ខេត្តកំពង់ស្ពឺ ៖ ជនសង្ស័យម្នាក់បានលីកាំបិតផ្គាក់ចូលទៅកាប់ជនរងគ្រោះបណ្តាលអោយស្លាប់ភ្លាមៗនៅក្នុងថ្លុកឈាម និងចំពោះមុខប្រពន្ឋជនរងគ្រោះតែម្តង ។ ការឃាត់ខ្លួននេះធ្វើឡើងកាលពីវេលាម៉ោង១១និង១១នាទី ថ្ងៃទី១៤ ខែកញ្ញា ឆ្នាំ២០១៨ ស្ថិតក្នុងភូមិព្រីង ឃុំត្រែងត្រយឹង ស្រុកភ្នំស្រួច ។
ជនរងគ្រោះដែលគេចោទជាគ្រូធ្មប់ឈ្មោះ ហែម យឹម ភេទប្រុស អាយុ៦៦ឆ្នាំ មុខរបរជាកសិករ មានប្រពន្ធឈ្មោះ សន សូត អាយុ៥៦ឆ្នាំ រស់នៅជាមួយគ្នាក្នុងភូមិកើតហេតុខាងលើ ។
ប្រពន្ឋជនរងគ្រោះបានរៀបរាប់ថា មុនពេលកើតហេតុម៉ោង៥និង៣០នាទី គាត់ និងប្តីបានចុះពីលើផ្ទះមកបង្កាត់ភ្លើងដាំបាយនៅខាងក្រៅផ្ទះ ហើយប្តីគាត់បានដើរទៅក្រោយផ្ទះស្រាប់តែឮស្នូរកាប់ហើយឮប្តីគាត់ស្រែកឲ្យជួយ ពេលគាត់រត់ទៅដល់ឃើញប្តីគាត់ដេកស្លាប់ក្បែរពាងទឹក និងឃើញជនដៃដល់រត់ទៅទិសខាងត្បូង តែដោយសារមេឃភ្លឺច្បាស់គាត់មើលស្គាល់ថា ជនដែលកាប់ប្តីគាត់នោះឈ្មោះ ជុន ដែលជាអ្នករស់នៅភូមិជាមួយគ្នា ។ ក្រោយកើតហេតុគាត់ជាប្រពន្ធបានរាយការណ៍ប្រាប់សមត្ថកិច្ចចុះមកអន្តរាគមន៍ចាប់ជនដៃដល់ជនដែលកាប់ប្តីគាត់នៅនឹងផ្ទះតែម្តង ។
នគរបាលស្រុកភ្នំស្រួចបានអោយដឹងថា ជនសង្ស័យឈ្មោះ ចិន ជុន អាយុ៤៥ឆ្នាំ រស់នៅភូមិជាមួយជនរងគ្រោះតាមការបំភ្លឺរបស់ប្រពន្ធជនរងគ្រោះ សមត្ថកិច្ចបានឃាត់ជននេះនៅនឹងផ្ទះ ខណៈដែលធ្វើហាក់បីដូចជាមិនដឹងរឿង ។ ក្រោយឃាត់ខ្លួនសមត្ថកិច្ចបាននាមជនសង្ស័យអោយធ្វើត្រាប់អំពីការកាប់ទៅលើជនរងគ្រោះផងដែរ ។
ក្រោយពិនិត្យសមត្ថកិច្ចរកឃើញនៅលើកញ្ចឹង.កជនរងគ្រោះមានស្នាមកាប់ចំកញ្ចឹង.កចំនួន២កន្លែងដាច់.កស្លាប់ភ្លាមៗ ។ ករណីនេះបំបែកបានដោយសារប្រពន្ធជនរងគ្រោះស្គាល់អត្តសញ្ញាណជនល្មើសច្បាស់ ដោយសមត្ថកិច្ចបានចុះចាប់ជនដៃដល់បានភ្លាមៗនៅក្នុងផ្ទះ ព្រមទាំងដកហូតបានកាំបិតផ្គាក់ប្រឡាក់ឈាម១ផងដែរ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា មូលហេតុដែលខ្លួនសម្រេចចិត្តលបកាប់ជនរងគ្រោះអោយស្លាប់បែបនេះ ដោយសារតែខឹងនឹងជនរងគ្រោះធ្វើអំពើអាបធ្មប់មកលើខ្លួនបណ្តាលអោយចេះតែងងឹតមុខ ។
ជនសង្ស័យបន្តថា មុុនពេលកើតហេតុពេលព្រលឹមស្រាងៗខ្លួនបានលីកាំបិតពីផ្ទះដើរសំដៅទៅផ្ទះជនរងគ្រោះពេលនោះឃើញប្រពន្ធជនរងគ្រោះកំពុងដាំបាយហើយជនរងគ្រោះអោនដួសទឹកលុបមុខខ្លួនក៏កាប់ពីក្រោយចំកញ្ចឹង.ក២កាំបិតតែម្តង ។
ក្រោយកាប់ហើយក៏រត់ទៅទិសខាងត្បូងរួចចូលផ្ទះខ្លួនធ្វើដូចមិនមានអ្វីកើតឡើង ។ ជនសង្ស័យបន្តទៀតថា ពេលកំពុងតែនៅធ្វើការផ្ទះក៏ត្រូវសមត្ថកិចឃាត់ខ្លួនព្រមទាំងដកហូតកាំបិតដែលធ្វើសកម្មភាពមូយទៀតផង ។
ជនសង្ស័យត្រូវបានសមត្ថកិច្ចនាំខ្លួនទៅអធិការដ្ឋាន កសាងសំណុំរឿងបញ្ជូនមកស្នងការដ្ឋានដើម្បីចាត់ការតាមច្បាប់ ។ ចំណែកសពជនរងគ្រោះត្រូវបានក្រុមគ្រួសាររៀបចំធ្វើបុណ្យតាមប្រពៃណីនៅផ្ទះកើតហេតុខាងលើ ៕
ចែករំលែកព័តមាននេះ