រាជធានីភ្នំពេញ ៖ ក្នុងពេលដែលប្រទេសកម្ពុជាកំពុងឈានទៅរកសេដ្ឋកិច្ចឌីជីថល បច្ចុប្បន្ននេះ រាល់សេវាហិរញ្ញវត្ថុ និងការទូទាត់នានាក៏កំពុងមានការផ្លាស់ប្តូរបន្តិចម្ដងៗទៅរកបច្ចេកវិទ្យាទំនើបដែរ ។ ជាក់ស្ដែង ការទូទាត់ប្រាក់ ក៏កំពុងងាកទៅការបំបាត់…
រាជធានីភ្នំពេញ ៖ ក្នុងពេលដែលប្រទេសកម្ពុជាកំពុងឈានទៅរកសេដ្ឋកិច្ចឌីជីថល បច្ចុប្បន្ននេះ រាល់សេវាហិរញ្ញវត្ថុ និងការទូទាត់នានាក៏កំពុងមានការផ្លាស់ប្តូរបន្តិចម្ដងៗទៅរកបច្ចេកវិទ្យាទំនើបដែរ ។ ជាក់ស្ដែង ការទូទាត់ប្រាក់ ក៏កំពុងងាកទៅការបំបាត់ ឬកាត់បន្ថយការប្រើប្រាស់ប្រាក់សុទ្ធជាបន្តបន្ទាប់ ។
នៅក្នុងសន្និសីទកាលពីថ្ងៃទី១៥ កញ្ញា កន្លងមក លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង បានឲ្យដឹងថា ការបំពាក់និងដាក់ឲ្យអតិថិជនជិះរថយន្តក្រុងអាចទូទាត់ប្រាក់តាមប្រព័ន្ធQR Code នេះ គឺជាការធ្វើទំនើបកម្មមួយក្នុងសម័យបច្ចេកវិទ្យាទំនើប ។ លោកបន្តថា ៖« សាលារាជធានីបានសហការជាមួយបណ្ដាស្ថាប័នហិរញ្ញវត្ថុ ដើម្បីឲ្យពលរដ្ឋមានជម្រើសច្រើនក្នុងការទូទាត់ ក្នុងនោះមានដូចជា ធនាគារអេស៊ីលីដា និងធនាគារឯកទេសវីង ជាដើម ព្រោះពេលខ្លះពលរដ្ឋគាត់ប្រើសេវាធនាគារផ្សេងៗគ្នា » ។
លោកស្រី សុខ សោភា នាយិកាប្រតិបត្តិទីផ្សារនៃធនាគារអេស៊ីលីដា ភីអិលស៊ី បានមានប្រសាសន៍ ការប្រើប្រាស់ប្រព័ន្ធ QR Code នឹងជំរុញឲ្យពលរដ្ឋប្រើប្រាស់មធ្យោបាយសាធារណៈកាន់តែច្រើន ព្រោះកាលណា មានការទូទាត់លឿនរហ័ស ប្រជាពលរដ្ឋនឹងចង់ប្រើ ព្រោះវាងាយស្រួល ហើយវាក៏នឹងកាត់បន្ថយនូវការបំពុលបរិយាកាសពីការប្រើប្រាស់យានយន្តផ្ទាល់ខ្លួនបានច្រើនផងដែរ ។ អ្នកស្រីបញ្ជាក់ថា ៖« រហូតមកដល់ពេលនេះ អតិថិជនរបស់ធនាគារអេស៊ីលីដា ភីអិលស៊ី ដែលប្រើប្រាស់សេវា អេស៊ីលីដាទាន់ចិត្ត មានជាង៦០ម៉ឺននាក់ ដូចនេះ ការដាក់ឲ្យប្រើប្រាស់ការទូទាត់តាមរថយន្តក្រុង យើងជឿជាក់ថា នឹងទទួលបានជោគជ័យខ្ពស់ ហើយរំពឹងថាអតិថិជនរបស់យើងនឹងយកការទូទាត់បែបអេឡិចត្រូនិកនេះ ដើម្បីជាមធ្យោយបាយទូទាត់ »។
ជនជាតិជប៉ុនម្នាក់ដែលប្រើសេវាកម្មរថយន្តក្រុង ហើយទូទាត់តាម QR Code នេះបាននិយាយថា ប្រទេសកម្ពុជាកាន់តែជឿនលឿនហើយ ហើយលោកសប្បាយចិត្តនៅពេលបានមកប្រើប្រាស់នូវសេវាកម្មដែលស្រដៀងនឹងប្រទេសជប៉ុនប្រើដែរ។ ជាក់ស្ដែងជប៉ុនក៏មានការទូទាត់តាមប្រព័ន្ធ QR Code នេះដែរ ។ លោកថា ៖« យើងមករស់នៅកម្ពុជា តែការប្រើប្រាស់សេវាមួយចំនួននៅទីនេះស្រដៀងគ្នានឹងនៅជប៉ុនដែរ ដូចនេះយើងអាចវាយតម្លៃបានថា កម្ពុជាកំពុងតែដើរទៅមុខបណ្ដើរៗហើយ » ។
គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ការទូទាត់ប្រាក់តាមអេឡិចត្រូនិកនិងតាម QR Code ត្រូវបានគេមើលឃើញថា កំពុងមានសកម្មភាពយ៉ាងផុសផុល និងបណ្ដាក្រុមហ៊ុននិងធនាគារដែលបង្កើតសេវានេះក៏បានជំរុញឲ្យប្រជាពលរដ្ឋងាកមកប្រើការទូទាត់តាមអេឡិចត្រូនិក និងQR Codeដែរ ក្នុងនោះ តាមបណ្ដាហាង ភោជនីយដ្ឋាន និងកន្លែងបម្រើសេវាកម្មនានាដែលបំពាក់នូវការទូទាត់តាមបច្ចេកវិទ្យា ក៏បានផ្ដល់ការបញ្ចុះតម្លៃជូនភ្លាមដើម្បីលើកទឹកចិត្តដល់អតិថិជនផងដែរ ៕
ចែករំលែកព័តមាននេះ