រាជធានីភ្នំពេញ ៖ ជនសង្ស័យម្នាក់ខណៈកំពុងធ្វើសកម្មភាពលួចឈើដាក់លើរ៉ឺម៉ក់នោះ ស្រាប់តែម្ចាស់ឃើញក៏ចាប់ឃាត់ខ្លួនយកមកប្រគល់ឱ្យសមត្ថកិច្ចប៉ុស្តិ៍ដើម្បីសាកសួរ ហេតុការណ៍នេះកាលពីម៉ោង៧យប់ថ្ងៃទី១៥ កញ្ញា ២០១៨ នៅចំណុចដីឡូទំនេរក្បែរការដ្ឋានសំណង់ផ្លូវបេតុង ស្ថិតក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ។
ជនសង្ស័យខាងលើឈ្មោះ ស៊ុន សារិទ្ធ ហៅរិទ្ធ អាយុ៣៥ឆ្នាំ មុខរបរមិនពិតប្រាកដ ស្នាក់នៅចល័តដេកតាមរ៉ឺម៉ក់ មានស្រុកកំណើតក្នុងភូមិចេក ឃុំចេក ស្រុកស្វាយជ្រុំ ខេត្តស្វាយរៀង។ ចំណែកម្ចាស់ឈើឈ្មោះ ឃៀង រិទ្ធី អាយុ៣៩ឆ្នាំ ជាមេការសំណង់ ស្នាក់នៅក្នុងការដ្ឋានសំណង់ផ្លូវបេតុង ក្រុម១ ស្ថិតក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ។
ប្រភពពីកន្លែងកើតហេតុឱ្យដឹងថា មុនពេលកើតហេតុ ម្ចាស់ឈើជាដណ្តើមកំពុងតែនៅក្នុងការដ្ឋាន ស្រាប់តែមានបុរសម្នាក់ឈ្មោះហៀង វន្ថា រត់មកប្រាប់ថា ឃើញជនសង្ស័យម្នាក់កំពុងលួចឈើនៅក្នុងដីឡូតិ៍ ដោយលើកដាក់លើរ៉ឺម៉ក់ ពេលនោះគាត់ក៏នាំគ្នាមកចាប់ជនសង្ស័យខាងលើជាក់ស្តែង និងយកមកប្រគល់ឱ្យសមត្ថកិច្ចដើម្បីធ្វើការសាកសួរតែម្តង។
នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានធ្វើសកម្មភាពលួចឈើខាងលើពិតប្រាកដមែន។ បច្ចុប្បន្នជនសង្ស័យត្រូវបញ្ជូនខ្លួនទៅសាកសួរបន្តនៅអធិការដ្ឋាននគរបាលខណ្ឌសែនសុខហើយ៕
ចែករំលែកព័តមាននេះ