ខេត្តបន្ទាយមានជ័យ ៖ កម្មករសំណង់ម្នាក់ត្រូវដងស្ទូចបាក់សង្កត់ជាប់លើរថយន្ត បណ្តាលឱ្យស្លាប់យ៉ាងអាណោចអាធ័ម និងបង្កភ្ញាក់ផ្អើលកាលពីយប់ថ្ងៃទី១៥ កញ្ញា ២០១៨ នៅការដ្ឋានសំណង់មួយកន្លែងជាប់មាត់អូរព្រំដែន ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត។
ជនរងគ្រោះដែលស្លាប់ឈ្មោះម៉ឺន សុខណាន ភេទប្រុស អាយុ២៤ឆ្នាំ ជាកម្មករសំណង់ ស្នាក់នៅក្នុងភូមិទួលប្រាសាទ សង្កាត់ប៉ោយប៉ែត មានស្រុកកំណើតភូមិត្រពាំងឫស្សី ឃុំជយោ ស្រុកចំការលើ ខេត្តកំពង់ចាម។
ជនរងគ្រោះត្រូវដងស្ទូចលើរថយន្តរបស់ក្រុមហ៊ុនណាហ្កាប៉ោយប៉ែតបាក់សង្កត់ជាប់លើរថយន្តពេលកំពុងស៊ីញ៉ូ ឬបញ្ជាដងស្ទូចលើកបន្ទះស៊ីម៉ង់ត៍ចាក់ស្រេច ដែលភាសាថៃគេហៅ(ផែនភឺន) ដាក់ចុះនៅកន្លែងកើតហេតុ។
ករណីបាក់គល់ដងស្ទូចខាងលើនេះគេសង្ស័យថាដោយសារផ្ទុកលើសទម្ងន់ធ្វើឲ្យបាក់ហើយសង្កត់ជនរងគ្រោះជាប់លើរថយន្តបណ្តាលឲ្យស្លាប់នៅនឹងកន្លែងតែម្តង។
ក្រោយកើតហេតុសាច់ញាតិបានបញ្ជូនជនរងគ្រោះទៅវត្តឃស្ថារាម ហៅវត្តត្រាច ភូមិក្បាលស្ពាន១ ប៉ុន្តែដោយសង្ស័យថា ជនរងគ្រោះមិនទាន់ស្លាប់ សាច់ញាតិក៏ដឹកបន្តទៅមន្ទីរពេទ្យបង្អែកក្រុងប៉ោយប៉ែតលុះក្រុមគ្រូពេទ្យធ្វើការពិនិត្យតាមបច្ចេកទេសប្រាប់ថាជនរងគ្រោះបានស្លាប់បាត់ទៅហើយ។
ករណីខាងលើនេះ ថ្វីត្បិតតែកើតឡើងដោយចៃដន្យ និងជារឿងអចេតនា ប៉ុន្តែប្រភពថាអ្នកបើកបររថយន្តស្ទូចនោះបានគេចខ្លួនបាត់ក្រោយកើតហេតុ។
ជុំវិញករណីនេះ នគរបាលជំនាញប្រាប់តាមទូរស័ព្ទថាសពជនរងគ្រោះត្រូវបានសាច់ញាតិដឹកទៅស្រុកកំណើតដើម្បីធ្វើបុណ្យតាមប្រពៃណី។
ដោយឡែកថយន្តស្ទូចនោះស្ថិតនៅកន្លែងកើតហេតុនៅឡើយមិនអាចយកទៅណាបានទេ ព្រោះខ្លាចមានបញ្ហាថែមទៀតតាមដងផ្លូវពេលយកទៅអធិការដ្ឋាននគរបាលក្រុង។
សមត្ថកិច្ចប្រាប់ថាខាងក្រុមហ៊ុនណាហ្កាប៉ោយប៉ែតរង់ចាំដោះស្រាយជាមួយគ្រួសាររងគ្រោះ មិនគេចវេសឡើយ៕
ចែករំលែកព័តមាននេះ