ព្រំដែនព្រះវិហារ ៖ បើតាមអគ្គមេបញ្ជាការរងនៃកងយោធពលមខេមរភូមិន្ទកម្ពុជា លោកនាយឧត្តមសេនីយ៍ផ្កាយមាស៤ ជា តារា បានឱ្យដឹងថា ទាហានសៀមបានរុះរើ និងដកបន្លាលួស ដែលពួកគេបានដាក់ពង្រាយនៅមាត់ច្រកខ្លោងទ្វារដែកមុខប្រាសាទព្រះវិហារនោះវិញហើយ ។ គួរបញ្ជាក់ថា កាលពីវេលាម៉ោងជាង៨ព្រឹកថ្ងៃទី២០ មីនា ម្សិលមិញនេះ ពួកទាហានឈុតខ្មៅសៀម៧នាក់ បានធ្វើការដាក់ពង្រាយលួសបន្លានៅមុខប៉ុស្តិ៍ប៉ូលិសកម្ពុជា ស្ថិតនៅមាត់ច្រកខ្លោងទ្វារដែកមុខប្រាសាទព្រះវិហារ ។
ការពង្រាយនេះ ខាងកម្ពុជាបានមានប្រតិកម្មយ៉ាងខ្លាំងចំពោះទង្វើរបស់ទាហានឈុតខ្មៅសៀម ដោយត្រូវឱ្យពួកគេរុះរើចេញវិញ តែពួកទាហានសៀមនេះអត់រុះរើទេ ដោយគ្រាន់តែផ្អាកការពង្រាយលួសបន្លានេះប៉ុណ្ណោះ ខណៈពួកគេពង្រាយបានប្រវែង៦០ម៉ែត្រ រួចមកនោះ ។ នៅវេលាម៉ោង១រសៀល កងទ័ពកម្ពុជាបានប្រកាសថា បើពួកគេមិនបញ្ឈប់ទេ នឹងមានការផ្ទុះអាវុធ ហើយចំពោះមូលហេតុដែលពួកទាហានសៀមឈុតខ្មៅយកលួសបន្លាមកពង្រាយនេះពួកគេអាចត្រឹមតែនិយាយថា មេប្រើឱ្យមកពង្រាយ ។ ថ្លែងប្រាប់កោះសន្តិភាពតាមទូរស័ព្ទពីមុខច្រកទ្វារដែកប្រាសាទព្រះវិហារនៅព្រឹកថ្ងៃចន្ទ ទី២១ មីនា នេះ លោកនាយឧត្តមសេនីយ៍ជា តារា បានមានប្រសាសន៍ថា ការដាក់ពង្រាយបន្លាលួសនេះ ទាហានសៀមអាចធ្វើនៅលើទឹកដីគេតែប៉ុណ្ណោះ ប៉ុន្តែបើនៅលើទឹកដីកម្ពុជាគឺមិនអនុញ្ញាតជាដាច់ខាត ហើយតាមបទបញ្ជារបស់សម្តេចតេជោហ៊ុន សែន ប្រសិនបើទាហានសៀមរំលោភឈ្លានពានត្រូវតែកម្ទេច ។
ទោះជាយ៉ាងណា លោកជា តារា បានបញ្ជាក់ឱ្យដឹងនៅថ្ងៃទី២១ មីនា នេះដែរថា ស្ថានភាពយោធានៅព្រឹកនេះមានសភាពស្ងប់ស្ងាត់ជាធម្មតា ប៉ុន្តែកម្លាំងកម្ពុជានៅតែប្រុងជើងការជានិច្ចដោយគោរពតាមបទបញ្ជារបស់សម្តេចអគ្គមហាសេនាបតីតេជោហ៊ុន សែន គឺមិនឈ្លានពានគេ ហើយក៏មិនអនុញ្ញាតឱ្យបាត់បង់ដីសូម្បីតែមួយមីល្លីម៉ែត្រ ៕
ចែករំលែកព័តមាននេះ