ប្រទេសចិន ៖ មហាព្យុះទីហ្វុងឈ្មោះមង្ឃុត ជាព្យុះខ្លាំងជាងគេបំផុតប្រចាំឆ្នាំ នាថ្ងៃទី១៦កញ្ញា កំពុងបោកបក់សំដៅមកកាន់បណ្ដាតំបន់ឆ្នេរសមុទ្រដែលមានមនុស្សរស់នៅច្រើនកុះករនាភាគខាងត្បូងចិន ក្រោយវាយប្រហារលើភាគខាងជើងហ្វ៊ីលីពីន បណ្ដាលឲ្យមនុស្សស្លាប់យ៉ាងតិច២៥នាក់ ហើយបង្ខំឲ្យប្រជាជនជាង១០០.០០០នាក់ជម្លៀសចេញពីផ្ទះសម្បែងមក។
ព្យុះមង្ឃុតបោកបក់ឆ្ពោះទៅតំបន់មួយស្ថិតនៅមិនឆ្ងាយពីដែនដីហុងកុង ដែលនៅទីនោះខាងផ្នែកឧតុនិយមស្នើដល់ប្រជាជនឲ្យមានការប្រុងប្រយ័ត្ន ដោយលើកពីការគំរាមកំហែងខ្លាំងរបស់ព្យុះនេះ សម្រាប់បណ្ដាតំបន់ឆ្នេរសមុទ្រភាគខាងត្បូងចិន។
ក្រោយចាកចេញពីដែនដីហ្វ៊ីលីពីនព្យុះនេះ នៅមានកម្លាំងខ្លាំងនៅឡើយជាមួយខ្យល់ក្នុងល្បឿន១៤៥គីឡូម៉ែត្រក្នុងមួយម៉ោង ឬរហូតដល់១៨០គីឡូម៉ែត្រក្នុង១ម៉ោង។ ព្យុះមង្ឃុតនេះអាចពង្រឹងកម្លាំងពេលបោកបក់កាត់ពីលើទឹកក្ដៅនៃសមុទ្រចិនខាងត្បូង។
ប្រជាជនក្រុងហុងកុងក៏ដូចជាប្រជាជនម៉ាកាវ បានលើកគ្នាដើរប្រមូលទិញរបស់របរចាំបាច់នានាបម្រុងទុក មុនពេលព្យុះនោះមកដល់។ ហើយក្រុមហ៊ុនអាកាសចរណ៍ហុងកុង KATHAY PACIFIC គ្រោងលុបចោលជើងហោះហើររបស់យន្តហោះប្រមាណជាជាង៤០០ជើងនា៣ថ្ងៃខាងមុខនេះ។
ចំណែកនៅចិនវិញ ដើម្បីជាការបង្ការប្រឈមមុខនឹងមហាព្យុះនោះ បានជម្លៀសមនុស្សចេញប្រមាណជា៥០.០០០នាក់ ហើយអំពាវនាវដល់បណ្ដានាវាឲ្យប្រញាប់វិលចូលបណ្ដាកំពង់ផែ។
នៅភាគខាងជើងកោះលូហ្សុងជាកោះធំជាងគេបំផុតរបស់ហ្វ៊ីលីពីន ប្រជាជនប្រមាណជា៤លាននាក់ កាលពីថ្ងៃទី១៥កញ្ញាស្ថិតនៅមុខព្យុះនេះ ដែលបោកបក់តាមកន្លែងខ្លះក្នុងល្បឿនដល់ទៅ៣៣០គីឡូម៉ែត្រក្នុង១ម៉ោង។ចំនួនមនុស្សស្លាប់នឹងមានការកើនឡើងពី១ម៉ោងទៅ១ម៉ោង។សម្រាប់ពេលនេះគេរាប់ឃើញមនុស្សស្លាប់២៥នាក់ ចំណែកមនុស្សជាង១០៥.០០០នាក់ចាកចេញពីផ្ទះសម្បែង៕
ចែករំលែកព័តមាននេះ