ខេត្តតាកែវ ៖ សាខាកាំកុងត្រូលខេត្តតាកែវដែលដឹកនាំដោយលោក ប៉ោ លាងគង់ ប្រធានសាខា សហការនឹងមន្ទីរពាណិជ្ជកម្មខេត្តនៅព្រឹកថ្ងៃទី១៣ ខែកញ្ញា ឆ្នាំ២០១៨ បានចុះត្រួតពិនិត្យទំនិញជាប្រភេទគ្រឿងកំប៉ុង…
ខេត្តតាកែវ ៖ សាខាកាំកុងត្រូលខេត្តតាកែវដែលដឹកនាំដោយលោក ប៉ោ លាងគង់ ប្រធានសាខា សហការនឹងមន្ទីរពាណិជ្ជកម្មខេត្តនៅព្រឹកថ្ងៃទី១៣ ខែកញ្ញា ឆ្នាំ២០១៨ បានចុះត្រួតពិនិត្យទំនិញជាប្រភេទគ្រឿងកំប៉ុង និងធ្វើតេស្តបឋមទៅលើបន្លែ ផ្លែឈើ ចំណីអាហារ ពិសេសត្រួតពិនិត្យ ស៊ុតដែលមានផ្លាកសញ្ញា FRF តាមម៉ាតមួយចំនួននៅផ្សារអង្គតាសោម ក្នុងស្រុកត្រាំកក់ និងក្នុងក្រុងដូនកែវ ។
លោក ប៉ោ លាងគង់ ប្រធានសាខាកាំកុងត្រូលខេត្តបានអោយដឹងថា ដើម្បីចូលរួមធានាបានចំពោះសុវត្ថិភាពចំណីអាហារក៏ដូចជាការពង្រឹងនូវសុខុមាលភាពសាធារណៈផងដែរនោះមន្ត្រីជំនាញកាំកុងត្រូលបានចុះត្រួតពិនិត្យទំនិញដែលដាក់លក់នៅតាមទីផ្សារនានាក្នុងខេត្តដោយផ្តោតជាសំខាន់លើអនាម័យ មិនមានសារធាតុគីមីលើចំណីអាហារ ឬខូចគុណភាព និងមិនហួសកាលបរិច្ឆេទប្រើប្រាស់ ។
លោកប្រធានសាខាកាំកុងត្រូលខេត្តបន្តថា នៅក្នុងការចុះត្រួតពិនិត្យទំនិញនេះដែរគឺយើងបានធ្វើតេស្តបមឋទៅលើចំណីអាហារជាច្រើនមុខ ប៉ុន្តែជាលទ្ធផលគឺរកពុំឃើញសារធាតុគីមីនៅលើចំណីអាហារ និងបន្លែនោះដែរព្រោះអាជីវករពួកគាត់មានការយល់ដឹងច្រើនពីសុវត្ថិភាពចំណីអាហារនេះហើយក្នុងនោះដែរចំពោះទំនិញជាគ្រឿងកំប៉ុងក៏រកពុំឃើញមានទំនិញណាដែលខូចគុណភាព ឬហួសកាលបរិច្ឆេទប្រើប្រាស់អ្វីដែរ ។
លោក ប៉ោ លាងគង់ ការចុះមកត្រួតពិនិត្យទំនិញនៅតាមទីផ្សារកន្លងមកនៅក្នុងខេត្តក៏ដូចជាពេលនេះគឺមន្ត្រីជំនាញរបស់យើងគឺរកឃើញភាគតិចបំផុតចំពោះទំនិញដែលខូចគុណភាព និងហួសកាលបរិច្ឆេទប្រើប្រាស់ និងចំណីអាហារមានសារធាតុគីមី ដោយសារតែមានការចូលរួមសហការយ៉ាងល្អពីអាជីវករ រួមផ្សំនឹងសកម្មភាពចុះត្រួតពិនិត្យទំនិញក៏ដូចជាការអប់រំណែនាំអាជីវករពីមន្ត្រីជំនាញកាំកុងត្រូលក្រុមអាជីវករក៏ដូចជាប្រជាពលរដ្ឋពួកគាត់បានយល់ដឹងកាន់តែទូលំទូលាយពីសុវត្ថិភាពចំណីអាហារនៅពេលនេះ ៕
ចែករំលែកព័តមាននេះ