រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ដើមដូងងាប់មួយដើមសុខៗស្រាប់តែបាក់ធ្លាក់មួយកំណាត់សង្កត់ស្ត្រីម្នាក់របួសធ្ងន់ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង២និង១០នាទីរសៀល ថ្ងៃទី១៥ ខែកញ្ញា ឆ្នាំ២០១៨ តាមបណ្តោយផ្លូវជាតិលេខ៥ចំណុចដីឡូតិ៍មួយកន្លែង ស្ថិតក្នុងភូមិ៣ សង្កាត់ច្រាំងចំរេះទី១ ខណ្ឌឬស្សីកែវ ។
សេចក្តីរាយការណ៍បន្តថា ស្ត្រីរងគ្រោះខាងលើឈ្មោះ សុះ អីសះ អាយុ៥០ឆ្នាំ មុខរបរលក់ត្រីងៀត ជនជាតិខ្មែរអ៊ិស្លាម មានលំនៅផ្ទះលេខ៣២១ ក្បែរកន្លែងកើតហេតុ។
តាមប្រភពពីកន្លែងកើតហេតុឱ្យដឹងថា នៅមុនពេលកើតហេតុគេឃើញស្ត្រីរងគ្រោះកំពុងតែហាលត្រីងៀតសុខៗ ស្រាប់តែដើមដូងងាប់មួយដើមដែលមានសភាពពុកបានបាក់ពាក់កណ្តាលដើមធ្លាក់ចុះមកសង្កត់ចំក្បាលស្ត្រីរងគ្រោះតែម្តង បណ្តាលរងរបួសធ្ងន់។ ហើយភ្លាមៗនោះត្រូវក្រុមគ្រួសារបញ្ជូនទៅកាន់មន្ទីរពេទ្យឯកជន ប៉ុន្តែដោយស្ថានភាពធ្ងន់ធ្ងរក្រុមគ្រួសារក៏បញ្ជូនទៅកាន់មន្ទីរពេទ្យកាល់ម៉ែតតែម្តង ដើម្បីសង្គ្រោះ៕
ចែករំលែកព័តមាននេះ