រាជធានីភ្នំពេញ ៖ ការតវ៉ារកយុត្តិធម៌របស់បេក្ខជនប្រឡងសញ្ញាបត្រមធ្យមសិក្សាទុតិយភូមិ ដែលកើតទុក្ខមិនសុខចិត្ត ចំពោះលទ្ធផលប្រឡង ដោយសង្ស័យថា អាចមានការខុសឆ្គងលើបញ្ហាកុំព្យូទ័របូកស្រង់ពិន្ទុ ដែលនាំឲ្យសិស្សពូកែគណិតវិទ្យា បែរជាទទួលបាននិទ្ទេសFទៅវិញនោះ ទីបំផុតក្រោយពីក្រសួងអប់រំយុវជននិងកីឡា…
រាជធានីភ្នំពេញ ៖ ការតវ៉ារកយុត្តិធម៌របស់បេក្ខជនប្រឡងសញ្ញាបត្រមធ្យមសិក្សាទុតិយភូមិ ដែលកើតទុក្ខមិនសុខចិត្ត ចំពោះលទ្ធផលប្រឡង ដោយសង្ស័យថា អាចមានការខុសឆ្គងលើបញ្ហាកុំព្យូទ័របូកស្រង់ពិន្ទុ ដែលនាំឲ្យសិស្សពូកែគណិតវិទ្យា បែរជាទទួលបាននិទ្ទេសFទៅវិញនោះ ទីបំផុតក្រោយពីក្រសួងអប់រំយុវជននិងកីឡា បង្កើតគណៈកម្មការធ្វើកោសល្យវិច័យទើបដឹងថា ការតវ៉ារបស់បេក្ខជន គឺជាការត្រឹមត្រូវ ។ នេះ គឺជាលើកដំបូងហើយ ដែលលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) មានការខុសឆ្គងបែបនេះ ហើយបើពុំមានការតវ៉ាទេនោះ ប្រហែលជាមិនដឹងការពិតឡើយ ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានថ្លែងនៅព្រឹកថ្ងៃទី១៤ ខែកញ្ញាថា ក្រសួងសុំទោសចំពោះកំហុសបច្ចេកទេសបានកើតឡើង តែមិនមែនជាចេតនានោះទេ ។ ការប្រកាសលទ្ធផលតាមបណ្តាញសង្គមហ្វេសប៊ុករបស់ក្រសួង គឺនៅថ្ងៃទី១៤ ខែកញ្ញា និងបិទលទ្ធផលនៅតាមមណ្ឌលប្រឡងនានាជាផ្លូវការនៅថ្ងៃទី១៥ ខែកញ្ញាឆ្នាំ២០១៨ ។ លោកថា «ក្រសួងទុករយៈពេល១ខែ សម្រាប់បេក្ខជនដែលមិនពេញចិត្តនឹងលទ្ធផលដាក់ពាក្យប្តឹង» ដូចលើកមុនដែរ ។
ទោះជាយ៉ាងណា លោក រស់ សុវាចា មិនបានឆ្លើយតបនឹងសំណួរដែលបេក្ខជនខ្លះបានសួរថា ពិន្ទុមុខវិជ្ជាគណិតវិទ្យារបស់គេបាន៣៤,១២ តែលទ្ធផលនៅតែធ្លាក់ នៅពេលសិស្សខ្លះបានត្រឹមជាង៣២,៤ បែរជាជាប់ទៅវិញ ។ បេក្ខជនជាយុវតីម្នាក់ អាយុ២០ឆ្នាំ ប្រឡងនៅមណ្ឌលវិទ្យាល័យ ប៊ុន រ៉ានី ហ៊ុន សែន ផ្សារដើមថ្កូវ លើកឡើងថា នាងមិនយល់ដែរ ហេតុមេ៉ចបានជាបែបនេះ? និងមានសិស្សធ្លាក់ច្រើនណាស់ ។
ក្រសួងអប់រំ យុវជន និងកីឡា កាលពីរសៀលថ្ងៃទី១៣ ខែកញ្ញា បានបញ្ជាក់ថា បេក្ខជនដែលប្រឡងជាប់សញ្ញាបត្រមធ្យមសិក្សាទុតិយភូមិឆ្នាំ២០១៨នេះសរុបមាន ៧៦.០៣៤នាក់ ស្មើនឹង៦៧,០៧% ។ បេក្ខជនជាប់និទ្ទេសA មានចំនួន៤០៨នាក់ ដែលមុននេះថាមានតែ២៩០នាក់ ។
ការប្រកាសជាថ្មីនេះ គឺបន្ទាប់ពីមានបេក្ខជនប្រឡងបានដាក់ពាក្យប្តឹងចូលក្រសួងអប់រំប្រមាណ៥០០បណ្តឹង ហើយគណៈកម្មការមួយត្រូវបានបង្កើតឡើងដើម្បីពិនិត្យឡើងវិញ និងរកឃើញថា មានបេក្ខជន៧៤០បន្ទប់ ដែលមុខវិជ្ជាគណិតវិទ្យា មិនត្រូវបានបូកចូលក្នុងលទ្ធផលដោយសារបញ្ហាបច្ចេកទេសកុំព្យូទ័រ។ក្រសួងអប់រំ យុវជន និងកីឡា បានប្រកាសនៅល្ងាចថ្ងៃទី១៣ ខែកញ្ញាថា ក្រសួងបានបង្កើត
គណៈកម្មការកោសល្សវិច័យដើម្បពិនិត្យដោះស្រាយចំពោះការមិនពេញចិត្តនឹងលទ្ធផលប្រឡងសញ្ញបត្រមធ្យមសិក្សាទុតិយភូមិសម័យប្រឡងថ្ងៃទី២០ ខែសីហា ឆ្នាំ២០១៨កន្លងមកនេះ ។ គណៈកម្មការបានរកឃើញថា ដំណើរការស្រង់ពិន្ទុតាមប្រព័ន្ធកុំព្យូទ័រមានបញ្ហាបច្ចេកទេស បានប៉ះពាល់ដល់ពិន្ទុគណិតវិទ្យារបស់ថ្នាក់វិទ្យាសាស្ត្រនៅមណ្ឌលមួយចំនួន ដោយសារកម្មវិធីកុំព្យូទ័រមិនបានស្រង់ពិន្ទុគណិតវិទ្យារបស់បេក្ខជនចំនួន៧៤០បន្ទប់ ។
ក្រសួងអប់រំ យុវជន និងកីឡា បានលើកឡើងថា បន្ទាប់ពីដោះស្រាយបច្ចេកទេសរួមជាលទ្ធផលមានដូចតទៅ ៖បេក្ខជនជាប់សរុប៧៦.០៣៤នាក់ ត្រូវជា៦៧,០៧% ។ បេក្ខជនជាប់និទ្ទេសA មានចំនួន៤០៨នាក់ និទ្ទេសB មានចំនួន២.២២២នាក់ និទ្ទេសC ចំនួន៦.០៤១នាក់ និន្ទេសD មានចំនួន១៥.១៨០នាក់ និងនិទ្ទេសE មានចំនួន៥២.១៨៣នាក់ ។ ចំណែកថ្នាក់វិទ្យាសាស្ត្រសង្គម មិនប៉ះពាល់ទេ ។ ក្រសួងអប់រំ យុវជន និងកីឡា ចេញសេចក្តីប្រកាសលទ្ធផលប្រឡងថ្មីសម្រាប់ថ្នាក់វិទ្យាសាស្ត្រនៅថ្ងៃទី១៤ ខែកញ្ញា ឆ្នាំ២០១៨ លើទំព័រហ្វេសប៊ុកក្រសួងអប់រំ និងនៅថ្ងៃទី១៥ ខែកញ្ញាឆ្នាំ២០១៨ នៅតាមមន្ទីរអប់រំរាជធានី-ខេត្ត ។
ចែករំលែកព័តមាននេះ