រាជធានីភ្នំពេញ ៖ បុរសម្នាក់បើកម៉ូតូលឿនជែងរថយន្ត និងម៉ូតូផ្សេងៗ រួចជ្រុលទៅបុកម៉ូតូមួយគ្រឿងទៀត បណ្តាលឲ្យស្លាប់ម្នាក់ និងរងរបួសធ្ងន់ម្នាក់ បង្កឲ្យមានការភ្ញាក់ផ្អើលកាលពីវេលាម៉ោង៦និង២០នាទីយប់ថ្ងៃទី ១៦ខែកញ្ញាឆ្នាំ ២០១៨ តាមបណ្ដោយផ្លូវជាតិលេខ៤ ស្ថិតនៅភូមិគល់ សង្កាត់កន្ទោក ខណ្ឌពោធិ៍សែនជ័យ ជាប់ព្រំប្រទល់ស្រុកអង្គស្នួល ខេត្តកណ្តាល។
ជនរងគ្រោះដែលស្លាប់ឈ្មោះ បុល មករា ភេទប្រុស អាយុ២០ឆ្នាំ មុខរបរកម្មករសំណង់ រស់នៅភូមិ ស្តុក ឃុំមានជ័យ ស្រុកឧដុង្គ ខេត្តកំពង់ស្ពឺ ម៉ូតូរបស់ជនរងគ្រោះម៉ាកអឹមអេសអិច (MSX) ពណ៌ត្រួយចេកខ្ចី ពាក់ស្លាកលេខ កំពង់ស្ពឺ ១J-០៦៥១ ។ ចំណែកម៉ូតូមួយគ្រឿងទៀតម៉ាកហុងដាឌ្រីម ពណ៌ខ្មៅ បើកបរដោយបុរសម្នាក់ បានរងរបួសធ្ងន់បាក់ជើងជាច្រើនកំណាត់។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុគេឃើញម៉ូតូម៉ាក អឹមអេសអិច ពណ៌ត្រួយចេកខ្ចី បើកបរដោយបុរសម្នាក់ក្នុងទិសដៅពីលិចទៅកើតក្នុងល្បឿនយ៉ាងលឿនបានជែងរថយន្តជាច្រើនគ្រឿង ព្រមទាំងម៉ូតូដែលជិះស្របទិសគ្នាទៀត បន្ទាប់មកម៉ូតូម៉ាកអឹមអេសអិចខាងលើបានរេចង្កូតទៅបុកពេញទំហឹងជាមួយម៉ូតូមួយគ្រឿងម៉ាកហុងដាឌ្រីម ពណ៌ខ្មៅ បើកបរក្នុងទិសដៅបញ្ច្រាស
ទិសគ្នា បណ្ដាលឲ្យស្លាប់នៅកន្លែងកើតហេតុម្នាក់ នឹងម្នាក់ទៀត រងរបួសបាក់ជើងជាច្រើនកំណាត់។
បន្ទាប់មកជនរងគ្រោះរងរបួសធ្ងន់ខាងលើត្រូវបានរថយន្តសង្គ្រោះដឹកយកទៅសង្គ្រោះភ្លាមៗនៅមន្ទីរពេទ្យផងដែរ តែដោយសារតែជនរងគ្រោះរងរបួសធ្ងន់ពេក មន្ទីរពេទ្យឯកជនខាងលើបានបញ្ជូនជនរងគ្រោះទៅមន្ទីរពេទ្យព្រះកុសុមៈដើម្បីព្យាបាលបន្ត។
ប្រភពនៅកន្លែងកើតហេតុបានបន្តទៀតថា ពេលដែលក្រុមគ្រួសារជនរងគ្រោះរបួសធ្ងន់នោះបានឃើញម៉ូតូប្អូនរបស់ខ្លួនគ្រោះថ្នាក់ជាមួយម៉ូតូម៉ាកអឹមអេសអិច ដែលស្លាប់នៅកន្លែងកើតហេតុនោះ ក្រុមគ្រួសាររងគ្រោះខាងលើបាននាំគ្នាលើកម៉ូតូចេញពីកន្លែងកើតហេតុដោយប្រាប់ថា ប្អូនរបស់ខ្លួនមិនបានបុកជាមួយនិងម៉ូតូអឹមអេសអិចឡើយ ដោយប្អូនរបស់ខ្លួនបុកជាមួយរថយន្តផ្សេងទេ បន្ទាប់មកប្រជាពលរដ្ឋបានប្រាប់ថា ម៉ូតូជនរងគ្រោះខាងលើគឺបុកជាមួយម៉ូតូម៉ាកអឹមអេសអិចដែលបណ្តាលឱ្យបុរសម្នាក់ស្លាប់ខាងលើ បន្ទាប់មកទើបទុកម៉ូតូវិញ។
ក្រោយពេលកើតហេតុ ជំនាញចរាចរខណ្ឌពោធិ៍សែនជ័យបានប្រគល់ឱ្យខាងជំនាញរាជធានីភ្នំពេញដើម្បីធ្វើការវាស់វែង និងយកម៉ូតូទាំងពីរគ្រឿងទៅរក្សាទុកនៅផ្នែកជំនាញចរាចរណ៍រាជធានីភ្នំពេញដើម្បីរង់ចាំការដោះស្រាយ ចំណែកឯសពត្រូវបានសមត្ថកិច្ចធ្វើលិខិតប្រគល់ឱ្យក្រុមគ្រួសារដើម្បីយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ