ខេត្តសៀមរាប ៖ ឧបទ្ទវហេតុបាក់ប្លង់សេសំណង់បេតុងមួយនាវេលាកណ្តាលអធ្រាត្រ បានបណ្តាលឲ្យកម្មករសំណង់ម្នាក់ស្លាប់ក្រោមគំនរបេតុងដែលបាក់សង្កត់ និង៤នាក់ទៀតរងរបួសធ្ងន់ ។ គ្រោះអកុសលនេះ កើតឡើង កាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១៦…
ខេត្តសៀមរាប ៖ ឧបទ្ទវហេតុបាក់ប្លង់សេសំណង់បេតុងមួយនាវេលាកណ្តាលអធ្រាត្រ បានបណ្តាលឲ្យកម្មករសំណង់ម្នាក់ស្លាប់ក្រោមគំនរបេតុងដែលបាក់សង្កត់ និង៤នាក់ទៀតរងរបួសធ្ងន់ ។ គ្រោះអកុសលនេះ កើតឡើង កាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១៦ ខែកញ្ញា នៅអតីតហាងស៊ុបនាគ ដែលកំពុងជួសជុលបានជិត១៥ថ្ងៃ ស្ថិតក្នុងបរិវេណផ្សាររាត្រីផាប់ស្ទ្រីត ផ្លូវលេខ៨ ក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ។
ក្រៅពីមនុស្សស្លាប់និងរបួស ម៉ូតូចំនួន៣គ្រឿង ក៏បានខូចខាតដែរ និងបង្កឱ្យមានការភ្ញាក់ផ្អើលដល់ភ្ញៀវបរទេស ដែលកំពុងរាំរែកសប្បាយរត់បាតជើងសព្រាត ព្រោះតែមិនដឹងរឿងច្បាស់ ព្រោះពេលបាក់ប្លង់សេមួយសន្លឹកនេះលាន់ឮខ្លាំងណាស់ រញ្ជួយញ័រដី ។ តាមអ្នកនៅតំបន់ផាប់ស្ទ្រីតនេះបានប្រាប់ កោះសន្តិភាពថា មុនពេលកើតហេតុពួកគាត់កំពុងបម្រើភ្ញៀវបរទេសដែលមានហាងនៅម្ខាងផ្លូវនៃអគារដែលបាក់ជាអតីតហាងស៊ុបនាគ ។
ខណៈនោះស្រាប់តែឮសូររលំប្រាវរង្គើដី លុះនាំគ្នាក្រឡេកមើលទៅ ឃើញកម្មករសំណង់ដែលដេកនៅក្នុងនោះខ្លះរត់ចេញមកក្រៅ និងខ្លះស្រែកយំរំពងថា ពួកខ្ញុំស្លាប់អស់ហើយនៅក្នុងអគារដែលបាក់នោះ ។តាមប្រភពពីសមត្ថកិច្ចបានប្រាប់ថា អគារដែលបាក់នេះមកពីមេជាងស្ទើរភ្លើងធ្វើខុសបច្ចេកទេស ។ កាលណាធ្វើផ្ទះត្រូវបុកគ្រឹះ ហើយចាក់ធ្នឹម ទើបអាចចាក់ប្លង់សេពីលើបាន ប៉ុន្តែប្រហែលមេជាងគិតថាម្ចាស់ហាងស៊ុបនាគ ចាក់គ្រឹះពីមុនហើយ បានជាមិនបានគិតអ្វីក្រៅពីចាក់ប្លង់សេ។
ការជួសជុលនេះមានកម្មករទាំងអស់ជាង៣០នាក់ ។ ប្រភពដដែលបន្តថា ការសាងសង់ខុសបច្ចេកទេសនេះ គឺមកពីមេជាងមើលការខុសត្រូវមិនបានដិតដល់ ទើបធ្វើឱ្យអគារមួយនេះរលំបាក់សង្កត់មនុស្សស្លាប់និងរបួស ខណៈកំពុងដេកលក់កណ្តាលអធ្រាត្រ ។
ប្រភពព័ត៌មានឲ្យដឹងថា ជនរងគ្រោះដែលស្លាប់និងរបួសមាន ៖១-ឈ្មោះ ខុម សុពេជ្រ ភេទប្រុស អាយុ១៥ឆ្នាំ ជាសិស្ស មកស៊ីឈ្នួលធ្វើសំណង់ទើបបានប្រហែល៩ថ្ងៃ ព្រោះសាលាវិស្សមកាល ស្លាប់ ២-ឈ្មោះ ឌី សុណា ភេទប្រុស អាយុ២៧ឆ្នាំ ត្រូវថ្មសង្កត់ចំទ្រូងរបួសធ្ងន់។៣-ឈ្មោះ មឿ ម៉េត ភេទប្រុស អាយុ៣០ឆ្នាំ ត្រូវចំក្បាល ជង្គង់ និងទ្រូងរបួសធ្ងន់ ។ ៤-ឈ្មោះ សល់ សេក ភេទប្រុស អាយុ២៧ឆ្នាំ ត្រូវចំក្បាលនិងទ្រូង និង៥-ឈ្មោះ ម៉ត់ រី ភេទប្រុស អាយុ១៨ឆ្នាំ ត្រូវចំជើង ចង្កេះ និងភ្នែកសុទ្ធតែរបួសធ្ងន់ ។ ជនរងគ្រោះទាំង៥នាក់ មានស្រុកកំណើតនៅឃុំត្រីញ័រ ស្រុកពួក ខេត្តសៀមរាប ។
នៅក្នុងឧបទ្ទវហេតុនេះ ម៉ូតូចំនួន៣គ្រឿងរបស់កម្មករសំណង់ក៏រងការខូចខាតដែរ ។ រីឯមេជាងសំណង់ឈ្មោះ ជា ភេទប្រុស អាយុប្រហែលជាង៤០ឆ្នាំ រស់នៅស្រុកពួក បានចេញមុខធានាសងសំណងជំងឺចិត្តទៅគ្រួសារអ្នកស្លាប់ចំនួន៣.៥០០ដុល្លារ ។ ចំណែកកម្មករដែលរងរបួសកំពុងព្យាបាលនៅមន្ទីរពេទ្យនោះ នៅមិនទាន់បានដឹងពីការសងសំណងចំនួនប៉ុន្មានទេ ប៉ុន្តែក្រុមគ្រួសារបានទាមទារសំណងក្នុងម្នាក់៣.០០០ដុល្លារ ។
សពជនរងគ្រោះ ត្រូវបានសមត្ថកិច្ចប្រគល់ឱ្យម្តាយឈ្មោះ ជួន ឡប អាយុ៤៨ឆ្នាំ ជាកសិកររស់នៅឃុំ
ត្រីញ័រ ស្រុកពួក យកទៅធ្វើបុណ្យតាមប្រពៃណី ។ ចំណែកអ្នករបួសធ្ងន់ទាំង៤នាក់ ់កំពុងសម្រាកព្យាបាលនៅមន្ទីរព្យាបាល ស៊ឹង រិទ្ធីរ៉េត ស្ថិតនៅតាមផ្លូវជាតិលេខ៦ ភូមិបន្ទាយចាស់ សង្កាត់ស្លក្រាម ក្រុងសៀម
រាប ដែលក្រុមគ្រូពេទ្យកំពុងជួយសង្គ្រោះយ៉ាងយកចិត្តទុកដាក់ផងដែរ ៕
ចែករំលែកព័តមាននេះ