រាជធានីភ្នំពេញ ៖ រថយន្តពីរគ្រឿងបើកលឿនដូចគ្នាបានមកបុកគ្នាយ៉ាងពេញទំហឹង នៅស្តុបសន្ធរមុខ បណ្ដាលឲ្យរថយន្តខូចខាតខ្ទេចមុខដូចគ្នា ចំណែកអ្នកបើករថយន្តទាំងសងខាងរងរបួសបាននាំគ្នាទៅពេទ្យរៀងខ្លួន បន្សល់ទុកតែរថយន្តនៅកន្លែងកើតប៉ុណ្ណោះ ។ ហេតុការណ៍ខាងលើនេះបានបង្កការភ្ងាក់ផ្អើល កាលពីវេលាម៉ោង១និង៥០នាទីឈានចូលថ្ងៃទី១៦ ខែកញ្ញា ឆ្នាំ២០១៨ នៅចំណុចស្តុបសន្ធរមុខ សង្កាត់ទឹកល្អក់១ ខណ្ឌទួលគោក ។
ប្រភពព័ត៌មានពីប្រជាពលរដ្ឋដែលបានឃើញហេតុការគ្រោះថ្នាក់បានប្រាប់ឲ្យដឹងថា នៅមុនពេលកើតហេតុគាត់ឃើញរថយន្តម៉ាកព្រុស ពណ៌ទឹកប្រាក់ ពាក់ស្លាកលេខភ្នំពេញ 2AJ- 0583 បើកបរដោយនារី ដែលធ្វើដំណើរតាមបណ្ដាយផ្លូវម៉ៅសេទុងពីជើងទៅត្បូងដោយល្បឿនលឿនគួរសម ពេលមកដល់ស្តុបសន្ធរមុខ គឺរថយន្តបត់ស្ដាំក៏បានជ្រុលចង្កូតទៅបុករថយន្តឡិចស៊ីសមួយគ្រឿង ពាក់ស្លាកលេខភ្នំពេញ 2U- 6899 បើកបរដោយបុរសម្នាក់ធ្វើដំណើរតាមបណ្ដាយផ្លូវកម្ពុជាក្រោម ពីលិចទៅកើត បណ្ដាលឲ្យខូចខាតរថយន្តខ្ទេចមួយកំណាត់មុខ និងផ្ទុះពាងសុវត្ថិភាព ហើយរថយន្តព្រុសក៏ខូចខាតដូចគ្នា ។
ក្រោយមកអ្នកបើករថយន្តមិនបាននិយាយគ្នាទេ ដោយសារតែរងរបួសដូចគ្នាទើបចែកផ្លូវទៅពេទ្យរៀងខ្លួន ដោយបន្សល់ទុកតែរថយន្តនៅកន្លែងកើតហេតុប៉ុណ្ណោះ ។
បន្ចុប្បន្នរថយន្តទាំងពីរគ្រឿងត្រូវបានប៉ូលិសចរាចរណ៍ខណ្ឌទួលគោកប្រគល់ទៅខាងចរាចរណ៍ក្រុងធ្វើការវាស់វែង និងស្ទួចរថយន្តទាំងពីរគ្រឿងយកទៅទុកនៅចរាចរណ៍ក្រុង ដើម្បីទុកឲ្យភាគីទាំងសងខាងទៅដោះស្រាយគ្នាតាមនីតិវិធី ៕
ចែករំលែកព័តមាននេះ