឹងនេះ ក៏មានជនឱកាសនិយមមួយក្តាប់តូច ដែលមានចេតនាបង្កចលាចល ដោយបានបំភ្លៃការពិត ផ្សព្វផ្សាយបំផុសបំផុលនូវព័ត៌មានពុំពិតប្រាកដ និងបានចោទប្រកាន់មកលើអាជ្ញាធររាជធានីភ្នំពេញថា ការចុះរៀបចំសណ្តាប់ធ្នាប់ជុំវិញផ្សារដើមគនេះ មិនមានបំណងរៀបចំដោះស្រាយបញ្ហាចរាចរណ៍នោះទេ គឺក្នុងគោលបំណងយកទីតាំងផ្សារប្រគល់ជូនឱ្យឯកជន ដើម្បីវិនិយោគសាងសង់ផ្សារនេះទៅវិញ ។
រដ្ឋបាលរាជធានីភ្នំេញ ស្នើឱ្យបងប្អូនប្រជាពលរដ្ឋផ្តល់ព័ត៌មានពីជនឱកាសនិយមមួយក្តាប់តូចនេះទៅសមត្ថកិច្ចនៅជិតបំផុត ដើម្បីចាត់វិធានការតាមផ្លូវច្បាប់ ។ ជាថ្មីម្តងទៀត រដ្ឋបាលរាជធានីភ្នំពេញ ក៏មិនភ្លេចថ្លែងអំណរគុណចំពោះការគាំទ្រ និងចូលរួមសហការក្នុងយុទ្ធនាការរៀបចំសណ្តាប់ធ្នាប់ផ្លូវនានាជុំវិញផ្សារដើមគ និងមហាវិថីសម្តេចមុនីរ៉េត ទទួលបានជោគជ័យ និងសូមអំពាវនាវដល់បងប្អូនប្រជាពលរដ្ឋទាំងអស់ មេត្តាកុំមានការភ័ន្តច្រឡំ ឬជឿតាមការញុះញង់បំភ្លៃរបស់ជនទាំងនេះ ៕
ចែករំលែកព័តមាននេះ