រាជធានីភ្នំពេញ ៖ ក្នុងចំណោមបេក្ខជនជាច្រើនចូលរួមប្រកួតសិស្សកម្ពុជាមួយរូបបានទទួលជ័យលាភីលេខ១ ទូទាំងប្រទេសលើកវិញ្ញាសាក្រឡុកភេជ្ជៈ មានថ្វីដៃល្អ ។
បេក្ខជនឈ្មោះ ទៀង ដេវីត មកពីសាលាទេសចរណ៍ និងបដិសណ្ឋារកិច្ចកម្ពុជាដណ្ដើមបានជ័ យលាភីលេខ១ ទូទាំងប្រទេសក្នុងការប្រកួតវិញ្ញាសាក្រឡុកភេសជ្ជៈ ដោយទទួលបានប័ណ្ណសរសើរពីលោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធាន ស.ស.យ.ក រាជធានីភ្នំពេញ ។
ក្នុងពិធីប្រគល់ប័ណ្ណសរសើរជូនដល់ជ័យលាភីនេះធ្វើឡើងរួមគ្នាជាមួយពិធីប្រគល់ប័ណ្ណសរសើរដល់បេក្ខជនឆ្នើមនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) និងពិធី សម្ពោធទីស្នាក់ការសហភាពសហព័ន្ធយុវជនកម្ពុជា ស្ថិតក្នុងខណ្ឌជ្រោយចង្វា រាជធានីភ្នំពេញ ។
កាលពីពេលកន្លងមកនេះបេក្ខជន ទៀង ដេវីត បានរៀបរាប់ថា គន្លឹះពិសេសដែលរូបគេប្រើប្រាស់ក្នុងការប្រកួតនេះ គឺផ្តោតសំខាន់បំផុតទៅលើរសជាតិ និងការតុបតែងលំអសោភ័ណ ភាព ដោយរូបគេយល់ថា ភ្ញៀវតែងតែត្រូវការជាចាំបាច់នូវរសជាតិដ៏ពេញចិត្ត រីឯសោភ័ណ នោះវិញក៏ជាមន្តទាក់ទាញចំណាប់អារម្មណ៍របស់ភ្ញៀវផងដែរ ។ ដេវីត បានបន្តថា រូបគេបានសិក្សាជាមួយសាលាទេសចរណ៍ និងបដិសណ្ឋារកិច្ចកម្ពុជានេះរយៈពេលជិតមួយឆ្នាំមកហើយ ដោយសាលាពិតជាខិតខំបណ្ដុះបណ្ដាលជំនាញល្អៗដល់រូបគេ និងសិស្សដទៃទៀតបានយ៉ាងដិតដល់ ។
ដេវីតក៏បានថ្លែងអំណរគុណផងដែរចំពោះសាលាទេសចរណ៍ និងបដិសណ្ឋារកិច្ចកម្ពុជា ដែលមានលោក បណ្ឌិត ឡី សុភាព ជានាយកសាលាដ៏សកម្មក្នុងការខិតខំបណ្ដុះបណ្ដាលសិស្សនិសិត្សនានា រហូតដល់រូបគេមានឱកាសបានចូលរួមប្រកួត និងទទួលបានជ័យលាភីលេខ១ នៅទូទាំងប្រទេសយ៉ាងដូច្នេះ ។
ចំណែកលោក ឈាន សុខផល គណៈកម្មការវាយតម្លៃការប្រកួតវិញ្ញាសាក្រឡាភេសជ្ជៈនេះ ក៏បានបញ្ជាក់ដែរថា ការវាយតម្លៃការប្រកួតនេះពិតជាសុក្រឹតមែនទែន ពីព្រោះនៅក្នុងក្រសែភ្នែកមហាជនដែលចូលរួមទស្សនាដ៏ច្រើនកុះករ គណៈកម្មការមិនមែនចេះតែវាយតម្លៃនោះទេ ។ ម្យ៉ាងវិញទៀត គណៈកម្មការដែលចូលរួមវាយតម្លៃការប្រកួតលើវិញ្ញាសានេះក៏មានជនបរទេសម្នាក់ដែរ ដែលគាត់ជាអ្នកជំនាញល្បីឈ្មោះមួយរូបដែរក្នុងការងារក្រឡុកស្រា និងភេសជ្ជៈ ដែលនេះរឹតតែបង្ហាញភាពសុក្រឹត ត្រឹមត្រូវ យុត្តិធម៌សម្រាប់មហាជន និងសម្រាប់បេក្ខជន ។ ជាមួយគ្នានោះ លោក ឡី សុភាពនាយក សាលាទេសចរណ៍ និងបដិសណ្ឋារកិច្ច កម្ពុជាបានកោតសរសើរចំពោះរាជរដ្ឋាភិបាលកម្ពុជាក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី ដែលបានខិតខំថែរក្សាការពារសុខសន្តិភាពគួបផ្សំនឹងការខិតខំរបស់ក្រ សួងទេសចរណ៍ ក្រោមការដឹកនាំរបស់លោករដ្ឋមន្ត្រី ថោង ខុន ផងនោះធ្វើឱ្យភ្ញៀវទេសចរ អន្តរជាតិជាច្រើននាក់បានចូលមកទស្សនាកម្ពុជា និងមានការកើនឡើងជារៀងរាល់ឆ្នាំក្នុងនោះវិស័យទេសចរណ៍កម្ពុជាក៏ត្រូវបានផ្សព្វផ្សាយទៅកាន់ទីផ្សារអន្តរជាតិយ៉ាងទូលំទូលាយ ។
ប្រការនេះបានជំរុញឱ្យមានតម្រូវការការងារក្នុងវិស័យទេសចរណ៍កាន់តែច្រើនឡើងៗដូច្នេះហើយបានជាសាលាទេសចរ និងបដិសណ្ឋារកិច្ចកម្ពុជាកំពុងតែជំរុញការបណ្ដុះបណ្ដាលជំនាញម្ហូបអាហារ និងភេសជ្ជៈ ក៏ដូចជាជំនាញក្រឡុកស្រា និងភេសជ្ជៈនេះជាដើម ៕
ចែករំលែកព័តមាននេះ