ខេត្តរតនគីរី ៖ កម្មករសំណង់ម្នាក់កំពុងឈរធ្វើការ ស្រាប់តែត្រូវខ្សែភ្លើងឆក់បណ្តាលឱ្យរងរបួសធ្ងន់ធ្ងរ ហេតុការណ៍នេះបានកើតឡើងកាលពីម៉ោង៨និង៤០នាទីព្រឹក ថ្ងៃទី១៧ ខែកញ្ញា ឆ្នាំ២០១៨ នៅចំណុចកែងការ៉ាស់សាំង ស្ថិតក្នុងភូមិអូកន្សែង សង្កាត់អូកន្សែង ក្រុងបានលុង ។
បើតាមរបាយការណ៍សមត្ថកិច្ចមូលដ្ឋានបានឱ្យដឹងថា ជនរងគ្រោះខាងលើឈ្មោះជ្រឿន រុំ អាយុ៣៥ឆ្នាំ មុខរបរជាកម្មករសំណង់ រស់នៅភូមិ-ឃុំកន្លែងកើតហេតុខាងលើ។
សមត្ថកិច្ចដដែលបន្តទៀតថា តាមការរៀបរាប់ពីសំណាក់កម្មករសំណង់ដូចគ្នាថា នៅមុនពេលកើតរឿងនឹងជនរងគ្រោះកំពុងឈរធ្វើការនៅជិតបង្គោលភ្លើងខ្សែមេធំមួយប្រហែលជាកន្លះម៉ែត្រ ទើបធ្វើឱ្យភ្លើងឆក់សន្លប់បាត់បង់ស្មារតីនៅនឹងកន្លែងកើតហេតុ បណ្តាលឱ្យរងរបួសយ៉ាងធ្ងន់ធ្ងរតែម្តង ។
ក្រោយពីមានរឿងនេះកើតឡើង ត្រូវបានសមត្ថកិច្ចមូលដ្ឋាន និងកម្មករសំណង់បាននាំគ្នាដឹកជនរងគ្រោះទៅមន្ទីរពេទ្យបង្អែកខេត្ត ដើម្បីជួយសង្គ្រោះ ។ សមត្ថកិច្ចដដែលបញ្ជាក់ថា ជនរងគ្រោះមិនបានស្លាប់នោះទេ ហើយបច្ចុប្បន្ននេះជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្ត ។
ចែករំលែកព័តមាននេះ