ខេត្តព្រះសីហនុ ៖ បុរសជនជាតិស្វីសម្នាក់ ត្រូវបានកម្លាំងសមត្ថកិច្ចនគរបាលខេត្តព្រះសីហនុ ចាប់ឃាត់ខ្លួនកាលពីវេលាម៉ោង៤និង៣០នាទីរសៀលថ្ងៃទី១៣ កញ្ញា ពាក់ព័ន្ធពីបទគំរាមទារប្រាក់ ។
ជនសង្ស័យឈ្មោះ Rickard Erik Stiogson ភេទប្រុស អាយុ៣២ឆ្នាំ មុខរបរមិនពិតប្រាកដ សញ្ជាតិស្វីស (មិនមានលិខិតឆ្លងដែនជាប់ខ្លួន) ។
សមត្ថកិច្ចបានឲ្យដឹងថា ជនសង្ស័យបានផ្ញើសាតាមហ្វេសប៊ុកគំរាមសម្លាប់ជនរងគ្រោះឈ្មោះ NEXRAUD ARTHUR ភេទប្រុស អាយុ២៨ឆ្នាំ សញ្ជាតិបារាំង ស្នាក់នៅបន្ទប់ជួល ក្រុមទី១៣ ភូមិ៥ សង្កាត់លេខ៤ ក្រុងព្រះសីហនុ បើមិនប្រគល់ប្រាក់ចំនួន១០០០ដុល្លារអាមេរិក តាមការសន្យាថាឲ្យខ្លួននោះទេ ។
បន្ទាប់ពីជនរងគ្រោះមិនធ្វើតាម ជនសង្ស័យក៏បានយកកូនកាំបិតកៃចុងស្រួចបម្រុងចាក់សម្លាប់ជនរងគ្រោះ ពេលនោះក៏ត្រូវបានកម្លាំងជំនាញព្រហ្មទណ្ឌ ជួយអន្តរាគមន៍ទាន់ និង ឃាត់ខ្លួនជនសង្ស័យជាក់ស្តែង ព្រមទាំងរំដោះជនរងគ្រោះ រួចនាំខ្លួនជនសង្ស័យយកទៅកាន់អធិការដ្ឋាននគបាលក្រុងព្រះសីហនុ និងបន្តទៅការិយាល័យជំនាញ ដើម្បីចាត់ការតាមនីតិវិធី ។
ជាមួយគ្នានោះដែរ សមត្ថកិច្ចបានចាប់យកវត្ថុតាងកូនកាំបិតចុងស្រួចមួយដែលជាអាវុធធ្វើសកម្មភាព ៕
ចែករំលែកព័តមាននេះ