ខេត្តបាត់ដំបង ៖ ទស្សកិច្ចសិក្សាពង្រឹងអង្គភាពរឹងមាំលើគ្រប់វិស័យដល់កងយោធពលខេមរភូមិន្ទ ត្រូវប្រកាន់ភ្ជាប់នូវជំហរស្មោះត្រង់ស្នេហាជាតិបម្រើប្រជាពលរដ្ឋ និងរក្សាវិន័យសេចក្តីថ្លៃថ្នូរ បង្កើនសមត្ថភាព គុណភាព ការគ្រប់គ្រង ដឹកនាំបញ្ជាប្រកបដោយចេរភាព ដែលជាកត្តាឈានមុខ…
ខេត្តបាត់ដំបង ៖ ទស្សកិច្ចសិក្សាពង្រឹងអង្គភាពរឹងមាំលើគ្រប់វិស័យដល់កងយោធពលខេមរភូមិន្ទ ត្រូវប្រកាន់ភ្ជាប់នូវជំហរស្មោះត្រង់ស្នេហាជាតិបម្រើប្រជាពលរដ្ឋ និងរក្សាវិន័យសេចក្តីថ្លៃថ្នូរ បង្កើនសមត្ថភាព គុណភាព ការគ្រប់គ្រង ដឹកនាំបញ្ជាប្រកបដោយចេរភាព ដែលជាកត្តាឈានមុខ សំដៅពង្រឹងបានការ រួមចំណែកអភិវឌ្ឍន៍សង្គមជាតិ។
នេះជាការផ្តាំផ្ញើរបស់លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានថ្លែងក្នុងពិធីជួបសំណេះ សំណាល សាកសួរសុខទុក្ខកងទ័ព ដែលកំពុងបំពេញភារកិច្ច នៅតាមប៉ុស្តិ៍ប៉ម ជួរមុខនៃខ្សែបន្ទាត់ ព្រំដែន និងធ្វើទស្សនកិច្ចសិក្សាពង្រឹងអង្គភាពរឹងមាំ លើគ្រប់វិស័យសម្រាប់ត្រីមាសទី៣ ឆ្នាំ២០១៨ នៅ កងអនុសេនាធំលេខ៣ វរសេនាតូចលេខ១ របស់តំបន់ប្រតិបតិ្តការសឹករងបាត់ដំបង ស្ថិតក្នុងភូមិសាស្ត្រ ឃុំសំពៅលូន ស្រុកសំពៅលូន ខេត្តបាត់ដំបង។
កាលពីព្រឹកថ្ងៃទី១៤ ខែកញ្ញា ឆ្នាំ២០១៨ កន្លងទៅនេះ និងវត្តមានចូលរួមផងដែរ មានលោក ហឿង សុគន្ធ អភិបាលរងខេត្តបាត់ដំបង លោក ឈឹម វជ្ជរ៉ា ប្រធានមន្ទីរកសិកម្មខេត្ត អស់លោកមេបញ្ជាការរងយោធភូមិភាគ មេបញ្ជាការ មេបញ្ជាការរង កងពលលេខ៥១,៥២ និង៥៣, តំបន់ប្រតិបត្តិការសឹករងបាត់ដំបង,ប៉ៃលិន,ពោធិសាត់ និងបន្ទាយមានជ័យ កងការពារព្រំដែនគ្រប់អង្គភាព តំណាងអាជ្ញាធរ មូលដ្ឋានស្រុក ឃុំ អស់លោក មេបញ្ជាការ មេបញ្ជាការរង គ្រប់កងវរសេនាតូច និងនាយទាហានសរុប២៩៨នាក់។
នៅក្នុងសកម្មភាព ជួបសំណាលសំណាលកងទ័ព នៅកងអនុសេនាធំលេខ៣ នាពេលនោះប្រតិភូដែល ដឹកនាំដោយលោក ឧត្តមសេនីយ៍ឯក ប៊ុន សេង បានអញ្ជើញកាត់ខ្សែបូសម្ពោធដាក់ឲ្យប្រើប្រាស់ជាផ្លូវការនូវអាគារ ប្រចាំការ០១ខ្នងជួរមុខរបស់តំបន់ប្រតិបត្តិការសឹកខេត្តបាត់ដំបង និងបានពិនិត្យទីតាំង របស់កងអនុសេនាធំលេខ៣ លើការងារកសាងអង្គភាពរឹងមាំលើគ្រប់វិស័យ។ បន្ទាប់មកប្រតិភូ បានបន្តដំណើរជួបសំណេះសំណាលកងទ័ពក្នុងកងវរសេនាតូចលេខ១ របស់តំបន់ប្រតិបត្តិការសឹករង បាត់ដំបង ដែលមានទីតាំងស្ថិតក្នុងភូមិសាស្ត្រភូមិអូរកណ្តោល ឃុំសន្តិភាព ស្រុកសំពៅលូន និងបានទស្សនកិច្ចសិក្សា របស់កងកម្លាំងដែលគ្រប់ស្ថាប័នអនុវត្តន៍ជាប្រចាំក្នុងនោះបានធ្វើការពិនិត្យទីតាំង កន្លែងធ្វើការងារថ្នាក់កងវរសេនាតូច ការងារចិញ្ចឹមសត្វគោ ត្រី មាន់ ទា ផ្ទះបាយ ការដាំដំណាំ បន្លែគ្រប់មុខ និងភាពរីកចម្រើនក្នុងការគ្រប់គ្រងដឹកនាំបញ្ជានឹងការធានាជីវភាពរស់នៅរបស់កងទ័ព បានសមរម្យ។
ជាងនេះទៅទៀត កងវរសេនាតូចលេខ១ បានចូលជ្រៅលើការងារកសាងអង្គភាព ពិសេសការកសាងផ្ទះបាយគំរូថ្នាក់កងអនុសេនាធំ វរសេនាតូចនិងស្វែងយល់រាល់បទពិសោធន៍ ការគ្រប់គ្រងកម្លាំងកងទ័ពការថែរក្សាសុខមាលភាពការងារធានាហូបចុកប្រចាំថ្ងៃឲ្យកងទ័ពបានសមរម្យ ព្រមជាមួយនឹងការធ្វើបទបង្ហាញដែលមានលក្ខណៈ៤ចំណុច របៀបរបបធ្វើការងារគ្រប់គ្រងចំនួនទ័ព ការងារប្រយុទ្ធត្រៀមប្រយុទ្ធការងារហ្វឹកហ្វឹនរៀនសូត្រ លើកកម្ពស់សមត្ថភាពការយល់ដឹងលើគ្រប់វិស័យ ស្របតាមការណែនាំពីថ្នាក់យោធភូមិភាគ បានដាក់ចេញតាមទិសដៅឲ្យអនុវត្តន៍។
បន្ទាប់មកលោកឧត្តមសេនីយ៍ទោ អ៊ុក ឃ្នួច មេបញ្ជាការរងយោធភូមិភាគទី៥ មេបញ្ជាការតំបន់ប្រតិបត្តការសឹករងបាត់ដំបង បានបញ្ជាក់ពីសកម្មភាព និងភាពរីកចម្រើន របស់អង្គភាពនាពេលកន្លងមកដោយមានការធ្វើទស្សនកិច្ចសិក្សាពីគ្នាទៅវិញទៅមកប្រមាណ៣ឆ្នាំកន្លងមកនោះ និងមានមតិចូលរួម រិះគន់ពីលោកឧត្តមសេនីយ៍ទោ ច័ន្ទ ស៊ីថុន មេបញ្ជាការរងយោធភូមិភាគទី៥ ប្រធានតំបន់២ប្រចាំតំបន់នោះ ក្នុងន័យស្ថាបនា ដើម្បីជាមូលដ្ឋាន កែលម្អដកពិសោធន៍ពីគ្នាទៅវិញ ទៅមក និងបានធ្វើការវាយតម្លៃរាល់ចំណុចខ្លាំងខ្សោយផងដែរ។
មានមតិសំណេះសំណាល នាពេលនោះ លោកឧត្តមសេនីយ៍ឯក ប៊ុន សេង បានបញ្ជាក់អំពីការរៀបចំក្បាលម៉ាស៊ីនដឹកនាំថ្មី ឲ្យសមស្របទៅតាម ការបោះឆ្នោត ហើយថ្មីៗក្នុងអណត្តទី៦ កន្លងទៅនេះគឺយើងធ្វើតាមបែបប្រជាធិបតេយ្យ ដែលមានប្រជាជន គាំទ្រទាំងស្រុង ហើយបានធ្វើការវាយតម្លៃខ្ពស់ និងបានកោតសរសើរចំពោះស្មារតី ខិតខំប្រឹងប្រែងយកអស់កម្លាំងកាយចិត្តបំពេញភារកិច្ចបានល្អប្រកបដោយភាពសហការរបស់ថ្នាក់ ដឹកនាំវរសេនាតូចលេខ១ ដែលកន្លងមកនេះបានពុះពារគ្រប់ការលំបាកក្នុងការកសាងនូវ សមិទ្ធផលជាច្រើនពិសេសការកសាងផ្ទះបាយគំរូសមរម្យក្នុងការហូបចុកប្រចាំថ្ងៃ និង បានគ្រប់គ្រងកម្លាំងមានមុខជាប្រចាំព្រមជាមួយនឹងការផ្តល់នូវគោលគំនិតបទពិសោធន៍ល្អៗ ដល់នាយទាហានពលទាហាន និងបានដោះស្រាយការជួបលំបាករាល់ភាពប្រឈមផងដែរ។
លោកឧត្តមសេនីយ៍ឯក ប៊ុន សេង បានធ្វើការសរុបឡើងវិញរាល់ចំណុចខ្លាំងខ្សោយ និងបានធ្វើការកែតម្រូវចំណុចខ្វះខាតមួយចំនួន ដោយត្រៀមបើកអង្គសិក្ខាសាលារបស់យោធភូមិភាគទី៥ ក្នុងខែវិច្ឆិកាខាងមុខនេះ ដើម្បីកែទម្រង់ដល់នាយទាហានគ្រប់បណ្តាអង្គភាពបន្ថែមទៀតឲ្យមានគុណភាព ដែលចំណុះឲ្យយោធភូមិភាគ និងបំពេញបន្ថែម ដើម្បីជាគន្លឹះឈានឆ្ពោះទៅរកភាពរីកចម្រើន ក្នុងអង្គភាពរៀងៗខ្លួន ហើយក្នុងនាមមេបញ្ជាការយោធភូមិភាគទី៥។
លោកឧត្តមសេនីយ៍ឯក ប៊ុន សេង បានផ្តល់លទ្ធភាព និងគ្រប់សកម្មភាពការងារព្រមទាំងបានលើកឡើងថា កងទ័ពគឺជាឆ្អឹងខ្នងរបស់ រាជរដ្ឋាភិបាល។ ដូចនេះត្រូវបង្កើនការបេ្តជ្ញាចិត្ត អនុវត្តន៍នូវបទបញ្ជា លក្ខន្តិកៈរបស់ កងយោធពលខេមរភូមិន្ទ ស្មោះត្រង់ដាច់ខាតការពារជាតិ សាសនា ព្រះមហាក្សត្រ ហើយនេះក៏ជាការធ្វើ ទស្សនសិក្សាស្វែងយល់នូវភាពរីកចម្រើន នៅតាមកងឯកភាពកងវរសេនាតូច ដែលជាការលើកកម្ពស់ ជីវភាពកងទ័ពរស់នៅបានសមរម្យ និងបានរួមចំណែកលើការងារចលនាប្រឡងប្រណាំងក្នុងអង្គភាព ផងដែរ។
ជាមួយនោះដែរលោកឧត្តមសេនីយ៍ឯក ប៊ុន សេង បានឧបត្ថម្ភដល់កម្មវិធីនូវថវិកាចំនួន០២ លានរៀល និងលោក ហឿង សុគន្ធ អភិបាលរងខេត្តបាត់ដំបង បានផ្តល់សូឡាប្រើពន្លឺព្រះអាទិត្យ ចំនួន១កំប្លេតម្លៃប្រមាណ៥០០ដុល្លារដល់អង្គភាពនេះបន្ថែមទៀតផងដែរ៕
ចែករំលែកព័តមាននេះ