ប្រទេសអាហ្វហ្គានីស្ថាន ៖ ជម្លោះនៅអាហ្វហ្គានីស្ថានដែលរយៈពេលប៉ុន្មានសប្ដាហ៍ចុងក្រោយនេះ មានការកើនឡើងខ្លាំងកំពុងឈានក្លាយជាជម្លោះដែលបង្ហូរឈាមបំផុតនៃពិភពលោកក្នុងឆ្នាំ២០១៨ នាំមុខជម្លោះនៅស៊ីរីទោះបីមានក្ដីសង្ឃឹមលើការចរចាជាមួយពួកតាលីបង់ក្ដី។
លោក JOHN WALSH អ្នកវិភាគសម្រាប់វិទ្យាស្ថានសន្តិភាពអាមេរិកUSIPថ្លែងនាថ្ងៃទី១៤ កញ្ញាថា ជាមួយការកើនឡើងនៃចំនួនជនរងគ្រោះនៅអាហ្វហ្គានីស្ថានហើយនិងលទ្ធភាពនៃការឈានទៅបញ្ចប់ជម្លោះនៅស៊ីរី ជម្លោះនៅអាហ្វហ្គានីស្ថានក្លាយជាជម្លោះដែលបង្ហូរឈាមជាងគេបំផុតនៃពិភពលោក។
ចំណែកលោកស្រី GRAEME SMITH អ្នកពិគ្រោះយោបល់សម្រាប់អង្គការ INTERNATIOAL CRISIS GROUP អះអាងថា សង្គ្រាមនៅអាហ្វហ្គានីស្ថានកំពុងឈានទៅសម្លាប់មនុស្សដល់ទៅប្រមាណ២០.០០០នាក់ ក្នុងនោះមានជនស៊ីវិលច្រើននាក់ផងក្នុងឆ្នាំ២០១៨។
អង្គការ UPPSALA CONFLICT DATA PROGRAM ដែលវាយតម្លៃលើការបាត់បង់ជីវិតមនុស្សក្នុងបណ្ដាជម្លោះ ចាប់តាំងពី៤០ឆ្នាំមកហើយនិយាយថា ឆ្នាំ២០១៨នឹងក្លាយជាឆ្នាំដែលបង្ហូរឈាមបំផុតក្នុងប្រទេសនេះ បន្ទាប់ពីកំណត់ឃើញចំនួនមនុស្សស្លាប់ច្រើនបំផុតដល់ទៅ១៩.៦៩៤នាក់កាលពីឆ្នាំ២០១៧។បើធ្វើការប្រៀបធៀបគ្នា សង្គ្រាមស៊ីវិលនៅអាហ្វហ្គានីស្ថានមានមនុស្សស្លាប់៩.០៥៥នាក់ក្នុងឆ្នាំ១៩៩៤៕
ចែករំលែកព័តមាននេះ