ខេត្តសៀមរាប ៖ ហាងស៊ុបនាគកំពុងជួសជុលបានប្រហែលជិត១៥ថ្ងៃត្រូវបានមេជាងសំណង់ សង់ខុសបច្ចេកទេស បណ្តាលឱ្យរលំបាក់សង្កត់កម្មករសំណង់ដែលសម្រាកនៅក្នុងអាគារនោះស្លាប់ម្នាក់ របួសធ្ងន់៤នាក់ បង្កមានការភ្ញាក់ផ្អើលដល់ភ្ញៀវបរទេសកំពុងរាំរែកសប្បាយ នៅម្តុំផ្សាររាត្រីផប់ស្ទ្រីត រត់បាតជើងសព្រាត ។
ហេតុការភ្ញាក់ផ្អើលនោះកើតឡើងនៅវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១៦ ខែកញ្ញា ឆ្នាំ២០១៨ ស្ថិតនៅក្នុងបរិវេណ ផ្សាររាត្រីផប់ស្ទ្រីត ផ្លូវលេខ៨ ក្នុងភូមិមណ្ឌល១ សង្កាត់ស្វាយដង្គំ ក្រុង-ខេត្តសៀមរាប ។
តាមសាក្សីនៅតំបន់ផប់ស្ទ្រីតនោះបានប្រាប់កោះសន្តិភាពនៅព្រឹកថ្ងៃទី១៦ ខែកញ្ញា ឆ្នាំ២០១៨នេះថា មុនពេលកើតហេតុពួកគាត់កំពុងបំរើភ្ញៀវបរទេសដែលមានហាងនៅម្ខាងផ្លូវម្នាក់ និងអាគារដែលបាក់អតីតហាងស៊ុបនាគ ខណៈពេលនោះពួកគាត់លឺសូរប្រាវក៏នាំគ្នាក្រឡេកទៅឃើញមានកម្មករសំណង់ដែលដេកនៅក្នុងនោះខ្លះរត់ចេញមកក្រៅខ្លះស្រែកយំថា ពួកខ្ញុំស្លាប់អស់ហើយនៅក្នុងអាគារនោះ ។
តាមប្រភពពីសមត្ថកិច្ចបានប្រាប់នៅកន្លែងកើតហេតុថា អាគារនោះបាក់ គឺមកពីមេជាងធ្វើខុសបច្ចេកទេស កាលណាធ្វើផ្ទះត្រូវបុកគ្រឹះ ហើយចាក់ស្នឹមទើបអាចចាក់ប្លង់សេឡើងលើបាន ប៉ុន្តែប្រហែលមេជាងនេះគិតថា ម្ចាស់ផ្ទះ (ហាងស៊ុបនាគ) ចាក់គ្រឹះពីមុនហើយបានជានាំកម្មករទាំងអស់ដែលមានគ្នាប្រហែលជាង៣០នាក់នៅទីនោះ ។ ប្រភពបានបន្តថា ការសាងសង់ខុសបច្ចេកទេសនេះ គឺបណ្តាលមកពីមេជាងមើលការខុសត្រូវមិនបានដិតដល់ ដូច្នេះធ្វើឱ្យអាគារមួយនេះបាក់សង្កត់មនុស្សស្លាប់ម្នាក់ និងរបួសធ្ងន់៤នាក់ផងដែរ ។
ប្រភពបានបញ្ជាក់ថា ជនរងគ្រោះដែលស្លាប់ និងរបួសនោះមានទី១- ឈ្មោះ ខុម សុពេជ្រ ភេទប្រុស អាយុ១៥ឆ្នាំ មុខរបរសិស្ស មកស៊ីឈ្នួលធ្វើសំណង់បានប្រហែលជិត៩ថ្ងៃក៏ត្រូវអាគារបាក់រលំសង្កត់ (ស្លាប់) ទី២- ឈ្មោះ ឌី សុណា ភេទប្រុស អាយុ២៧ឆ្នាំ មុខរបរកម្មករសំណង់ ត្រូវថ្មសង្កត់ចំដើមទ្រូង ទី៣- ឈ្មោះ មឿ ម៉េត ភេទប្រុស អាយុ៣០ឆ្នាំ កម្មករសំណង់ ត្រូវចំក្បាល , ជង្គង់ និងដើមទ្រូង ទី៤- ឈ្មោះ សល់ សេក ភេទប្រុស អាយុ២៧ឆ្នាំ មុខរបរកម្មករសំណង់ត្រូវចំក្បាល និងដើមទ្រូង និងទី៥- ឈ្មោះ ម៉ត់ រី ភេទប្រុស អាយុ១៨ឆ្នាំ មុខរបរកម្មករសំណង់ត្រូវចំជើង , ចង្កេះ និងភ្នែក ។
ជនរងគ្រោះទាំង៥នាក់មានស្រុកកំណើតនៅភូមិធ្វេស ឃុំត្រីញ័រ ស្រុកពួក ខេត្តសៀមរាប ។ ក្នុងនោះខូចខាតម៉ូតូចំនួន៣គ្រឿង របស់កម្មករសំណង់ផងដែរ ។ រីឯមេជាងសំណង់ឈ្មោះ ជា ភេទប្រុស អាយុប្រហែលជាង៤០ឆ្នាំ រស់នៅស្រុកពួក ខេត្តសៀមរាប ត្រូវបានធានាសងសំណងជំងឺចិត្តទៅលើសាកសពម្នាក់ ចំនួន៣៥០០ដុល្លារ ហើយចំពោះជនរងគ្រោះកំពុងដេកពេទ្យនោះមិនទាន់បានដឹងសងចំនួនប៉ុន្មានទេ ប៉ុន្តែក្រុមគ្រួសារជនរងគ្រោះបានទាមទារសំណងម្នាក់៣០០០ដុល្លារផងដែរ ។
បច្ចុប្បន្នសពត្រូវបានសមត្ថកិច្ចប្រគល់ឱ្យម្តាយឈ្មោះ ជួន ឡប ភេទស្រី អាយុ៤៨ឆ្នាំ មុខរបរធ្វើស្រែ រស់នៅភូមិធ្វេស ឃុំត្រីញ័រ ស្រុកពួក ខេត្តសៀមរាបយកទៅធ្វើបុណ្យតាមប្រពៃណី ។ ចំណែកជនរងគ្រោះទាំង៤នាក់ដែលត្រូវរបួសធ្ងន់កំពុងស្ថិតនៅសម្រាកក្នុងមន្ទីរពេទ្យឯកជន ក្រុង-ខេត្តសៀមរាប ដែលត្រូវបានក្រុមគ្រូពេទ្យកំពុងជួយសង្គ្រោះយ៉ាងយកចិត្តទុកដាក់ផងដែរ ៕
ចែករំលែកព័តមាននេះ