រាជធានីភ្នំពេញ ៖ អ្នកលក់និងអ្នកឱ្យចំណីព្រាបនៅមុខព្រះបរមរាជវាំង ចាប់ពីថ្ងៃនេះតទៅ ត្រូវប្រឈមនឹងការផាកពិន័យ ដោយមិនលើកលែងទៀតឡើយ ក្រោយពីកម្លាំងប្រជាការពារខណ្ឌដូនពេញ បានហៅអ្នកលក់ចំណីព្រាបទាំងអស់មកធ្វើកិច្ចសន្យាឱ្យបញ្ឈប់ការលក់នៅមុខព្រះបរមរាជវាំង តែអនុញ្ញាតឱ្យលក់នៅខាងជើងវេទិកាបុណ្យអុំទូក ក្បែររូបសំណាកតាព្រះចៅជាប់នឹងមាត់ទន្លេ ។
លោក សុខ ពេញវុធ អភិបាលខណ្ឌដូនពេញថ្លែងថា ចាប់ពីពេលនេះទៅមិនអនុញ្ញាតឱ្យមានអ្នកលក់ចំណីព្រាបនិងអ្នកឱ្យចំណីព្រាបលើសួនច្បារមុខព្រះបរមរាជវាំងទៀតឡើយ ព្រោះកន្លងមកធ្វើឱ្យប៉ះពាល់យ៉ាងខ្លាំងដល់បរិស្ថាន អនាម័យ ដែលសត្វព្រាបទាំងនោះបានជុះអាចម៍ នៅមុខព្រះបរមរាជវាំងពាសពេញ និងលើសួនច្បារ ។
ទោះជាមានវិធានការបែបនេះមែន តែសាលាខណ្ឌអនុញ្ញាតឱ្យបងប្អូនអ្នកលក់ចំណីព្រាប និងអ្នកឱ្យចំណីព្រាបនៅខាងជើងវេទិកាបុណ្យអុំទូកក្បែររូបសំណាកតាព្រះចៅនៅមាត់ទន្លេ ដែលទីតាំងនេះងាយស្រួលដល់កម្លាំងប្រជាការពារក្នុងការបាញ់ទឹកលាងសម្អាតលាមកព្រាប និងរើសថង់កៅស៊ូច្រកចំណីព្រាបដែលគេបោះចោលពាសវាលពាសកាល ។
លោកអភិបាលខណ្ឌដូនពេញ បញ្ជាក់ថាក្រោយពីទទួលបានការណែនាំពីលោក ឃួង ស្រេង អភិបាលរាជធានីភ្នំពេញ ក៏ដូចជាក្រសួងព្រះបរមរាជវាំងរួចមក រដ្ឋបាលខណ្ឌដូនពេញបានធ្វើការប្រជុំផ្សព្វផ្សាយណែនាំ និងសំណូមពរដល់បងប្អួនអាជីវករអ្នកលក់ដូរចំណីព្រាប លក់ផ្កា ស្លាធម៌ លក់ចាប និងថតរូបនៅខាងក្រោយព្រះអង្គដងកើ និងសួនព្រះបរមរាជវាំង ដែលមកដល់ថ្ងៃនេះមានរយៈពេលជាច្រើនថ្ងៃមកហើយ ។
អាជ្ញាធរបានណែនាំឱ្យបងប្អូនអាជីវករទៅលក់ដូរ និងបាចចំណីព្រាបនៅចំណុចការ៉ូឡាខាងមុខរូបសំណាកតាព្រះចៅ ឬខាងជើងវេទិកាបុណ្យអុំទូកវិញ និងអ្នកលក់ផ្កានៅព្រះអង្គដងកើ តាព្រះចៅ ឱ្យចូលលក់ក្នុងស្តង់នៅខាងត្បូងព្រះអង្គដងកើ ដែលរដ្ឋបាលរាជធានីភ្នំពេញបានរៀបចំជូនបងប្អូន ។
រដ្ឋបាលខណ្ឌដូនពេញ សង្កេតឃើញថា បងប្អូនអ្នកលក់ចំណីព្រាប លក់ផ្កា ស្លាធម៌ លក់ចាប និងសេវាកម្មថតរូប អនុវត្តតាមការណែនាំរបស់អាជ្ញាធរបានល្អប្រសើរ ប៉ុន្តែទន្ទឹមនឹងនេះ ក៏មានបងប្អូនប្រជាពលរដ្ឋនិងអ្នកលក់ដូរមួយចំនួនតូច មិនបានគោរពតាមការណែនាំរបស់អាជ្ញាធរ នៅបន្តលក់ដូរ បាចចំណីព្រាប និងថតរូបនៅលើស្មៅសួនច្បារ ការ៉ូឡាខាងមុខព្រះបរមរាជវាំងដដែល ធ្វើឱ្យប៉ះពាល់ដល់សណ្តាប់ធ្នាប់ របៀបរៀបរយសាធារណៈ និងអនាម័យ ដោយដើរជាន់លើស្មៅ និងមានសំរាម ឬចំណីព្រាបនៅលើការ៉ូឡា ដែលជាហេតុនាំឱ្យប៉ះពាល់ដល់អនាម័យបរិស្ថានផងដែរ ។
ដោយហេតុខាងលើ រដ្ឋបាលខណ្ឌដូនពេញសូមធ្វើការណែនាំ និងអង្វរយ៉ាងទទូចដល់បងប្អូនអាជីវករ អ្នកលក់ដូរ បងប្អូនប្រជាពលរដ្ឋគ្រប់មជ្ឈដ្ឋានដែលបានមកលេងកម្សាន្តសប្បាយឬគោរពបូជានៅបរិវេណខាងមុខព្រះបរមរាជវាំង សូមមេត្តាយោគយល់អធ្យាស្រ័យ ព្រមទាំងចូលរួមសហការជាមួយអាជ្ញាធរមូលដ្ឋាន ក្នុងការរៀបចំសណ្តាប់ធ្នាប់ របៀបរៀបរយសាធារណៈ និងអនាម័យនៅជុំវិញទីតាំងខាងលើ ក៏ដូចជាទីសាធារណៈនានាក្នុងរាជធានីភ្នំពេញទាំងមូល ដើម្បីរួមចំណែកលើកកម្ពស់សោភ័ណភាពក្នុងរាជធានីភ្នំពេញរបស់យើង ប្រកបដោយភាពទាក់ទាញ ។
លោក សុខ ពេញវុធ ថ្លែងទៀតថា ចាប់ពីពេលនេះទៅលែងមានការអនុគ្រោះដល់បងប្អូនអ្នកលក់ចំណីព្រាប ក៏ដូចជាអ្នកឱ្យចំណីព្រាបដែលនៅមានវត្តមាននៅលើសួនច្បារមុខព្រះបរមរាជវាំងទៀតហើយ ។ បើសិនមិនគោរពតាមគោលការណ៍នេះទេ គឺប្រឈមនឹងការផាកពិន័យ ក្នុងនោះអ្នកឱ្យចំណីព្រាបមុខព្រះបរមរាជវាំង និងអ្នកបោះចោលសំរាមត្រូវពិន័យចំនួន២មុឺនរៀល អ្នកលក់ចំណីព្រាបមុខព្រះបរមរាជវាំង និងលក់គ្រឿងហូបចុក ហើយបោះចោលសំរាមត្រូវពិន័យចំនួន៥មុឺនរៀល ។
ហាងលក់ដូរតាមផ្ទះនិងភោជនីយដ្ឋាន ដែលយកសំរាមដាក់ខុសម៉ោងកំណត់ត្រូវពិន័យ១៥មុឺនរៀល សិប្បកម្ម សហគ្រាសត្រូវពិន័យ២០មុឺនរៀល ។ បើសិនជាលើកទី១ពិន័យហើយនៅតែមិនគោរពតាមគោលការណ៍នេះទេ នឹងត្រូវពិន័យទ្វេគុណតែម្តង ។
លោក គឹម វុត្ថា ប្រធានប្រជាការពារខណ្ឌដូនពេញ បានលើកឡើងថា បច្ចុប្បន្ននេះកម្លាំងប្រជាការពារត្រូវបានដាក់ពង្រាយនៅមុខព្រះបរមរាជវាំង ជាពិសេសលើសួនច្បារ ដើម្បីឃាត់ខ្លួនអ្នកលក់ចំណីព្រាបដែលរឹងរូសមិនអនុវត្តតាមគោលការណ៍របស់សាលាខណ្ឌ ហើយកន្លងមកបានហៅមកអប់រំនិងធ្វើកិច្ចសន្យាឱ្យឈប់លក់នៅមុខព្រះបរមរាជវាំង ។
រីឯអ្នកឱ្យចំណីព្រាបក៏ត្រូវបានហៅមកអប់រំណែនាំដែរ អ្នកខ្លះទៀតបានណែនាំនៅនឹងកន្លែងឱ្យចំណីព្រាបតែម្តង។ បុ៉ន្តែចាប់ពីពេលនេះទៅ អ្នកលក់និងអ្នកឱ្យចំណីព្រាបត្រូវប្រឈមនឹងការផាកពិន័យដោយមិនលើកលែងឡើយ ។សាលាខណ្ឌដូនពេញ ក៏បានកំណត់ទីតាំងថ្មីឱ្យអ្នកលក់ចំណីព្រាបនិងអ្នកឱ្យចំណីព្រាបនៅខាងជើងវេទិកាបុណ្យអុំទូក ក្បែររូបសំណាកតាព្រះចៅជាប់មាត់ទន្លេ ដើម្បីងាយស្រួលក្នុងការបាញ់ទឹកលាងសម្អាតផងដែរ ៕
ចែករំលែកព័តមាននេះ