ទីក្រុងហាណូយ ៖ ក្រសួងកសិកម្ម និងអភិវឌ្ឍន៍ជនបទបានលើកឡើងពីហានិភ័យនៃជំងឺគ្រុនផ្តាសាយជ្រូកអាហ្វ្រិក (ASF) ដោយសម្រេចផ្អាកការនាំចូលសាច់ជ្រូកពីប៉ូឡូញនិងហុងគ្រីចាប់ពីថ្ងៃទី២០ ខែកញ្ញា តទៅ ។
ប្រទេសវៀតណាម នឹងនៅតែនាំចូលសាច់ជ្រូកដែលត្រូវបាននាំចេញមុនថ្ងៃ២០ កញ្ញា ប៉ុន្តែសាច់ទាំងនោះនឹងត្រូវត្រួតពិនិត្យដោយនាយកដ្ឋានសុខភាពសត្វ ។
អនុរដ្ឋមន្ត្រីក្រសួងកសិកម្មនិងអភិវឌ្ឍន៍ជនបទ លោក Ha Cong Tuan បានមានប្រសាសន៍ថា វិធានការនេះធ្វើឡើងដើម្បីកាត់បន្ថយហានិភ័យនៃការផ្ទុះឡើងនៃជំងឺគ្រុនផ្តាសាយជ្រូកអាហ្វ្រិក ។
ការសម្រេចចិត្តនេះធ្វើឡើង បន្ទាប់ពីអង្គការគ្រប់គ្រងសុខភាពសត្វពិភពលោក (OIE) បានរាយការណ៍ថា មានករណីវីរុសASFចំនួន១៧ករណីនៅក្នុងជង្រុកសត្វព្រៃដែលងាប់នៅក្នុងទីក្រុង Heves និងក្រុង Szabolcs-Szatmar-Bereg នៅឆ្នាំនេះ ។
វីរុសនេះត្រូវបានគេរកឃើញផងដែរនៅក្នុងជ្រូកព្រៃចំនួន៣១៥ក្បាល និងជ្រូកក្នុងស្រុកចំនួន១៦២ក្បាលនៅទូទាំងខេត្តរបស់ប្រទេសប៉ូឡូញចំនួន៥ ។
ជំងឺគ្រុនផ្តាសាយជ្រូកអាហ្វ្រិក (ASF) គឺជាប្រភេទនៃជំងឺគ្រុនផ្តាសាយដែលមានអត្រាងាប់ជាង៩០%ចំពោះសត្វជ្រូក ។ គេនៅមិនទាន់ដឹងថាព្យាបាលតាមរបៀបណាទេ ។
ទោះបីជាជំងឺនេះមិនបង្កគ្រោះថ្នាក់ដល់មនុស្សក្តី ក៏វាមានសក្តានុពលក្នុងការធ្វើឲ្យខូចខាតខាងសេដ្ឋកិច្ចដ៏ធំនៅទូទាំងឧស្សាហកម្មសាច់ជ្រូកដែរ ។
ប្រទេសវៀតណាម នឹងចាប់ផ្តើមការនាំចូលឡើងវិញពីប្រទេសទាំងពីរឲ្យបានឆាប់ នៅពេលណាដែលអង្គការគ្រប់គ្រងសុខភាពសត្វពិភពលោក ប្រកាសថាជំងឺកាចសាហាវនេះត្រូវបានបញ្ចប់ ។
នៅថ្ងៃទី១១ ខែកញ្ញា នាយករដ្ឋមន្ត្រីវៀតណាម លោក Nguyen Xuan Phuc បានចុះហត្ថលេខាលើឯកសារជំរុញឲ្យមានសកម្មភាពទប់ស្កាត់ជំងឺនេះ មិនឱ្យចូលក្នុងប្រទេសវៀតណាម ។
រដ្ឋាភិបាលបានហាមឃាត់ការដឹកជញ្ជូន, ការជួញដូរ, ការសម្លាប់ និងការប្រើប្រាស់ផលិតផលសាច់ជ្រូកទាំងអស់ដែលមិនស្គាល់ ។ ការត្រួតពិនិត្យព្រំដែនត្រូវបានគេបង្កើន ហើយទីក្រុងនិងខេត្តត្រូវបានស្នើសុំឲ្យបង្ក្រាបការនាំចូលខុសច្បាប់ ៕
ចែករំលែកព័តមាននេះ