ខេត្តបន្ទាយមានជ័យ ៖ ម្ចាស់ឱសថស្ថានរងម្នាក់បានលោតពីលើផ្ទះ២ជាន់សម្លាប់ខ្លួន ដែលមានអតិថិជនជាច្រើនបានកោតសសើរទៅលើការផ្សំថ្នាំលេបព្យាបាលជំងឺរបស់គាត់ជាខ្លាំង តែគាត់បែរជាលោតសម្លាប់ខ្លួនបង្កឲ្យមានការភ្ញាក់ផ្អើលដែលហេតុការណ៍នេះបានកើតឡើងនៅវេលាម៉ោង១២ថ្ងៃត្រង់ថ្ងៃទី១៤ ខែកញ្ញា ឆ្នាំ២០១៨ នៅចំណុចឱសថស្ថានសុខសាន្ត (ពេទ្យតឿ) ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
ប្រភពព័ត៌មានពីនគរបាលបានឲ្យដឹងថា ជនរងគ្រោះឈ្មោះ អ៊ិន សំណាង ហៅហេង ឬពេទ្យតឿ ភេទប្រុស អាយុ៦០ឆ្នាំ ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ជាម្ចាស់ឱសថស្ថានរងដែលមានយីហោ សុខសាន្ត ។
ប្រភពដដែលបានបញ្ជាក់ថា តាមការបំភ្លឺគ្រួសារសពនៅកន្លែងកើតហេតុសពមានជំងឺរ៉ាំរៃច្រើនមុខជាយូរឆ្នាំមកហើយបានទៅព្យាបាលជាច្រើនប្រទេស តែមិនជា និងបានណែនាំគាត់ច្រើនដងហើយដែរ ។ មុនពេលគាត់លោតសម្លាប់ខ្លួនក៏មានលិខិតសរសេរដោយដៃមួយសន្លឹក (សងខាង) រៀបរាប់អំពីសុខភាពរបស់គាត់ដែលព្យាបាលមិនជា ហើយពិបាកចិត្តក្នុងការរស់នៅ ។
លោកវរសេនីយ៍ឯក ស៊ី ឌី អធិការនគរបាលក្រុងសិរីសោភ័ណបានឲ្យដឹងថា ស្លាកស្នាមជនរងគ្រោះរងរបួសបាក់ដៃខាងឆ្វេង បាក់ខ្ទង់ច្រមុះ បែកចង្កា ។ តាមការពិនិត្យសពដែលមានការចូលរួមពីគ្រូពេទ្យ និងមន្ត្រីជំនាញជនរងគ្រោះពុំមានស្លាកស្នាមអ្វីក្រៅពីស្លាកស្នាមដែលធ្លាក់ពីលើផ្ទះដូចរៀបរាប់ខាងលើ ហើយចំពោះស្លាកស្នាមអ្វីផ្សេងទៀតដែលសង្ស័យជាអំពើឃាតកម្មនោះ គឺគ្មានឡើយ ។
ការសន្និដ្ឋាន គឺជាករណីធ្វើអត្តឃាតដោយខ្លួនឯង (ដោយលោតពីលើផ្ទះថ្ម) ព្រោះជំងឺរ៉ាំរៃជាច្រើនឆ្នាំព្យាបាលមិនជា ៕
ចែករំលែកព័តមាននេះ