ខេត្តមណ្ឌលគិរី ៖ បើតាមសេចក្តីរាយការណ៍បានឲ្យដឹងថា រថយន្តធុនយក្សចំនួន១៣គ្រឿងបានដឹកឈើប្រភេទលេខ១ លេខ២ ចេញពីស្រុកកោះញែក ខេត្តមណ្ឌលគិរី កាលពីយប់ថ្ងៃទី១៥ ឈានចូលថ្ងៃទី១៦ កញ្ញា…
ខេត្តមណ្ឌលគិរី ៖ បើតាមសេចក្តីរាយការណ៍បានឲ្យដឹងថា រថយន្តធុនយក្សចំនួន១៣គ្រឿងបានដឹកឈើប្រភេទលេខ១ លេខ២ ចេញពីស្រុកកោះញែក ខេត្តមណ្ឌលគិរី កាលពីយប់ថ្ងៃទី១៥ ឈានចូលថ្ងៃទី១៦ កញ្ញា ២០១៨ ដែលឈើទាំងអស់នោះត្រូវគេអះអាថា បានប្រមូលដឹកចេញពីដីសម្បទានសង្គមកិច្ចអតីតយុទ្ឋជន ក្នុងឃុំស្រែហ៊ុយ។
យោងតាមលិខិតអនុញ្ញាតដែលចេញដោយមន្ទីរកសិកម្ម រុក្ខា ប្រមាញ់ និងនេសាទបង្ហាញថា «អនុញ្ញាតឲ្យឈ្មោះ សាំង សុខុន តំណាងឧកញ៉ា ស្រ៊ុន ម៉េងលាង ដឹកជញ្ជូនផលអនុផល ឈើអារលេខ២ ចេញពីចំណុចរោងម៉ាស៊ីនសម្រាប់កែច្នៃឈើ នៃរដ្ឋបាលព្រៃឈើសង្កាត់ស្រែសង្គម ឆ្ពោះទៅភូមិកោះរកា ឃុំព្រែកអញ្ចាញ ស្រុកមមុខកំពូល ខេត្តកណ្តាល»។
បើតាមការបញ្ជាក់ពីលោក អ៊ុំ វណ្ណសុភៈ នាយខណ្ឌរដ្ឋបាលព្រៃឈើមណ្ឌលគិរីឲ្យអ្នកកាសែតដឹងថា «ឈើទាំងនោះជាឈើរបស់ឧកញ៉ា ស្រ៊ុន ម៉េងលាង មានច្បាប់អនុញ្ញាតត្រឹមត្រូវ ដោយគេបានបង់ពន្ឋចូលរដ្ឋហើយ.. .ឈើទាំងនេះគេដឹកចេញពីដីសម្បទាននៅស្រុកកោះញែក…ទាំងអស់១៣គ្រឿង…មានឈ្មោះខុន ជាអ្នករត់ផ្លូវ…»។
ចំណែកក្រុមអ្នកតាមដានបរិស្ថានលើកឡើងថា ការចរាចរឈើចេញពីខេត្តមណ្ឌលគិរី បានស្ងប់ស្ងាត់រយៈពេលខ្លី បន្ទាប់ពីក្រសួងទីស្តីការគណៈរដ្ឋមន្ត្រីចេញសេចក្តីប្រកាសព័ត៌មានឲ្យបញ្ឈប់គ្រប់សកម្មភាពនៃការដឹកជញ្ជូន ឬឈូសឆាយដីព្រៃប្រភេទ រហូតមានសេចក្តីសម្រេចថ្មីក្រោយពេលបោះឆ្នោត។ លុះនៅពេលថ្មីៗនេះ ប្រមុខរាជរដ្ឋាភិបាលបានចេញសម្រេចតបតាមការស្នើសុំរបស់រដ្ឋមន្ត្រីក្រសួងបរិស្ថាន ដើម្បីអនុញ្ញាតឲ្យក្រុមហ៊ុនទាំងអស់អាចធ្វើសកម្មភាពប្រមូល និងដឹកជញ្ជូនឈើចេញពីដែនដីសម្បទានទាំងអស់ឡើងវិញ ដើម្បីបង់ពន្ឋចូលរដ្ឋ។
ប្រភពខាងលើបន្តថា ភ្លាមៗបន្ទាប់ពីមានការអនុញ្ញាតវិញ គេសង្កេតឃើញថា ឈ្មោះ សាំង សុខុន តំណាងឲ្យឧកញ៉ា ស្រ៊ុន ម៉េងលាង នឹងត្រូវជាប្អូនរបស់ឧកញ៉ា សឹង្ហ សំអុល ដែលកន្លងមកល្បីនាំឈើទៅស្រុកយួន បានទំនាក់ទំនងគ្រប់ស្ថាប័នជំនាញ ដើម្បីអាចដឹកឈើចេញទៅតាមអ្វីដែលគេរំពឹងទុកជាយូរ ព្រោះតែផ្អាកសកម្មភាពអស់មួយអន្លើទៅហើយនោះ។
ក្រុមអ្នកតាមដានបរិស្ថានបន្តថា ព្រៃឈើនៅខេត្តមណ្ឌលគិរី បានបាត់បង់ជាបន្តបន្ទាប់ ព្រោះតែសកម្មភាពរបស់ក្រុមហ៊ុន ទទួលសិទ្ធិដីសម្បទាន ច្រើនតែប្រើរូបមន្តកន្លេលធំបន្លំដេក ហើយព្រៃឈើដែលរងនូវការបំផ្លាញធ្ងន់ធ្ងរបំផុតនោះរួមមាន តំបន់ដែនជម្រកការពារសត្វព្រៃកែវសីមា ដែនជម្រកការពារសត្វព្រៃភ្នំព្រេច-លំផាត់ ដែនជម្រកការពារសត្វព្រៃស្រែពក និងដែនជម្រកការពារសត្វព្រៃភ្នំណាំលៀរ។
ព័ត៌មានពិស្តានឹងមានផ្សាយជូនលើកាសែតកោះសន្តិភាព
ចែករំលែកព័តមាននេះ