ខេត្តរតនគិរី ៖ ទំនៀមទម្លាប់ជនជាតិដើមភាគតិច គឺនៅរដូវស្សាដាំដំណាំស្រូវតាមជើងភ្នំ ។ កាលពីពេល ថ្មីៗកន្លងមកអ្នកយកព័ត៌មានកោះសន្តិភាពបានជួបអ្នកស្រីង៉ាន ណា អាយុ២៦ឆ្នាំ ជានជាតិគ្រឹង ជាកសិកររស់នៅភូមិកាតែ ឃុំម៉ាលិច ស្រុកអណ្ដូងមាស ។ គ្រួសារអ្នកស្រីង៉ាន ណា បានប្រមុខរបដំណាំស្រូវនៅជើងភ្នំបាដល់ ក្នុងភូមិបាដល់ ឃុំសេសាន ស្រុកអូរយ៉ាដាវ ។
អ្នកស្រីង៉ាន ណា មានប្ដី និងមានកូនប្រុសម្នាក់អាយុ៤ឆ្នាំ ។ ក្រុមគ្រួសារនាងត្រូវឪពុកម្ដាយចែកដីចំនួនកន្លះហិកតាទុកសម្រាប់ដាំដំណាំស្រូវ ហើយក្នុង មួយៗឆ្នាំបានផល១០បាវ និងមានឆ្នាំខ្លះមេឃមិនអំណោយផល់បានផលស្រូវ៥,៦បាវ ។ អ្នកស្រីង៉ាន ណា និយាយថា «គ្រួសារខ្ញុំបានទទួលផលស្រូវចំនួនប៉ុណ្ណឹមិនគ្រប់គ្រាន់ទេ ពេលច្រូតកាត់ស្រូវហើយនៅរដូវប្រាំងដើរស៊ីឈ្នួលចូកស្មៅចម្ការកៅស៊ូ និងស៊ីឈ្នួលដកដំឡូងមីឲ្យនាក់ភូមិរកកម្រៃបន្ថែមទៀតទើបរស់បាន »។
ប្រភពដដែលឲ្យដឹងថានៅក្នុងស្រុកអណ្ដូងមាសសំបូរព្រៃភ្នំណាស់ មិនសូវមានដីទំនាបធ្វើស្រែទេ ដូច្នេះតាមទម្លាប់ជនជាតិដើមភាគតិច គឺដាំដំណាំស្រូវនៅជើងភ្នំ ។ ទំនៀមទម្លាប់ប្រពៃណីរជនជាតិដើមភាគតិចបែបនេះមានជាយូរលង់មកហើយ ។
នៅភូមិភាគឦសានខេត្តរតនគីរីមានបងប្អូនជនជាតិដើមភាគតិចចំនួន៦៥ភាគរយ កាន់ព្រហ្មញ្ញសាសនា មានជំនឿលើអារុក្ខអារក្សអ្នកតាភ្នំ និងអ្នកតាភូមិ ។ ប្រពៃណីដែលជនជាតិធ្លាប់ធ្វើក្នុង មួយឆ្នាំៗដូចជានៅក្នុងខែកុម្ភៈបិទភូមិ ហាមដាច់ខាតមិនឱ្យអ្នកមកពីចម្ងាយ ឬអ្នកភូមិផ្សេងចូលឡើយ ។ ការបិទភូមិក្នុងគោលបំណងដេញព្រាយបិសាច និងខ្មោច ផ្សេងៗចេញពីភូមិ ។
ចំណែកប្រពៃណីមួយទៀត គឺនៅដើមឆ្នាំ មុនពេលមានភ្លៀងធ្លាក់ជនជាតិដើមភាគតិចរៀបចំកម្មវិធីសែនអ្នកតាស្រែ គោលបំណងសុំឱ្យមានផលស្រូវល្អ ។ សំណែនសែនមានដូចជាកាប់សត្វក្របី១ក្បាល និងស្រាពាង ។ ដល់ពេលស្រូវពេញក្រមុំ រៀបចំសែនម្ដងទៀត ដោយសំណែនមានដូចគ្នា ។
ម្ហូបដែលជនជាតិដើមភាគតិចចូលចិត្តបំផុតរួមមានទី១ គឺសម្លប្រូងដុតបំពង់ឫស្សី ទី២ភីភា ទី៣ម៉ាភាមានរសជាតិល្វីងដាក់ប្រមាត់សត្វ និងទី៤គឺចារណាង ។ ម្ហូបទាំង៤មុខនេះ ជនជាតិភាគតិចចូលចិត្តបំផុត ៕
ចែករំលែកព័តមាននេះ